Skip to content
BibleKenya

Dao Ao Dai Literal Text

Ma-tai 8

Wax zanyf, Zâu Yê-su tăng wa zoongz nzac lauf, naih songx munh đuungx hongđ nzongf ninyh lêpc Nănh. Mangc, naih ah lanh munh săngh maoh pongz gumc staox taih, paix Zâu Yê-su nyăngz cah đangc, yâuc coong: “Zâu lex, năngđ coong Mâyh oix, Mâyh six naih jab hayh ayx tuz yaz dlăngc.” Tăng wa Zâu Yê-su stuungb puf laoz nănh coong; “Yaz oix lêc, dlăngc gôh.” Toongx sangf, wax tauh zuc maoh pongz munh tuz dlăngc. Zâu Yê-su coong ănz nănh: “Zuc năngx cayb bôngh, mâyh gâyf coong ănz mănv, six oix zuc muf, coong cănh nyăngz stinb ănz stayb munh, bix nzâyz stanyb lanyh ninyh coongx âyz Mô-sê nzaox nyăngz, ayx ah cuyb zanyx manyf phunz stiz.”

Wax zanyf, Zâu Yê-su nzac wa Ca-bê-na-um dlanyh cah njaf muf, naih ah lanh peengz pyây taih pongh Nănh, joođ Nănh coong: “Zâu lex, yaz nyăngz pâuz săngh gumc quac phâyx wa pyau, tanyđ munz zâuđ nzongf.” Zâu Yê-su coong ănz nănh: “Yaz cănh ninyh, zanyf phunz nănh năngx gongx.” Peengz pyây tauz coong: “Zâu lex, yaz six max payh tuz stipx Mâyh muf nzac yaz nyăngz pyau, six joođ Mâyh tinyh phanv coong ah zâux wac, yaz nyăngz pâuz cănh tuz zany gongx. Wâyc yaz lauf yămz munh nyăngz lanyf cah đi, yâuc naih wax đomc peengz yămz yaz cah đi. Yaz coong ănz nâyx lanh: ‘Ninyh gôh,’ nănh songđ ninyh, coong ănz pitc lanh coong: ‘Taih gôh,’ nănh yâuc taih, coong ănz yaz nyăngz pâuz coong: ‘Ayx nâyx huungđ gôh,’ nănh yâuc ayx.” Six numđ nănh coong ayx nâyx, Zâu Yê-su songđ numđ nyâyh ganc yâuc coong ănz lêpc Nănh wax đomc munh: “Yaz coong senz, bux nyâuh, Yaz max zeengx phătc tăng laiv lanh munh yămz I-sa-la-ên naih zen stimz lub tuz nâyx. Six yaz coong ănz nyâuh, naih munh đuungx six tăng tongz pôngz cloon stâyz pôngz taih, tuz cloon Apx-la-ham, cloon I-sakx, cloon Ya-côpx, yămz wa Tênb-toongh côkz songc hinh nhlinc năngv. Six Tênb-toongh côkz nyăngz munh wax đomc zuc quanyf ănz wa cungh ngwaic nzămc nyăngz tinc, yămz wa six naih pungx stingb haoh tăpc nyah tanyđ.” Tăng wa Zâu Yê-su coong ănz wax tauh peengz pyây: “Phanv muf gôh! Âyz mâyh zen nyăngz, six tuz năngđ nâyx phunz mâyh gôh.” Wax tauh pâuz songđ toongx wax nomz săngx huđ tuz zany gongx.

Zâu Yê-su ninyh nzac Pi-tê nyăngz pyau, phătc Pi-tê nyăngz nzif ti săngh bah song gumc phâyx wa zâuv. Nănh lumz gumc munh nyăngz puf, bah song gumc songđ gongx, nănh songđ nyoongz quef ayx cumh pâuz bokc dlic Zâu Yê-su. Wax zanyf, tauv cayx nzămc, munh ênz wax đomc zuc manđ yămz stinb nyăngz munh đuungx taih phunz Nănh, Nănh nongc ah zâux đokc wac luiđ wax đomc manđ setb nzuf, yâuc zany phunz wax đomc săngh gumc munh gongx nzuf, wâyc phunz setb taih toix nzuf tâuc wac munh I-sa-ya tâuc taih nyăngz wac, coong: “Nănh đamz nzuf pănh nyăngz staiz nanc yâuc tanyđ pănh nyăngz muif huungđ gumc.”

Wax zanyf, phătc naih munh đuungx yămz quib Nănh nzêux nzuf, Nănh songđ êu clăngv staox wax nganđ muf. Tăng wa naih ah lanh nzaox gâyf stênx steengb, taih stătx Nănh, coong: “Stênx steengb lex, Mâyh hănđ ninyh laiv yaz lauf lêpc Mâyh.” Zâu Yê-su coong ănz nănh coong: “Njab clô naih ngamh, nooc yâuc naih njauf, six Bamh Munh max naih tinc nongc coongv pyây phâyx.” Tăng wa naih ah lanh stayb sây zef taih coong ănz Nănh: “Zâu lex, joođ phunz yaz phunb đangz muf plopx yaz nyăngz pha đangc.” Six Zâu Yê-su coong ănz nănh: “Phanv lêpc yaz gôh, phunz stiz munh tayc cănh plopx stiz nyăngz munh tayc.”

Tauv Nănh nzac đangđ ninyh, Nănh wax đomc stayb sây lauf lêpc Nănh ninyh. Phanv mangc, naih ah tâuc nzaox lub nzongf yămz wa coiđ, ayx tuz womz boomf phatb nzac đangđ. Six Nănh jinh đangh phâyx mâyc njoomh. Stayb sây buz taih stătx êu Nănh điub, coong: “Zâu lex, joođ Mâyh stăngc njâuv buz nef; pănh cayx tayc gôh!” Zâu Yê-su coong ănz stiz: “Săngh laix nyâuh bix cumh nzav heh, nyâuh zen stimz tuz haiđ nâyx heh?” Tăng wa Nănh nyoongz quef, mađ nzaox cloon coiđ, songđ stinyb njâuh staox taih. Stayb sây buz songđ nyâyh ganc, yâuc coong: “Lâyc tauh munh six mănv, ayx tuz nzaox cloon coiđ lauf năngx mungv Nănh?”

Wax zanyf Zâu Yê-su clăngv ninyh tauv wax nganđ leepb wăngx sinh, Ca-đa-la stâyz phangz, naih iz lanh munh zuc manđ yămz stinb, tăng wa stâu đungc setb taih pongh Zâu Yê-su, stiz đokc nzongf ayx tuz max naih mănv nzađ yăngh pitb quaix wax stinz jau. Phanv mangc, stiz hamv lub, coong: “Zâu Tênb-Huungh nyăngz Toonz lex, buz naih luungđ quenđ tauv Mâyh heh? Max zeengx tauv săngx huđ Mâyh cayx taih nây wâyb buz quaix đangc mah?” Wax zanyf, naih ah peob tungf hongđ nzongf jinh đangh yămz wa lov nhlinc, gâyh stiz max côz. Tăng wa, wax đomc manđ songđ joođ Zâu Yê-su, coong: “Mâyh năngđ luiđ buz setb, joođ phunz buz ninyh nzac wax peob tungf.” Zâu Yê-su êu wax đomc manđ, coong: “Setb taih gôh!” Wax đomc manđ songđ setb, bix ninyh nzac wax peob tungf; six phanv mangc, săngh peob tungf songđ tiuv vuh nzac ngoom ninyh tuih coiđ, sêmh womz đi tayc nzuf. Wax zanyf, wax đomc jămđ tungf munh tiuv muf, wa dlanyh, stiz lănv nâyx đomc dlayc, cloon wa iz lanh munh zuc manđ yămz stinb nyăngz jau setb taih nyăngz dlayc. Phanv mangc, lomc dlanyh nyăngz munh tinyh đoih ninyh lov Zâu Yê-su mangc. Tauv phătc Nănh, stiz jab joođ êu Nănh tiuv quaix pitc đoif ninyh năngx blătc stiz nyăngz căpx caix.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.