Dao Ao Dai Literal Text
Ma-tai 16
Wax đomc Pha-li-si cloon Sa-đu-si munh, taih tauv stătx — nongc stâyv Nănh — yâuc joođ Nănh ayx ah cuyb njic hoouđ tăng guungh taih phunz stiz. Six Zâu Yê-su, tauz coong ănz stiz: [“Tauv cayx nzămc, nyâuh coong: ‘Guungh stib nâyx, guungh đangđ gôh.’ Bah đoomz tonx yâuc coong: ‘Guungh stib âuz âuz, six cayx naih bungc nzaox.’ Nyâuh manyf hayh stămđ tuz pâyz guungh nyăngz stêtz, Six yâuc max saz tuz nâyx yenh noib nyăngz dlayc setb.”] “Nâyx stâyv nyâuđ huđ cux quaiz nyăngz munh oix mangc ah cuyb njic hoouđ, six max tuz sađ laiv cuyb njic hoouđ phunz, blătc nzuf Yô-na nyăngz njic hoouđ.” Tăng wa Nănh songđ setb ninyh queengx stiz ănz wa.
Six wax đomc stayb sây yâuc nyâuđ cob max nzâyz nzu ninyh, ninyh tauv wax nganđ leepb coiđ stinh. Wax zanyf, Zâu Yê-su coong ănz stiz: “Oix zuc năngx cayb bôngh wax đomc Pha-li-si cloon Sa-đu-si munh nyăngz piny.” Six, stiz yâuc njinh luh tinyh zenđ coong: “Lâyc six wâyc pănh max nzâyz nzu.” Six pâyz nâyx đomc dlayc, Zâu Yê-su songđ coong: “Nyâuh đomc zen stimz sâub nyăngz munh lex, săngh laix nyâuh bix poc lâyc tinyh zenđ coong tăng nyâuh max naih nzu heh? Nyâuh lauf max zeengx nyâyh tuz tongb yâuc max săngx tauv pyaz nomz nzuf phunz pyaz tinb lanh munh nhlinc tuz nyâuh zef năngx sâub tuz sax đanz haz? Max six nhlic nomz nzu phunz pyâyz tinb lanh munh nhlinc tuz, nyâuh bix sâub tuz sax đanz haz? Ayx săngh laix nyâuh bix max pâyz tuz coong yaz max zâyf coong tauv nzu ănz nyâuh? Six oix zuc bôngh wax đomc Pha-li-si cloon Sa-đu-si munh nyăngz piny.” Tăng wa stiz songđ pâyz tuz coong Zâu Yê-su max zâyf êu stiz bôngh tauv nzu nyăngz piny, six coong tauv wax đomc Pha-li-si cloon Sa-đu-si munh nyăngz gâyf.
Wax zanyf, stiz ninyh tauv Si-sa-li-ya Phi-lipx-poi dlanyh nib tâyc, Zâu Yê-su naic Nănh wax đomc stayb sây, coong: “Munh coong Bamh Munh six mănv heh?” Tăng wa stiz tauz coong: “Naih ah phanx six coong Yô-hanx Quaix-gâyf; năngx naih ah phanx yâuc coong six Ê-li-ya; ah phanx timb yâuc coong Yê-lê-mi max six ah lanh wax đomc tâuc wac munh.” Nănh naic stiz coong: “Ha nyâuh coong yaz six mănv heh?” Six Si-môn Pi-tê songđ tauz coong: “Stayb pha six Zâu Jix-Tuz, săngh wax tauh Zâu Tênb-Huungh nyăngz toonz.” Wax zanyf, Zâu Yê-su tauz ănz nănh: “Si-môn Yô-na nyăngz toonz lex, mâyh naih oonz looc gôh, wâyc max zâyf naih a naih samđ nyăngz munh bux phunz mâyh, six Yaz nyăngz cah zâyc Tênb-toongh Pha lêc. Six yaz lauf coong ănz mâyh coong mâyh six Pi-tê, yămz nâyx nomz njăuz cah zâyc, yaz six njăpc yaz nyăngz jiux pangx, wax đomc yămz pâu jeengh nyăngz jab six max hingh tuz nănh stiz. Yaz jaoz wax đomc Tênb-toongh côkz nyăngz ja zâyh phunz mâyh, tinyh phanv laiv huungđ mâyh stayb yămz nây bamh canz six lauf tuz stayb yămz wa cah zâyc Tênb-toongh, tinyh phanv laiv huungđ mâyh pungx yămz nây bamh canz six lauf tuz pungx yămz wa cah zâyc Tênb-toongh.” Tăng wa, Nănh zăpx wax đomc stayb sây max phunz stiz coong ănz mănv coong Nănh six Zâu Jix-Tuz.
Tăng wa staox ninyh, Zâu Yê-su Jix-Tuz quef coonz phunz Nănh wax đomc stayb sây pâyz coong Nănh six zuc ninyh tauv Yê-lu-sa-lem, yâuc zuc tanyđ đuungx huungđ zâuđ tăng wax đomc munh côx, cloon wax đomc stayb munh, cloon wax đomc nzaox gâyf stênx steengb, yâuc zuc tayx tayc tauv wax noib pôz zef năngx tuz săngh taih. Six Pi-tê tăkc Zâu Yê-su quaix ah leepb ninyh, songđ coong Nănh: “Zâu lex, Zâu Tênb-Huungh cănh nyangc phunz mâyh. Wax đomc dlayc six max zâuđ setb taih phunz mâyh.” Six Zâu Yê-su winb lauf coong ănz Pi-tê: “Sax-tanx lex, oix zuc tiuv quaix yaz cah đangz ninyh gôh! Mâyh six ah nomz njauz ayx phunz yaz zuc tib, wâyc mâyh max nyâyh tauv Zâu Tênb-Huungh nyăngz zux ix, cungb nyâyh bamh munh nyăngz zux ix cuungv.” Tăng wa, Zâu Yê-su coong ănz nănh wax đomc stayb sây: “Năngđ coong laiv lanh oix lêpc yaz đangz ninyh, wax lanh six zuc quanyf cănh nyăngz stinb, yâuc đamz cănh nyăngz săpc đăngc zax bix lêpc yaz ninyh. Wâyc tinyh phanv laiv lanh oix zâuh cănh nyăngz meengc six zuc stâyb meengc, six laiv lanh munh wâyc yaz bix quanyf nănh nyăngz meengc six tuz meengc săngh. Wâyc năngđ coong ah lanh munh tuz nzuf bamh canz, six zuc stâyb nănh nyăngz meengc bix tuz laiv luungđ gongx heh? Wax lanh munh six cayx nzâyz laiv luungđ taih wănc tuz nănh nyăngz meengc lauf heh? Wâyc Bamh Munh six yămz Nănh nyăngz Pha nyăngz gwăngz eeng cloon Nănh wax đomc stinz munh nzac taih. Tauv wax zanyf, Nănh six âyz mănv ayx mănv nyăngz dlayc clao phunz. Yaz coong senz bux nyâuh naih ah phanx munh năngx jinh đangh stâuđ nây, naih ah phanx six max zeengx tayc tuz tauv laiv zanyf stiz phătc Bamh Munh yămz Nănh nyăngz côkz taih.”
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.