Dao Ao Dai Literal Text
Ma-tai 15
Tăng wa, wax đomc Pha-li-si munh cloon nzaox gâyf stênx steengb tăng Yê-lu-sa-lem taih pongh Zâu Yê-su, yâuc coong: “Săngh laix mâyh wax đomc stayb sây bix ayx longđ wax đomc munh côx nyăngz gâyf? Wâyc stiz max đaox puf bix nhlinc nzu.” Six Zâu Yê-su tauz ănz stiz coong: “Săngh laix nyâuh bix wâyc cănh nyăngz munh côx gâyf bix ayx longđ Zâu Tênb-Huungh nyăngz gâyf? Wâyc Zâu Tênb-Huungh paiđ nâyx đomc gâyf taih, coong: ‘Oix zuc hâuđ lênh mâyh nyăngz nzif pha,’ zef coong ‘laiv lanh mađ zaux nzif max six pha bix tayx wax tauh năngx tayc.’ Six nyâuh yâuc coong: ‘Laiv lanh coong ănz nănh nzif max six pha coong: “Phanv yaz naih laiv huungđ hayh stăngc tuz nzif pha, yaz nongc stungx phunz Zâu Tênb-Huungh nzof gôh,”’ wax tauh munh six max zâuđ hâuđ lênh nănh nyăngz nzif pha. Năngđ nây, nyâuh six quanyf Zâu Tênb-Huungh nyăngz gâyf wâyc nyâuh cănh nyăngz munh côx gâyf. Pâyc zac nyâuđ yootz nyăngz munh lex! I-sa-ya tâuc taih nyăngz wac senz toix nyâuh nzuf gôh, nănh coong:
‘Nâyx đomc pec stingx nongc nzetx zanyb Yaz,
six stiz nyăngz nyâuđ gâyh Yaz côz nzongf.
Nănh stiz canyx bongc Yaz six max setb laiv huungđ,
wâyc stiz cungb nzaox munh cănh njăpc taih wax đomc gâyf.’”
Tăng wa Nănh êu songx munh taih, Nănh coong ănz stiz: “Oix zuc mungv yâuc saz: Max naih laiv huungđ nzac nzetx ninyh bix hayh ayx wâyx ah lanh munh, six laiv huungđ tăng nzetx setb taih, wax huungđ nzăngđ hayh wâyx wax lanh munh.” Tăng wa, stayb sây buz taih stătx, coong ănz Nănh: “Stayb pha pâyz coong wax đomc Pha-li-si munh numđ nâyx đomc wac blătc stiz numđ peo max?” Six Zâu Yê-su tauz, coong: “Laiv zâyz njăngx bix yaz nyăngz Tênb-toongh Pha max songx six zuc peengz njinh coonz quanyf. Dluyh stiz gôh! Stiz six yenv jau nyăngz mâyc buđ munh. Bix năngđ coong mâyc buđ munh cănh yenv mâyc buđ munh, six njinh iz lanh zuc tuih nzac cotb nzuf.” Wax zanyf, Pi-tê tauz ănz Zâu Yê-su coong: “Joođ pob manyf wax đomc wac pây phunz buz.” Six Zâu Yê-su coong: “Ayx tuz tauv nâyx zanyf nyâuh bix lauf max saz naz? Nyâuh max pâyz tuz coong muif huungđ nhlinc nzac nzetx six nzac nyâuđ muf zef ninyh wa đay gof setb ayx queengx haz? Six laiv huungđ setb nzetx taih six tăng stimz nyâuđ nyâyh setb, wax đomc yâuc hayh ayx phunz wâyx munh. Wâyc tăng stimz nyâuđ nyâyh wax đomc huđ dlayc setb, tayx munh, văngf munh, ayx pongz lauh, ayx stac, ayx za zanyx manyf cloon coong wax đomc wac pamf. Nâyx đomc six hayh ayx wâyx munh, six max đaox puf bix nhlinc six max hayh ayx phunz wâyx munh.”
Tăng wa Nănh ninyh gâyh wax cuyb tinc, Nănh nzac wa Tai-lapx cloon Sai-đôn tâyc muf. Phanv mangc, naih ah lanh Ca-na-an munh nzif, tăng wax đomc tinc staox taih hamv êu, coong “Zâu lex, Đa-witx nyăngz sây stunz, joođ hâuđ lênh yaz! Yaz nyăngz sab zuc manđ nzac yămz stinb zâuđ nzongf.” Six Nănh max tauz wax lanh munh nzif Zâux tiny. Wax đomc stayb sây taih stătx Nănh, joođ Nănh coong: “Joođ stayb pha êu wax lanh munh nzif muf gôh, wâyc nănh njinh luh hamv lêpc pănh cah đangz.” Six Nănh tauz, coong: “Năngđ coong max zâyf wâyc I-sa-la-ên nyăngz pax jiz yuungh ninyh gaih wax đomc, yaz six max tuz paiđ taih.” Six wax lanh munh nzif, taih quâyc nzac Zâu Yê-su nyăngz cah đangc ninyh, yâuc coong: “Zâu lex, joođ stăngc njâuv yaz.” Wax zanyf, Zâu Yê-su zef tauz, coong: “Zoz sây nyăngz nzu taih phunz clô jenz nhlinc six max hoođ.” Six wax lanh munh nzif coong: “Zâu lex, toix gôh, six wâyc wax đomc clô jenz lauf tuz nhlinc tăng stiz nyăngz zâu đah mâyf wax đomc nzu pâyv tuih.” Wax zanyf, Zâu Yê-su tauz coong ănz wax lanh munh nzif coong: “Ô lex, mâyh nyăngz zen stimz lub nzongf. Âyz mâyh oix nyăngz six tuz ayx săngh phunz mâyh gôh.” Nănh nyăngz sab songđ toongx wax nomz săngx huđ tuz zany gongx.
Ninyh gâyh wax cuyb tinc Zâu Yê-su ninyh tauv Ga-li-lê coiđ sinh, zef staox ah nomz zoongz ninyh, Nănh songđ stâyv wa. Yâuc naih, wax đomc songx munh đuungx lêpc Nănh staox ninyh, naih munh staux quac, munh mâyc buđ, munh puf staux quac, munh oongx mayv coong wac, cloon đuungx lanh gumc munh. Munh ênz wax đomc munh ninyh tăpx ănz Zâu Yê-su nyăngz staux sinh Nănh yâuc zany gongx phunz stiz, ayx tuz munh tinyh đoih nyâyh ganc wâyc phătc munh oongx mayv coong wac yâuc hayh coong wac, munh puf staux quac yâuc tuz gongx, munh staux quac yâuc hayh yăngh cloon mâyc buđ munh yâuc mangc tuz phătc, Tăng wa stiz songđ tanv I-sa-la-ên nyăngz Zâu Tênb-Huungh.
Wax zany, Zâu Yê-su êu Nănh wax đomc stayb sây taih bux coong: “Yaz numđ hâuđ lênh nâyx đomc songx munh, wâyc stiz cloon yaz yămz tuz pôz noib nzof yâuc max naih luungđ nongc nhlinc. Yaz max oix phunz stiz nyâuđ sab phunb đangz, săngx đanyf stiz muf hayh yămh wa bah đamx jau.” Wax đomc stayb sây coong ănz Nănh: “Yămz nây stâyz phangz blănf bix tăng laiv lov tuz nzu đuungx nâyx taih phunz buz nongc bây peob songx munh hongđ tuz nâyx nhlinc pêu heh?” Zâu Yê-su coong ănz stiz: “Nyâuh naih sax nomz nzu heh?” Stiz tauz: “Nhlic nomz nzu, cloon cay tix tauh byauf jenz.” Tăng wa songđ bux êu songx munh stâyv wa nib minc, Zâu Yê-su nzauf nhlic nomz nzu cloon wax đomc byauf, sâuf hâuđ tuz, Nănh watz taih jaoz phunz wax đomc stayb sây, tăng wa wax đomc stayb sây nzâyz ninyh patz phunz songx munh. Songx munh tinyh đoih nhlinc tuz pêu nzuf. Stiz sâub wax đomc nzu yăngc tuz nhlic đanz pong. Wax zanyf, wax đomc munh nhlinc six pyâyz tinb lanh munh pha, max stunx munh nzif cloon munh sây. Êu songx munh muf blătc, Nănh nzac đangđ ninyh, muf tauv Ma-ga-đan stâyz phangz.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.