Ma-cô 9:23

1Zâu Yê-su coong ănz stiz: “Yaz coong senz bux nyâuh, nâyx đomc munh stâuđ nây, naih ah phanx munh max zeengx tayc six tuz phătc Zâu Tênb-Huungh nyăngz côkz naih lanyf naih jab nzac taih.” 2Quaix đangz joz noib, Zâu Yê-su ênz Pi-tê, Ya-coopc cloon Yô-hanx yenv stiz staox ah nomz zoongz njăngb ninyh lanyc yămz wa, Zâu Yê-su songđ yămz stiz nyăngz cah đangc wav jangx. 3Nănh nyăngz guyz songđ phangb pec, pec nzomz, ayx tuz yămz nây bamh canz max naih laiv tauh đuv guyz stangc bix hayh ayx tuz pec năngđ nâyx. 4Stiz mangc phătc Ê-li-ya cloon Mô-sê iz lanh yămz wa cloon Zâu Yê-su coong wac. 5Pi-tê songđ goib nzetx bux Zâu Yê-su coong: “Stayb pha lex, pănh yămz nây senz gongx nzongf, buz ayx pôz sênz njiuh, ah sênz phunz Mâyh, ah sênz phunz Mô-sê ah sênz zef phunz Ê-li-ya.” 6(Wâyc Pi-tê max pâyz nănh cayx goib nzetx coong luungđ, wâyc stiz numđ cumh nzav nzongf.) 7Songđ naih ah tungđ vănx taih sêmz stiz, naih stingb tăng wax tungđ vănx setb taih coong: “Nây six Yaz stăngz nyăngz Toonz. Oix zuc mungv Nănh nyăngz wac.” 8Max bôngh nyâyh, stayb sây buz mangc wa cah sinh, max phătc laiv lanh cloon stiz yămz, cungb phătc Zâu Yê-su ah lanh cuungv.

9Stiz tăng zoongz nzac taih wax zanyf, Zâu Yê-su zăpx stiz coong êu stiz năngx gâyf lănv bux mănv stiz phătc nyăngz dlayc, năngđ coong max zeengx tauv săngx huđ Bamh Munh tăng tayc săngh taih. 10Stiz pinyx nâyx đomc wac yămz stiz cah njaf, lanh naic lanh “tăng tayc săngh taih” six ayx laix. 11Stiz songđ naic Zâu Yê-su coong: “Săngh laix wax đomc nzaox gâyf stênx stengb bix coong Ê-li-ya six zuc taih đangc?” 12Zâu Yê-su songđ tauz stiz coong: “Ê-li-ya six senz taih đangc nongc zany muif huungđ dlayc. Ha naih wac ja coong Bamh Munh Nănh six zuc tanyđ đuungx huungđ zâuđ nanc zef zuc munh nzêmh six ayx laix? 13Six, Yaz coong bux nyâuh Ê-li-ya senz taih nzof gôh, munh yâuc âyz stiz nyăngz stimz nyâuđ ayx sax huungđ ănz nănh, cayx năngđ naih wac ja tauv nănh coong nâyx.”

14Lauf tauv wax đomc stayb sây buz wa, stiz phătc ah peob songx munh hongđ nzongf wâyh nzêux stiz zef naih wax đomc nzaox gâyf stênx steengb cloon wax đomc stayb sây yămz wa nzeengz gâyf. 15Ah phătc, Zâu Yê-su wax zanyf, songx munh tinyh đoih numđ nyâyc ganc, stiz songđ coonx tiuv nzac taih stipx Nănh. 16Zâu Yê-su naic wax đomc stayb sây: “Nyâuh jinh đangh cloon stiz nzeengz laiv huungđ heh?” 17Yămz songx munh mungh tongx naih ah lanh munh tauz Zâu Yê-su coong: “Stênx stengb lex, yaz ênz yaz nyăngz ah lanh toonz taih phunz mâyh, nănh zuc ah tauh mayv coong wac nyăngz manđ nzac yămz stinb. 18Toix laiv hâyđ manđ nzac yaz sây nyăngz stinb, manđ songđ njitc tauh sây glinyf nzac, tauh sây yâuc nzanh byaof setb, tăpc nyah, zef puf staux nhlengc, yaz joođ mâyh nyăngz stayb sây luiđ manđ setb, six stiz luiđ max tuz.” 19Tauz stiz wax zanyf, Nănh coong: “Nâyx stâyv max zen nyăngz munh lex, yaz six zuc cloon nyâuh yămz tauv laiv zanyf heh? Yaz cayx zuc tanyđ nyâuh tauv laiv zanyf? Ênz tauh sây taih phunz yaz.” 20Stiz songđ ênz wax tauh toonz taih phunz Zâu Yê-su, phătc Zâu Yê-su wax zanyf, manđ songđ toongx sangf ayx wax tauh toonz sinx bătx bătx têx, glinyf nzac nib ninyh, nănh clingx quaix ninyh quaix lauf, yâuc naih nzanh byaof setb. 21Zâu Yê-su naic wax tauh toonz nyăngz pha: “Nănh zuc năngđ nâyx bah laiv lauh nzof heh?” Wax tauh pha tauz: “Tăng wa năngx jenz. 22Đuungx hâyđ manđ quanyf nănh, ah zanyf nzac tâuf, ah zanyf nzac womz, oix hoiđ nâyx tauh sây, six năngđ coong mâyh hayh ayx tuz tix huungđ, joođ mâyh hâuh lênh buz, stăngc buz.” 23Wax zanyf, Zâu Yê-su coong ănz nănh: “‘Năngđ coong mâyh hayh’ naz? Laiv lanh zen muif huungđ six tuz nzuf.” 24Wax tauh toonz nyăngz pha lênh dlih hamv tauz coong: “Yaz zen lêc! Joođ mâyh stăngc yaz hayh zen tuz tingc!” 25Phătc songx munh jinh đangh tiuv taih stiz wa, Zâu Yê-su mađ manđ yootz, êu manđ coong: “Bah noomh đuungz cloon mayv coong wac nyăngz manđ lex, Yaz setb lanyf phunz mâyh zuc setb nâyx tauh toonz ninyh tăng nây staox ninyh six max tuz nzac nănh nyăngz stinb lauf.” 26Manđ songđ hamv ngatz ngatz têx zef ayx wax tauh toonz sinx bătx bătx têx, manđ setb ninyh blătc, wax tauh sây songđ năngđ munh tayc nâyx, ayx tuz munh đuungx coong: “Tauh sây tayc nzof gôh.” 27Six Zâu Yê-su nzauf wax tauh toonz nyăngz puf, njăpc nănh staox taih, wax tauh toonz songđ nyoongz quef. 28Tauv Zâu Yê-su nzac wa pyau muf, Nănh wax đomc stayb sây cănh lanyc naic Nănh coong: “Săngh laix buz bix max luiđ tuz wax tauh manđ setb?” 29Zâu Yê-su tauz stiz: “Nâyx huungđ manđ, năngđ coong max cloo Zâu cloon njif nhlinc six max naih mănv hayh luiđ tuz.”

30Tăng wax cuyb tinc gâyh ninyh, stiz clăngv quaix Ga-li-lê stâyz phangz, six Zâu Yê-su max oix nongc mănv pâyz, 31wâyc Zâu Yê-su jinh đangh nzaox Nănh nyăngz stayb sây, yâuc coong ănz stiz: “Bamh Munh cayx zuc jaoz phunz munh, stiz six tayx Nănh tayc. Tauv munh tayx tayc blătc, pôz noib cah đangz Nănh six năngx săngh taih.” 32Six stayb sây buz max saz nâyx zâux wac, yâuc cumh nzav max nzađ naic Zâu Yê-su.

33Stiz ninyh tauv Ca-bê-na-um dlanyh, nzac pyau cah njaf ninyh, Zâu Yê-su songđ naic wax đomc stayb sây: “Jămc jau taih wax zanyf nyâuh lanh coong ănz lanh luungđ heh?” 34Six stiz max nyaoc tiny, wâyc jămc jau taih wax zanyf stiz tinyh zenđ mangc jađ mănv ayx năngx lub quaix. 35Zâu Yê-su stâyv nzac, songđ êu wa săpc nyâyc lanh stayb sây taih dlonf wa yâuc coong ănz stiz: “Năngđ coong mănv oix ayx lub, wax tauh munh six zuc ayx năngx jenz quaix muif lanh yâuc ayx songx munh nyăngz pâuz.” 36Sên zoz ah munh sây taih: Zâu Yê-su phunz wax tauh sây yămz stayb sây buz wa mungh tongx Nănh zef jom wax tauh sây ănz Nănh nyăngz puf, songđ coong bux stiz: 37“Laiv lanh tim yaz nyăngz manyh stipx ah lanh munh sây năngđ nâyx lanh sây nâyx wax tauh munh six stipx yaz, năngđ coong laiv lanh stipx yaz, wax tauh max zâyf cungb stipx Yaz cuungv, six lauf stipx paiđ yaz taih wax Tauh.” 38Yô-hanx coong ănz Zâu Yê-su: “Stênx stengb lex, buz phătc naih ah lanh munh tim mâyh nyăngz manyh luiđ manđ buz bix cangđ wax tauh munh, wâyc nănh max lêpc pănh.” 39Six Zâu Yê-su tauz: “Năngx gâyf cangđ nănh, wâyc max naih laiv lanh munh tim yaz nyăngz manyh ayx jix caox njingc blătc wa quaix đangz zef năngx coong peo yaz. 40Wâyc laiv lanh max cloon pănh tinyh tămx wax lanh six cloon pănh tinyh hoođ. 41Wâyc laiv lanh tim yaz nyăngz manyh phunz ah zan womz nyâuh wâyc nyâuh six Jix-Tuz nyăngz munh, yaz coong senz bux nyâuh wax tauh munh nyăngz phănc senz max stâyb. 42Năngx naih laiv lanh ayx phunz ah lanh zen yaz nâyx đomc munh sây jenz pamf stoif, năngđ coong điux ah nomz njăuz mac lub ănz nănh nyăngz clangz, quanyf nănh nzac coiđ ninyh six năngx gongx têx. 43Năngđ coong nyâuh nyăngz puf hayh ayx phunz nyâuh zuc longđ stoif, oix zuc cumv ayx queengx, Nyâuh stoc ah saz puf bix tuz stâyv quâyx meengc six năngx gongx têx, naih iz saz puf bix zuc nzac yămz stâyv quâyx max hayh tayc nyăngz tâuf coiđ 44(yămz wa jengz stăyv max hayh tayc, tâuf yâuc stâyv quâyx max tayc). 45Năngđ coong nyâuh nyăngz staux hayh ayx phunz nyâuh longđ stoif, oix zuc cumv ayx queengx. Nyâuh stoc ah saz staux bix tuz stâyv quâyx meengc six năngx gongx têx, naih iz saz staux bix zuc quanyf nzac tâuf coiđ 46(yămz wa jengz stăyv max hayh tayc, tâuf yâuc stâyv quâyx max tayc). 47Năngđ coong nyâuh nyăngz mâyc hayh ayx phunz nyâuh longđ stoif, oix zuc ngwai ayx queengx. Nyâuh stoc ah nomz mâyc bix tuz nzac Zâu Tênb-Huungh nyăngz côkz, six năngx gongx têx naih iz nomz mâyc bix zuc quanyf nzac tâuf coiđ, 48yămz wa jengz stăyv max hayh tayc, tâuf yâuc stâyv quâyx max tayc. 49Wâyc muif lanh six zuc nongc tâuf ipx. 50Đau six gongx, six coong đau max camz, nyâuh cayx zoz luungđ ayx tuz đau đaih heh? Nyâuh zuc naih đau yămz nyâuh nyăngz nyâuđ, lanh yâuc oix zuc cloon lanh hoopđ stimz songc âyx yămz.”