Ma-cô 10

1Zâu Yê-su songđ nyoongz quef tăng wax cuib tinc ninyh tauv Yu-đê stâyz phangz cloon Njoh-đen wăngx wax leepz nib tâyc, songx munh zef tinyh ênz taih tauv Zâu Yê-su wa. Zâu Yê-su zef nzaox stiz cayx năngđ Nănh stâyv quâyx ayx nâyx. 2Wax đomc Pha-li-si munh taih tauv stătx, stiz oix stâyv Zâu Yê-su songđ naic Nănh coong gâyf njanh phunz ah lanh langh queengx au max. 3Six, Zâu Yê-su tauz stiz coong: “Ha Mô-sê nzaox nyâuh ayx laix?” 4Stiz tauz: “Mô-sê phunz langh ja gâyh stayb stâub songđ phunz au setb ninyh.” 5Zâu Yê-su coong ănz stiz: “Six wâyc nyâuh nyăngz nyâuđ nhlengc, nănh nzăngđ ja nâyx tiuh gâyf phunz nyâuh. 6Six, tăng săngđ coonz zuyx guungh zuyx nib,

‘Zâu Tênb-Huungh cungb zuyx stiz, ah lanh toonz cloon ah lanh sab cuungv.’

7‘Wâyc năngđ nâyx, munh toonz six zuc gâyh nănh nyăngz nzif pha,

8stiz iz lanh six săngh ah nomz stinb.’

Wâyc nây, stiz max zâyf iz nomz stinb six cungb ah nomz stinb cuungv. 9Wâyc năngđ nâyx, Zâu Tênb-Huungh căpx taih nyăngz munh, bamh munh six max tuz zeb gâyh.” 10Yămz wa pyau njaf wax zanyf, stayb sây buz zef naic Zâu Yê-su nâyx đomc jau. 11Zâu Yê-su coong bux stiz: “laiv lanh queengx nănh nyăngz au bix zef zoz pitc lanh munh, wax tauh munh songđ longđ văngf munh nyăngz stoif cloon nănh nyăngz au. 12Năngđ coong munh nzif, queengx nănh nyăngz langh, zoz pitc lanh munh, nănh songđ zuc longđ văngf munh nyăngz stoif.”

13Naih munh ênz wax đomc munh sây jenz taih phunz Zâu Yê-su oix nongc Nănh tăpx puf ănz stiz, six stayb sây buz yâuc cangđ wax đomc munh. 14Six, phătc năngđ nâyx, Zâu Yê-su numđ nhlenx nzongf songđ coong ănz stiz: “Phanv phunz munh sây taih yaz nây, yâuc năngx gâyf cangđ stiz, wâyc laiv lanh năngđ nâyx đomc munh sây nâyx Zâu Tênb-Huungh nyăngz côkz six săngh stiz nyăngz. 15Yaz coong senz bux nyâuh, laiv lanh max stipx Zâu Tênb-Huungh nyăngz côkz năngđ ah lanh munh sây jenz nâyx, wax tauh munh six senz max tuz nzac yămz wa.” 16Zâu Yê-su songđ jom wax đomc munh sây, tăpx puf ănz stiz, Nănh yâuc poou wac phunz.

17Zâu Yê-su ah yac setb jau ninyh wax zanyf, naih ah lanh munh tiuv taih, songđ quâyc nzac Nănh nyăngz cah đangc ninyh, wax tauh munh naic Zâu Yê-su: “Peengh stimz nyăngz stênx steengb lex, yaz zuc ayx năngđ laix yaz nzăngđ hayh tuz stâyv quâyx nyăngz meengc?” 18Six Zâu Yê-su coong ănz nănh: “Săngh laix mâyh bix hipđ yaz ayx peengh stimz heh? Setb nzuf Zâu Tênb-Huungh ah lanh max naih mănv peengh stimz. 19Mâyh pâyz wax đomc gâyf njanh coong: ‘Năngx gâyf tayx munh, Năngx gâyf văngf munh, năngx gâyf ayx stac, năngx gâyf ayx za zanyx manyf, năngx gâyf nyâuđ huđ jaf munh, oix zuc hâuđ lênh mâyh nyăngz nzif pha.’” 20Six wax tauh munh tauz Zâu Yê-su coong: “Stênx stengb lex, tăng yaz năngx jenz yaz bâyf ayx âyz nâyx đomc muif huungh gâyf nzuf nzof gôh.” 21Six mangc nănh wax zanyf, Zâu Yê-su numđ hâuđ lênh nănh, yâuc bux nănh coong: “Mâyh năngx sămv ah huungđ; oix zuc muf, maic mâyh naih nyăngz muif huungđ, bix ninyh phunz munh zâuđ, mâyh six naih jax dlaih yămz wa Tênb-toongh, bix oix zuc taih nây, lêpc yaz.” 22Six numđ nâyx đomc wac wax tauh munh songđ minb âuz âuz, numđ stauh taux wa muf, wâyc nănh naih jax toongx đuungx nzongf.

23Zâu Yê-su winb mangc wa cah sinh, songđ coong ănz Nănh wax đomc stayb sây: “Naih jax toongx đuungx nyăngz munh nzac Zâu Tênb-Huungh nyăngz côkz senz Zâuđ nzongf!” 24Stayb sây buz numđ nyâyh ganc Zâu Yê-su coong nyăngz wac nzongf, six Zâu Yê-su zef coong ănz stiz, ah hâyđ timb coong: “Sây lex, tuz nzac Zâu Tênb-Huungh nyăngz côkz senz zâuđ nzongf! 25Maf loh plunx quaix stimb bluyc, six năngx hâyđ têx puv quâyx munh nzac Zâu Tênb-Huungh nyăngz côkz.” 26Stayb sây buz senz numđ njingc nzongf, songđ coong ănz Zâu Yê-su: “Năngđ nâyx naih mănv hayh tuz njâuv?” 27Mangc stiz, Zâu Yê-su coong: “Laiv huungđ bamh munh ayx max tuz, six max zâyf Zâu Tênb-Huungh. Wâyc Zâu Tênb-Huungh hayh ayx tuz muif huungđ nzuf.” 28Pi-tê songđ tauz Zâu Yê-su coong: “Stayb pha mangc jađ, buz quanyf nzuf muif huungđ bix taih lêpc mâyh.” 29Zâu Yê-su tauz: “Yaz coong senz bux nyâuh, max naih mănv quanyf pyau, Yâuf pez, ô stayx, nzif pha, sây, nib tâyc wâyc yaz cloon Cuđ Jenx, 30bix max tuz stipx blătc ah pez phănc yămz nâyx zanyf nâyx stâyv: njinh pyau, yâuf pez, ô stayx, nzif, sây, njingh tâyc cloon zuc munh ayx huđ, cloon đangz stâyv nyăngz stâyv quâyx meengc. 31Six naih munh đuungx yămz cah đangc six zuc yămz cah đangz, zef yămz cah đangz nyăngz munh six tuz yămz cah đangc.”

32Stiz jinh đangh jămc jau ninyh Yê-lu-sa-lem wax zanyf, Zâu Yê-su ninyh đangc stiz. Stayb sây buz numđ nyâyh njanc nzongf, năngx naih lêpc stiz đangz ninyh wax đomc munh yâuc numđ cumh nzav. Ênz săpc nyâyc lanh stayb sây ninyh lanyc blătc, Nănh songđ coong bux stiz Nănh cayx zuc pongh nyăngz dlayc, 33coong: “Mangc bex, pănh jinh đangh ninyh tauv Yê-lu-sa-lem, Bamh Munh six zuc jaoz phunz wax đomc stayb munh pyây cloon wax đomc nzaox gâyf nyăngz stênx stengb, stiz six tingc stoif tayx Nănh zef jaoz Nănh phunz đâuf. 34Stiz six pib mađ Nănh, nzuf nzanh ănz Nănh, zoz pya bopc Nănh, zef tayx Nănh, six pôz noib cah đangz Nănh six săngh taih.”

35Sê-bê-đi nyăngz iz lanh toonz Ya-coopc cloon Yô-hanx, taih pongh Zâu Yê-su, songđ coong ănz Nănh: “Stayb pha lex, buz oix nongc buz joođ mâyh toix laiv huungđ mâyh lauf ayx phunz buz.” 36Zâu Yê-su songđ tauz stiz coong: “Nyâuh oix nongc yaz ayx laix phunz nyâuh?” 37Tăng wa stiz songđ tauz Zâu Yê-su coong: “Joođ phunz buz hayh stâyv yămz mâyh nyăngz gwăngz eeng tinc, ah lanh stâyv mâyh nyăngz byaoh phanx ah lanh stâyv mâyh nyăngz staix phanx.” 38Six Zâu Yê-su bux stiz: “Nyâuh max pâyz nyâuh jinh đangh joođ laiv huungđ. Nyâuh hayh hopb tuz yaz hopb wax zan, max six ayx quaix-gâyf năngđ yaz ayx quaix-gâyf nâyx max?” 39Stiz tauz Zâu Yê-su: “Tuz lêc.” Zâu Yê-su zef coong ănz stiz: “Yaz hopb wax zan, nyâuh lauf zuc hopb, yaz ayx quaix-gâyf, nyâuh lauf zuc ayx. 40Six stâyv yămz yaz nyăngz byaoh phanx max six staix phanx max zâyf yaz bênc phunz, six njâuh phunz bênc săngh nyăngz munh.” 41Wa săpc lanh stayb sây numđ nâyx đomc wac songđ numđ nhlenx Ya-coopc cloon Yô-hanx nzongf. 42Zâu Yê-su êu stiz taih, songđ coong ănz stiz: “Nyâuh pâyz tuz coong pitc stingx nyăngz munh tuz bongc cun pec stingx wax đomc, six njic pec stingx, cloon stiz wax đomc ayx quanz lub nyăngz munh yâuc nongc lanyf zâyc nyenh mănh. 43Yămz nyâuh nyăngz cah njaf six max zâyf ayx năngđ nâyx. Laiv lanh oix tuz ayx lub yămz nyâuh nyăngz cah njaf wax tauh six zuc bokc dlic nyâuh, 44yămz nyâuh nyăngz cah njaf laiv lanh oix ayx pyây six zuc ayx nâuh phunz songx munh. 45Wâyc Bamh munh taih six max zâyf nongc phunz munh bokc dlic, six nongc bokc dlic munh yâuc sađ Nănh nyăngz meengc nongc ayx zax suc tayv phunz đuungx lanh munh.”

46Stiz nzac Yê-li-cô dlanyh ninyh, Zâu Yê-su zef cloon Nănh nyăngz stayb sây cloon munh đuungx tăng Yê-li-cô ninyh gâyh wax zanyf, naih ah lanh mâyc buđ munh Ba-ti-mê-atc six Ti-mê-atc nyăngz toonz, stâyv yămz wa jau sinh joođ nhlinc. 47Wâyc pâyz tuz coong wax tauh six Na-sa-leetx munh Zâu Yê-su, nănh songđ hamv coong: “Đa-witx huungh nyăngz Toonz, Zâu Yê-su lex, joođ hâuđ lênh yaz!” 48Munh đuungx mađ nâyx lanh munh êu nănh năngx gâyf nhlaoc, six nănh zef hamv năngx lub têx: “Đa-witx huungh nyăngz sây lex, joođ hâuđ lênh yaz!” 49Zâu Yê-su songđ yămf wa, coong: “Phanv êu nănh taih.” Stiz songđ êu wax tauh mâyc buđ munh, bux nănh coong: “Phanv pungx stimz bex! Nyoongz quef gôh! Stênx stengb êu mâyh.” 50Songđ quanyf nănh nyăngz guyz đao ănz ah phanx, totc têx nyoongz quef, nănh ninyh tauv Zâu Yê-su wa. 51Zâu Yê-su songđ tauz nănh coong: “Mâyh oix nongc yaz ayx laix phunz mâyh?” Tăng wa mâyc buđ munh songđ tauz Nănh coong: “La-bi, joođ phunz yaz mangc tuz phătc.” 52Năngđ nâyx Zâu Yê-su bux nănh coong: “Phanv ninyh gôh. Mâyh nyăngz zen stimz cănh zany mâyh tuz gongx.” Nănh songđ lênh dlih mangc tuz phătc, nănh songđ lêpc Zâu Yê-su jămc jau ninyh.