Dao Ao Dai Literal Text
Ma-cô 11
Stiz ninyh tauv stătx Yê-lu-sa-lem, tauv Bêtc-pha-yi cloon Bê-ta-ni, huungv ninyh wa Ca-lan zoongz, Zâu Yê-su songđ paiđ Nănh nyăngz iz lanh stayb sây ninyh, songđ bux stiz coong: “Oix zuc ninyh nzac nyâuh cah đangc wax tiuh njăngv, ninyh tauv wa wax zanyf, nyâuh six phătc ah tauh maf li jenz pang ănz wa, Max zeengx naih mănv zâyh nănh quaix. Phanv zay pang nănh wax stinz langb bix jinb nănh lauf nây. Năngđ coong naih munh naic nyâuh: ‘Săngh laix nyâuh bix ayx năngđ nâyx?’ six phanv tauz coong: ‘Zâu sămv zuc nongc nâyx tauh maf li Nănh six cănh stungx nâyx tauh maf li phunb đangz lauf.’” Stiz gâyh ninyh songđ phătc ah tauh maf li jenz pang ănz wa jeengh cungh ngwaic wa jau sinh, stiz songđ zay langb phunz maf li. Naih ah phanx munh stâuđ wa naic stiz coong: “Nyâuh iz lanh ayx luungđ bix zay maf li jenz langb heh?” Stiz zef tauz wax đomc munh năngđ Zâu Yê-su bux nâyx, wax đomc munh songđ phunz stiz jinb ninyh. Stiz ênz maf li jenz lauf phunz Zâu Yê-su yâuc zoz stiz nyăngz guyz đao pâub ănz maf li jenz cah tănf, Zâu Yê-su songđ staox ninyh zâyh. Naih munh đuungx pâub stiz nyăngz guyz ănz wa jau, năngx naih ah phanx, zef pâub wax đomc njăngx quah tăng wa jêmh zoz lauf. Njinh wax đomc munh ninyh đangc cloon lêpc đangz wax đomc munh hamv coong:
“Hô-sa-na! Hoopđ zuc canyx bongc tim Zâu nyăngz manyh taih wax tauh.
Senz oonz looc pănh nyăngz claof jex Đa-witx huungh nyăngz côkz six taih!
Hô-sa-na yămz njăngb quaix nyăngz tinc!”
Zâu Yê-su ninyh tauv Yê-lu-sa-lem dlanyh, yâuc nzac bongc Tênb-Huungh nyăngz pyau ninyh, mangc nzêux cah sinh nyăngz muif huungđ, wâyc wax zanyf six nzămc nzof, Nănh cloon săpc nyâyc lanh stayb sây setb ninyh tauv Bê-ta-ni njăngv. Nyâyc noib, Stiz ninyh gâyh Bê-ta-ni njăngv wax zanyf, Zâu Yê-su songđ nyâuđ sab. Tăng năngx yămz côz wax zanyf Nănh phătc ah zâyz bănx tauh njăngx naih noomh đuungx, Nănh ninyh tauv stătx lov jađ tuz phătc naih tix nomz pyâu yămz wa njăngx max. Six ninyh tauv wax zâyz njăngx wax zanyf, Nănh max phătc naih luungđ cungb naih noomh cuungv, wâyc max zeengx tauv bănx tauh zunb. Zâu Yê-su coong ănz wax zâyz njăngx: “Tăng nây staox ninyh six max naih mănv nhlinc mâyh nyăngz pyâu nzof gôh.” Zâu Yê-su nyăngz stayb sây yâuc numđ nâyx đomc wac.
Ninyh tauv Yê-lu-sa-lem wax zanyf, Zâu Yê-su nzac bongc Zâu Tênb-Huungh nyăngz pyau ninyh, songđ luiđ maif maic yămz bongc Zâu Tênb-Huungh nyăngz pyau wax đomc munh setb cungh ngwaic ninyh, Nănh zef njăpc wănc nyanh wax đomc munh nyăngz đah mâyf cloon maic bah côz wax đomc munh nyăngz zom, Nănh max phunz toix laiv lanh nzâyz huv clăngv quaix bongc Zâu Tênb-Huungh nyăngz pyau. Tăng wa Zâu Yê-su nzaox stiz coong: “Max zâyf naih wac ja coong:
‘Yaz nyăngz pyau six hipđ ayx cloo Zâu phunz muif stingx munh nyăngz pyau’ haz?
Six nyâuh ayx nâyx sênz pyau pênx ayx stac munh nyăngz ngamh.”
Wax đomc stayb munh pyây cloon nzaox gâyf stênx stengb numđ năngđ nâyx, stiz songđ lov jau nongc tayx Zâu Yê-su, wâyc stiz cumh nzav Nănh, wâyc songx munh tinyh đoih numđ nyâyc ganc Nănh nzaox nyăngz wac. Tauv nzămc wax zanyf, stiz ninyh gâyh wa dlanyh.
Bah đoomz tonx njâu, pitb quaix wa ninyh, stiz phătc bănx tauh njăngx caođ tăng coonz tauv đuungh. Pi-tê săngx tauv songđ coong ănz Zâu Yê-su: “La-bi, mangc geh! Mâyh zaux lâyc zâyz bănx tauh njăngx njeengh caođ nzof.” Zâu Yê-su tauz stiz zef bux coong: “Oix zuc naih zen stimz yămz Zâu Tênb-Huungh. Yaz coong senz bux nyâuh, laiv lanh coong ănz nâyx nomz zoongz coong: ‘Oix zuc moongz staox taih bix stuyđ nzac coiđ ninyh,’ yămz nănh nyăngz nyâuđ max naih plungh plănb, six zen coong nănh coong nyăngz wac six setb taih, songđ setb taih năngđ nănh coong nyăngz wac nâyx. Wâyc năngđ nâyx, yaz coong bux nyâuh, nyâuh cloo Zâu cloon joođ nyăngz muif huungđ, phanv zen coong nyâuh stipx tuz nzof, wax huungđ nyâuh senz stipx tuz gôh. Nyâuh stâuđ cloo Zâu wax zanyf, năngđ coong nyâuh naih cloon munh tinyh nzeengz, six oix zuc quanyf, nyâuh nyăngz Tênb-toongh Pha yămz wa cah zâyc guungh wax Tauh nzăngđ quanyf phunz nyâuh ayx longđ nyăngz stoif.” (Six năngđ coong nyâuh max quanyf phunz, nyâuh nyăngz Tênb-toongh Pha yămz wa cah zâyc guungh wax Tauh lauf max quanyf phunz nyâuh ayx longđ nyăngz stoif.)
Stiz zef muf tauv wa Yê-lu-sa-lem Zâu Yê-su ninyh nzac bongc Zâu Tênb-Huungh nyăngz pyau wax zanyf, wax đomc stayb munh pyây, cloon wax đomc nzaox gâyf stênx stengb, cloon wax đomc munh côx taih Zâu Yê-su wa. Stiz coong ănz Nănh: “Wâyc laiv huungđ lokc jangx Mâyh bix ayx wax đomc dlayc max six mănv jaoz phunz Mâyh nâyx đomc lokc jangx Mâyh bix hayh ayx wax huungđ dlayc?” Six Zâu Yê-su tauz stiz coong: “Ha yaz lauf naic nyâuh ah zâux, phanv tauz Yaz, yaz songđ coong bux nyâuh wâyc laiv huungđ lokc jangx yaz bix ayx wax đomc dlayc. Yô-hanx ayx nyăngz quaix-gâyf six tăng guungh max six tăng bamh munh? Phanv tauz yaz.” Stiz lanh naic lanh coong: “(Pănh cayx coong ayx laix?) Pănh năngđ coong: ‘Tăng guungh’, Nănh six coong: ‘Ha, wâyc săngh laix nyâuh bix max zen Yô-hanx?’ Six, pănh năngđ coong: ‘Tăng bamh munh,’ …?” (Nănh stiz cumh nzav songx munh, Wâyc muif lanh munh yâuc zen coong Yô-hanx six senz ah lanh tâuc wac munh.) Tauz Zâu Yê-su wax zanyf, stiz coong: “Buz max pâyz.” Zâu Yê-su coong ănz stiz: “Ha yaz lauf max coong bux nyâuh tăng laiv huungđ lokc jangx yaz bix ayx wax đomc dlayc.”
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.