Skip to content
BibleKenya

Dao Ao Dai Literal Text

Lu-ca 19

Nănh clăngv nzac, Yê-li-cô dlanyh cah njaf ninyh. Six phanv mangc naih ah lanh munh bux hipđ ayx Săk-cêt, nănh six ayx pyây yămz wax đomc sâub sôiv munh, nănh yâuc puv quâyx nzongf. Nănh lov jau oix mangc jađ mănv six Zâu Yê-su, six munh hongđ nzongf nănh max hayh mangc tuz phătc, wâyc nănh six munh hav. Nănh songđ tiuv ninyh đangc, lekb staox ah zâyz tah pungđ njăngx ninyh, phunz nănh hayh mangc tuz phătc Zâu Yê-su, wâyc Zâu Yê-su lauf cayx pitb quaix nănh wax stinz jau muf. Tauv Zâu Yê-su ninyh tauv wax cuyb tinc, songđ zaub minb mangc, Zâu Yê-su songđ coong ănz nănh: “Săk-cêt lex, coonx nzac taih gôh, wâyc yaz nâyx noib cayx yămz mâyh nyăngz pyau.” Tăng wa nănh songđ coonx lootb nzac taih yâuc numđ nyađ stipx Zâu Yê-su. Phătc ayx nâyx, songx munh songđ yônx coong: “Lâyc tauh munh bix ninyh nzac naih stoif munh nyăngz pyau.” Six Săk-cêt stâuđ yămz Zâu nyăngz cah đangh, yâuc coong: “Zâu lex, mangc bex, yaz naih nyăngz muif huungđ yaz six tanb ah po phunz munh zâuđ munh, nzof năngđ coong yaz ayx peo zuc mănv stâyb laiv huungđ ah phătc, yaz cănh clăpb pyâyz phătc phunz stiz.” Wax zanyf Zâu Yê-su coong ănz nănh: “Nây noib njâuv pôz taih tauv nâyx sênz pyau, wâyc nâyx tauh munh six lauf Apx-la-ham nyăngz sây stunz. Wâyc Bamh Munh taih six nongc lov njâuv ninyh gaih nyăngz munh.”

Stiz jinh đangh mungv nâyx đomc wac, Zâu Yê-su songđ coong ah cuyb wac pây, wâyc stiz yămz stătx Yê-lu-sa-lem dlanyh, nzof stiz yâuc nyâyh coong Zâu Tênb-Huungh nyăngz côkz bâyf cayx taih tauv. Wâyc nây, Nănh lănv coong: “Naih ah lanh ayx quanz munh ninyh stâyz phangz côz nongc stipx lanyf ayx huungh tuz, nănh songđ phunz đangz lauf. Songđ êu săpc lanh pâuz taih, nănh jaoz phunz stiz săpc nomz nyanh, yâuc bux stiz coong: ‘Oix zuc nzâyz ninyh ayx gâyc năngx tauv yaz lauf.’ Six nănh nyăngz pec stingx hănđ nănh, yâuc paiđ munh lêpc nănh đangz ninyh coong: ‘buz max oix nongc nâyx tauh munh ayx huungh cun buz.’ Six nănh stipx lanyf ayx huungh tuz, songđ phunb đangz lauf, nănh êu nănh jaoz nyanh phunz wax đomc pâuz taih pongh nănh, nănh songđ naic jađ stiz ayx gâyc tuz buc laiv. Tăng wa, zetx tauh pâuz staox taih coong: ‘Zâu lex, mâyh phunz yaz nyăngz nyanh yaz ayx gâyc tuz săpc nomz nyanh.’ Zâu coong ănz wax tauh pâuz: ‘Mâyh nyâuđ zanyx nyăngz pâuz, gongx gôh. Wâyc mâyh ayx tuz zanyx yămz cumh pâuz jenz, wâyc nây mâyh six tuz cun săpc nomz dlanyh.’ Tah nyâyc lanh zef staox taih coong: ‘Zâu lex, mâyh nyăngz nyanh, yaz ninyh ayx gâyc tuz pyaz nomz nyanh.’ Zâu songđ zef coong ănz nănh: ‘Mâyh bix cun pyaz nomz dlanyh.’ Ah lanh timb zef taih coong: ‘Zâu lex, phanv mangc mâyh nyăngz nyanh, yaz nongc tungh minb pêuz zaub ănz nây, wâyc yaz cumh nzav mâyh, phătc mâyh hayh stekx yongb. Mâyh hayh zoz yămz mâyh max tăpx nyăngz tinc, yâuc sâub yămz mâyh max songx nyăngz tinc.’ Zâu coong ănz nănh: ‘Păngc mâyh coong nyăngz wac, yaz six tingc mâyh nyăngz stoif, mâyh nyâuđ max zanyx nyăngz pâuz. Mâyh pâyz coong yaz six munh hayh stekx luungđ yongb, zoz yămz yaz max tăpx nyăngz tinc, yâuc sâub yămz yaz max songx nyăngz tinc. Năngđ nâyx, săngh laix mâyh bix max nzâyz yaz nyăngz nyanh ninyh ănz wa nyanh njămf, phunz tauv yaz laiv zanyf lauf, yaz six sâub tuz nyanh laix căn nyanh coonz?’ Tăng wa nănh coong ănz sâuđ yămz wa nyăngz munh: ‘Ninyh zoz nănh nyăngz nyanh bix ninyh phunz naih săpc nomz wax tauh.’ Stiz coong ănz nănh: ‘Zâu lex, nănh cănh naih săpc nomz nzof.’ ‘Yaz coong phunz nyâuh pâyz, laiv lanh naih six tuz phunz pâu, six laiv lanh max naih six njinh stiz naih nyăngz yâuc zuc zoz ninyh. Six năngx naih yaz wax đomc yônz zaz, max oix nongc yaz ayx huungh cun stiz wax đomc, ênz stiz taih nây bix toongx yaz nây cah đangc tayx stiz.’”

Coong wax đomc wac tuz, Nănh songđ zef huungv ninyh wa Yê-lu-sa-lem.

Nănh ninyh cayx tauv Bêtc-pha-yi, cloon Bê-ta-ni njăngv, tauv wa hipđ ayx Ca-lan zoongz, Nănh songđ paiđ iz lanh stayb sây ninyh, bux coong: “Phanv ninyh nzac lâyc cah đangc tiuh njăngv ninyh, nyâuh nzac ninyh cănh phătc ah tauh maf li jenz pang ănz wa, wax tauh maf li max zeengx naih mănv zâyh quaix. Phanv zay nănh nyăngz langb bix ênz taih nây. Năngđ coong naih tix lanh munh naic nyâuh coong: ‘săngh laix bix zay nănh heh?’ Nyâuh bix tauz coong: ‘Zâu sămv zuc nongc nănh.’” Năngđ nâyx, tauv stiz iz lanh tuz paiđ ninyh, yâuc phătc muif huungđ cayx năngđ Zâu Yê-su bux stiz nâyx. Stiz zay maf li langb wax zanyf, maf li nyăngz zâu naic stiz coong: “Săngh laix nyâuh bix zay maf li jenz heh?” Stiz tauz coong: “Zâu sămv zuc nongc nănh.” Tăng wa stiz songđ jinb nănh lauf phunz Zâu Yê-su, yâuc zoz stiz nyăngz guyz đao pâub maf li cah zâyc songđ phunz Zâu Yê-su zâyh nănh. Zâu Yê-su jinh đangh ninyh wax zanyf, munh tinyh đoih zoz stiz nyăngz guyz đao pâub ănz wa jau. Nănh ninyh tauv wa Ca-lan zoongz wax zanyf, lomc wax peob stayb sây buz hongđ songđ hamv nyađ, yâuc songc stingb tanv Zâu Tênb-Huungh wâyc stiz tuz phătc wax đomc muif huungđ jix caox njingc nyăngz jab, songđ coong: “Tanv yămz Zâu nyăngz manyh taih wax Tauh! Cah zâyc guungh naih peengh oonz, yâuc naih gwăngz eeng yămz njăngb quaix nyăngz tinc!” Naih ah đomc Pha-li-si munh tăng wax peob munh hongđ taih coong ănz Zâu Yê-su: “Stênx steengb lex, joođ mađ mâyh nyăngz stayb sây buz.” Zâu Yê-su tauz ănz stiz coong: “Yaz coong bux nyâuh, năngđ coong stiz max nyaoc, nâyx đomc njăuz six hamv stingb lub staox taih.”

Nănh ninyh tauv stătx, phătc wax nomz dlanyh, Nănh songđ haoh phunz wax nomz dlanyh, yâuc coong: “Tuz mungc mâyh pâyz tuz yămz nâyx yenh noib, senz six mâyh hoopđ zuc pâyz, laiv huungđ nzâyz peengh oonz taih! Six nâyx đomc, yâuc zuc pinyx max phunz mâyh nyăngz mâyc phătc. Wâyc naih ah noib mâyh six zuc pongh nâyx đomc, mâyh nyăngz yônz zaz six taih witz cotb quib nzêux mâyh nzuf, stiz songđ yămz quib nzêux mâyh, yâuc tăng muif phangz taih bopc mâyh. Stiz six bopc mâyh cloon mâyh nyăngz munh yămz mâyh cah njaf wax đomc. Stiz six max njâuh phunz laiv nomz njăuz năngx tăpx clăpb ănz ah nomz njăuz yămz mâyh lâyc, wâyc zuc mâyh max pâyz tuz Zâu taih lov mâyh nyăngz săngx huđ.”

Tauv Nănh nzac bongc Zâu Tênb-Huungh nyăngz pyau njaf ninyh, Nănh songđ luiđ nzuf wax đomc yămz wa maif maic nyăngz munh, yâuc coong ănz stiz: “Naih wac ja coong: ‘Yaz nyăngz pyau six nongc cloo Zâu nyăngz pyau,’ six nyâuh yâuc ayx phunz nănh pênx ‘stac joomh.’”

Muif noib Nănh yămz bongc Zâu Tênb-Huungh nyăngz pyau nzaox gâyf. Six wax đomc stayb munh cloon wax đomc nzaox gâyf stênx steengb cloon ayx côx cun nyenh mănh wax đomc, yâuc jinh đangh lov jau tayx Nănh, Stiz lauf max zeengx lov tuz jau phunz stiz nongc zoz Nănh, wâyc songx munh tinyh đoih njinh luh mungv Nănh.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.