Skip to content
BibleKenya

Dao Ao Dai Literal Text

Yô-hanx 9

Jinh đangh ninyh jau wax zanyf, Zâu Yê-su phătc ah lanh munh tăng steengb stâyv taih bix mâyc buđ. Zâu Yê-su wax đomc stayb sây naic Nănh coong: “La-bi lex, mănv ayx longđ stoif, nănh max six nănh nyăngz nzif pha, bix ayx phunz nănh tăng steengb taih bix mâyc buđ heh?” Zâu Yê-su tauz: “Max zâyf nănh, yâuc max zâyf nănh nyăngz nzif pha longđ stoif đêh, six wâyc phunz Zâu Tênb-Huungh nyăngz cumh pâuz tuz ayx săngh yămz nănh setb taih. Nây six năngx jinh bah noib zax, pănh six oix zuc ayx paiđ yaz taih wax Tauh nyăngz cumh pâuz. Tauv nzămc, six max naih mănv hayh ayx tuz cumh pâuz. Yaz năngx jinh yămz nây bamh canz, yaz six bamh canz nyăngz gwăngz.” Coong nâyx đomc wac tuz, Nănh nzuv nzanh nzac nib ninyh, zoz nzanh womz nyuih pênx pamc, yâuc zoz wax cuib pamc hâuh ănz wax tauh mâyc buđ munh nyăngz mâyc. Zâu Yê-su songđ bux nănh coong: “Phanv ninyh wa, Si-lô-am glangh đaox” (Si-lô-am âyz gâyf six “Tuz Paiđ Ninyh”). Tăng wa, nănh songđ ninyh đaox mâyc, songđ mangc tuz phătc, yâuc phunb đangz lauf. Six, wax đomc njăngv njaf munh cloon cah đangc phătc nănh joođ nhlinc wax đomc munh, stiz coong: “Lâyc tauh munh max zâyf njinh leox stâyv wa joođ nhlinc wax tauh haz?” Naih ah phanx coong: “Zâyf nănh gôh.” Naih ah phanx zef coong: “Max zâyf đêh, six, wax tauh senz năngđ lâyc tauh.” Nănh yâuc njinh luh coong: “Zâyf yaz gôh.” Tăng wa stiz naic nănh coong: “Ayx laix mâyh nyăngz mâyc bix mangc tuz phătc heh?” Nănh tauz: “Naih ah lanh munh bux hipđ ayx Yê-su nyuih pamc hâuh ănz yaz nyăngz mâyc, yâuc bux yaz coong: ‘Phanv ninyh tauv wa Si-lô-am đaox.’ Tăng wa, ninyh đaox tuz, yaz bix mangc tuz phătc.” Stiz naic nănh coong: “Wax tauh munh yămz laiv heh?” Nănh tauz: “Yaz max pâyz.”

Stiz ênz cah đangc mâyc buđ wax lanh munh, ninyh pongh wax đomc Pha-li-si munh. (Zâu Yê-su nyuih pamc coib nănh nyăngz mâyc wax noib six toix tingc congz noib.) Tăng wa, wax đomc Pha-li-si munh zef lauf naic nănh ayx laix mâyh bix mangc tuz phătc. Nănh songđ tauz stiz coong: “Wax tauh munh hâuh pamc ănz yaz nyăngz mâyc, yaz songđ ninyh đaox bix mangc tuz phătc.” Tăng wa, wax đomc Pha-li-si munh naih ah phanx coong: “Lâyc tauh munh max zâyf Zâu Tênb-Huungh nyăngz munh, wâyc nănh max âyz tingc congz noib nyăngz gâyf ayx.” Naih ah phanx zef coong: “Ah lanh naih stoif nyăngz munh, laiv hayh ayx nâyx đomc jix caox njingc năngđ nâyx heh?” Tăng wa stiz songđ naih phunz goib. Tăng wa stiz zef naic mâyc buđ munh ah hâyđ timb, coong: “Tăng nănh coib tuz mâyh nyăngz mâyc, mâyh coong nănh six mănv?” Tăng wa, nănh tauz coong: “Nănh six ah tauh tâuc wac munh.” Six, Yu-tai munh max zen coong nănh cah đangc mâyc buđ, bix nâyx zanyf zef mangc tuz phătc, ayx tuz tauv stiz êu mâyc buđ munh nyăngz nzif pha taih. Stiz naic nănh nyăngz nzif pha coong: “Nâyx tauh zâyf nyâuh nyăngz toonz max, nyâuh coong nănh tăng steengb taih bix mâyc buđ? Ha ayx laix nâyx zanyf nănh bix mangc tuz phătc?” Tăng wa nănh nyăngz nzif pha tauz ănz stiz coong: “Buz pâyz tuz coong nâyx tauh six senz buz nyăngz toonz, nănh tăng steengb taih bix mâyc buđ nzof. Six nâyx zanyf, ayx laix nănh bix mangc tuz phătc, buz max pâyz, buz lauf max pâyz, mănv coib nănh nyăngz mâyc. Nănh lub nzof; phanv naic nănh. Nănh cănh coong phunz.” Nănh nyăngz nzif pha coong ayx năngđ nâyx six wâyc stiz cumh nzav Yu-tai munh. Wâyc Yu-tai munh coong, năngđ coong laiv lanh nhlimc Nănh six Zâu Jix-Tuz, wax tauh six zuc luiđ setb huyđ toongh ninyh. Wâyc năngđ nâyx, nănh nyăngz nzif pha nzăngđ coong: “Nănh lub nzof, phanv naic nănh.” Stiz êu cah đangc mâyc buđ wax lanh munh taih tah nyâyc hâyđ yâuc bux nănh coong: “Oix zuc tanv Zâu Tênb-Huungh. Buz pâyz coong wax tauh munh six ah lanh stoif munh.” Nănh songđ tauz coong: “Wax tauh munh naih stoif max naih, yaz max pâyz. Yaz cungb pâyz ah huungđ cuungv, wax huungđ six yaz mâyc bux, bix nâyx zanyf yaz mangc tuz phătc.” Blătc wa, stiz naic nănh coong: “Wax tauh munh ayx laix ănz mâyh heh? Nănh coib mâyh nyăngz mâyc ayx laix?” Nănh tauz stiz: “Yaz lănv bux nyâuh nzec, six nyâuh max mungv! Săngh laix nyâuh zef oix mungv timb heh? Ha nyâuh lauf oix săngh nănh nyăngz stayb sây mah?” Stiz songđ mađ nănh coong: “Mâyh six wax tauh ya nyăngz stayb sây gôh, buz six Mô-sê nyăngz stayb sây. Buz pâyz coong Zâu Tênb-Huungh coong bux Mô-sê, six nâyx lanh munh, buz max pâyz nănh tăng laiv tix taih.” Wax tauh munh tauz ănz stiz coong: “Nây nzăngđ zâyf numđ njingc nef, nănh coib tuz yaz nyăngz mâyc nyâuh bix lauf max pâyz coong nănh tăng laiv tix taih. Pănh pâyz tuz coong Zâu Tênb-Huungh six max mungv stoif munh nyăngz wac, six năngđ coong naih laiv lanh naih nyâuđ zanyb yâuc âyz nănh nyăngz âyx ayx, Nănh six mungv wax lanh. Tăng lôx noib, max zeengx tuz numđ coong quaix, naih laiv lanh munh hayh zany tuz tăng steengb taih bix mâyc buđ nyăngz munh. Năngđ coong nâyx lanh munh max zâyf tăng Zâu Tênb-Huungh taih, nănh six max hayh ayx tuz laiv huungđ cumh pâuz.” Stiz tauz nănh coong: “Mâyh tăng steengb taih bix naih stoif mâyh bix zef năngx nzaox buz naz?” Tăng wa stiz songđ luiđ nănh setb ninyh.

Zâu Yê-su numđ coong stiz luiđ nănh setb cungh ngwaic ninyh Zâu Yê-su songđ ninyh lov pongh nănh, yâuc coong: “Mâyh zen Bamh Munh max?” Nănh songđ tauz coong: “Zâu lex, wax tauh munh six mănv heh, phunz yaz nzăngđ hayh zen nănh?” Zâu Yê-su tauz nănh: “Mâyh tuz phătc nănh nzof, wax Tauh six nâyx zanyf cloon mâyh coong wac nây geh.” Wax zanyf, nănh coong: “Zâu lex, yaz zen lêc,” nănh songđ quâyc nzac paix Zâu Yê-su. Zâu Yê-su coong: “Yaz nzac nâyx nomz bamh canz taih six wâyc stămđ stoif, phunz mâyc buđ nyăngz munh hayh mangc tuz phătc, zef mangc tuz phătc nyăngz munh yâuc pênx mâyc buđ munh.” Naih ah đomc Pha-li-si munh cloon Zâu Yê-su yămz wa, stiz numđ wax đomc wac, songđ naic Nănh: “Ha buz bix lauf mâyc buđ naz?” Zâu Yê-su coong ănz stiz: “Năngđ coong nyâuh mâyc buđ nyâuh six max naih stoif, six nâyx zanyf nyâuh coong: ‘Buz mangc tuz phătc.’ Wâyc nây, nyâuh lauf năngx jinh naih stoif.”

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.