Yô-hanx 10

1“Yaz coong senz bux nyâuh, laiv lanh max quaix jeengh nzac pax jiz yuungh gôh ninyh, bix lekb quaix pitc đoif nzac, wax tauh six ayx stac nimc nyăngz munh. 2Six tăng jeengh nzac ninyh wax tauh nzăngđ zâyf jămđ pax jiz yuungh nyăngz munh. 3Zu jeengh munh coib jeengh phunz nănh, pax jiz yuungh yâuc mungv jămđ nyăngz munh nyăngz stingb, nzof jămđ nyăngz munh yâuc âyz nănh nyăngz pax jiz yuungh nyăngz bux saox songđ ênz stiz setb cungh ngwaic ninyh. 4Tauv jămđ nyăngz munh ênz nănh nyăngz pax jiz yuungh setb taih nzuf, nănh ninyh đangc stiz, pax jiz yuungh six lêpc nănh đangz ninyh, wâyc pax jiz yuungh saz tuz nănh nyăngz stingb. 5Pax jiz yuungh six senz max ninyh lêpc munh njingc, stiz songđ lov jau tiuv, wâyc stiz max saz tuz munh njingc nyăngz stingb.” 6Zâu Yê-su coong nâyx đomc wac pây ănz stiz, six stiz max saz tuz Nănh coong laiv luungđ ănz stiz.

7Tăng wa, Zâu Yê-su zef coong ănz stiz: “Yaz coong senz bux nyâuh yaz six pax jiz yuungh nyăngz jeengh. 8Taih đangc yaz wax đomc muif lanh munh six ayx stac nimc nyăngz munh six pax jiz yuungh yâuc max mungv nănh stiz. 9Yaz six jeengh. Năngđ coong laiv lanh quaix yaz nzac ninyh, wax tauh munh six tuz njâuv, nzof wax lanh six tuz nzac ninyh, nzac lauf yâuc lov tuz pongh mađ meengz đungc. 10Stac munh six max taih năngđ coong max zâyf nongc nimc, tayx, mêtc. Yaz taih six phunz pax jiz yuungh tuz naih săngh mengc yâuc tuz clăkx clunh nzuf. 11Yaz six jămđ pax jiz yuungh gongx nyăngz munh. Jămđ pax jiz yuungh gongx nyăngz munh cănh nyunc sađ nănh nyăngz mengc wâyc pax jiz yuungh. 12Câux jămđ nyăngz munh, wâyc zuc max zâyf jămđ nyăngz munh, pax jiz yuungh lauf max zâyf nănh nyăngz, nănh phătc njaf clô taih songđ quanyf pax jiz yuungh tiuv, njaf clô songđ zoomf zoz pax jiz yuungh yâuc ayx phunz đanv nzuf, 13wâyc nănh six cungb câux jămđ nyăngz munh, nănh six max numđ stauh tauv pax jiz yuungh. 14Yaz six jămđ gongx nyăngz munh, yaz saz yaz nyăngz pax jiz yuungh, nzof yaz nyăngz pax jiz yuungh yâuc saz yaz, 15năngđ Tênb-toongh Pha pâyz yaz, yaz lauf pâyz Tênb-toongh Pha; yaz songđ nyunc sađ yaz nyăngz mengc wâyc pax jiz yuungh. 16Yaz năngx naih ah đomc pax jiz yuungh six max yămz nâyx nomz gôh. Yaz zuc ênz stiz lauf, stiz six mungv yaz nyăngz stingb, songđ săngh ah peob cuungv, cloon ah lanh munh jămđ cuungv. 17Wâyc nây, Tênb-toongh Pha stăngz yaz, six wâyc yaz sađ yaz nyăngz mengc tayc, phunz yaz hayh tuz mengc lauf. 18Max naih mănv zoz yaz nyăngz mengc ninyh gâyh yaz, six wâyc, yaz cănh nyunc sađ yaz nyăngz mengc tayc. Yaz naih gâyf sađ yaz cănh nyăngz mengc, yaz yâuc naih gâyf zoz mengc lauf. Yaz tuz stipx nâyx đomc lanyf six tăng yaz nyăngz Pha taih.”

19Wâyc wax đomc wac, wax đomc Yu-tai munh songđ naih phunz goib. 20Wax zanyf, yămz nănh stiz wa naih đuungx lanh munh coong: “Lâyc tauh munh zuc manđ nzac yămz stinb yâuc max sting. Săngh laix nyâuh bix năngx mungv nănh heh?” 21Naih ah phanx coong: “Nâyx đomc wac max zâyf munh zuc manđ yămz stinb nyăngz wac. Ha manđ bix hayh coib mâyc buđ munh nyăngz mâyc naz?”

22Wax zanyf yămz wa Yê-lu-sa-lem naih Nzac Bongc Zâu Tênb-Huungh Nyăngz Săngb Pyau Stêtz. Wax zanyf six toix guungh song, 23Zâu Yê-su yăngh wa bongc Zâu Tênb-Huungh nyăngz pyau, yămz Sa-lô-môn nyăngz tungh sec tinc. 24Tăng wa, wax đomc Yu-tai munh quib nzêuh Nănh nzuf, stiz yâuc coong ănz Nănh: “Mâyh cayx ayx phunz buz nyăngz nyâuđ lunc tauv laiv zanyf heh? Năngđ coong mâyh six Zâu Jix-Tuz, oix zuc toongx songx coong zac bux buz.” 25Zâu Yê-su tauz stiz coong: “Yaz bux ănz nyâuh nzof six nyâuh yâuc max zen. Yaz yămz yaz nyăngz Pha nyăngz manyh ayx wax đomc cumh pâuz, wax đomc cumh pâuz six ayx zanyx manyf phunz yaz. 26Nyâuh max zen six wâyc nyâuh max zâyf yaz nyăngz pax jiz yuungh. 27Yaz nyăngz pax jiz yuungh cănh mungv yaz nyăngz stingb, six yaz lauf pâyz nănh stiz, nănh stiz yâuc lêpc yaz. 28Yaz yâuc sađ phunz nănh stiz naih stâyv quâyx nyăngz mengc, nănh stiz six stâyv quâyx max zuc tayc, yâuc max naih mănv hayh nimc tuz wax đomc pax jiz yuungh gâyh yaz nyăngz puf ninyh. 29Yaz nyăngz Pha, six jaoz nănh stiz phunz yaz wax Tauh, Nănh six năngx lub quaix muif huungđ, yâuc max naih mănv hayh nimc tuz nănh stiz gâyh Pha nyăngz puf. 30Yaz căn Pha six ah tauh.” 31Wax đomc Yu-tai munh zef zoz njauz cayx ôx Nănh. 32Zâu Yê-su tauz stiz coong: “Yaz tăng Pha ayx đuungx huungđ cumh pâuz gongx phunz nyâuh phătc. Nyâuh wâyc yaz ayx nyăngz laiv huungđ cumh pâuz bix cayx ôx yaz heh?” 33Wax đomc Yu-tai munh tauz Nănh: “Buz ôx mâyh max zâyf wâyc laiv huungđ cumh pâuz gongx, six wâyc pamf nyăngz stoif, yâuc wâyc mâyh, six ah lanh bamh munh, bix cănh nhlimc coong mâyh six Zâu Tênb-Huungh.” 34Zâu Yê-su tauz stiz coong: “Yămz nyâuh nyăngz gâyf njanh, max zâyf naih wac ja coong: ‘Yaz coong: “Nyâuh six stinz”’ nâyx haz? 35Năngđ coong Zâu Tênb-Huungh hipđ, tuz Nănh nyăngz wac coong tauv wax đomc munh, six stinz (nzof Canyx Stâub yâuc max coi wănc), 36ha săngh laix nyâuh coong ănz Zâu Tênb-Huungh cănh lanyc paiđ nzac bamh canz taih wax Tauh coong: ‘Mâyh coong pamf,’ wâyc yaz coong: ‘Yaz six Zâu Tênb-Huungh nyăngz Toonz’? 37Năngđ coong yaz max ayx yaz nyăngz Pha nyăngz cumh pâuz, six năngx gâyf zen yaz. 38Six năngđ coong yaz jinh đangh ayx, nyâuh hănđ max zen yaz, yâuc oix zuc zen wax đomc cumh pâuz, phunz nyâuh hayh pâyz yâuc saz tuz coong Tênb-toongh Pha yămz yaz cah njaf, yaz yâuc yămz Tênb-toongh Pha cah njaf.” 39Wâyc nây, stiz zef lov jau zoz Zâu Yê-su, six Nănh tiuv gâyh stiz nyăngz puf đi.

40Zâu Yê-su zef phunb đangz muf wax nganđ leepb Njoh-đen wăngx, muf tauv cah đangc Yô-hanx ayx quaix-gâyf wax cuyb tinc Nănh songđ yămz wa. 41Naih munh đuungx taih pongh Nănh, stiz songđ coong: “Yô-hanx manyf max ayx laiv huungđ jix caox njingc, six Yô-hanx coong tauv nâyx lanh munh nyăngz jau senz toix nzongf.” 42Yămz wa yâuc, naih munh đuungx zen Zâu Yê-su.