Yô-hanx 11

1Wax zanyf, naih ah lanh munh săngh gumc, bux hipđ ayx La-sa-latx yămz Bê-ta-ni njăngv, six Ma-li-ya cloon nănh nyăngz ô Ma-ta yămz wax tiuh njăngv. 2Ma-li-ya six hâuh yâuh đangz phunz Zâu zef nongc nănh nyăngz pyây đongz stotb Zâu Yê-su nyăngz staux wax tauh, nănh nyăngz nauf six La-sa-latx jinh đangh săngh gumc. 3Tăng wa, stiz iz ô stayx êu munh stăngc pungx wac ninyh tauv Zâu Yê-su coong: “Zâu lex, phanv mangc, Mâyh stăngz wax tauh jinh đangh săngh gumc.” 4Zâu Yê-su numđ nâyx đomc wac, songđ coong: “Nâyx tauh gumc six max tayc tuz đêh, six, wâyc Zâu Tênb-Huungh nyăngz gwăngz eeng, yâuc phunz Zâu Tênb-Huungh nyăngz Toonz păngc nây tuz munh zanyb.” 5(Zâu Yê-su hâuđ lênh Ma-ta, nănh nyăngz stayx, cloon La-sa-latx nzongf.) 6Wâyc nâyx, Zâu Yê-su numđ coong La-sa-latx jinh đangh săngh gumc, Nănh zef năngx yămz nănh wax cuib tinc iz noib timb. 7Tăng wa, Zâu Yê-su coong ănz wax đomc stayb sây: “Pănh oix zuc phunb đangz muf wa Yu-đê stâyz phangz timb.” 8Stayb sây buz tauz Nănh coong: “La-bi lex, nâyx zanyf Yu-tai munh jinh đangh lov mâyh ôx, săngh laix mâyh bix zef năngx phunb đangz muf wa heh?” 9Zâu Yê-su tauz: “Bah noib zax max zâyf naih săpc nyâyc săngx huđ haz? Năngđ coong laiv lanh bah noib zax yăngh jau wax lanh six max glinyf, wâyc nănh phătc nâyx nomz bamh canz nyăngz gwăngz. 10Six năngđ coong laiv lanh njinh nzămc yăngh jau, wax lanh six glinyf, wâyc max naih gwăngz siux nănh.” 11Nănh coong ayx nâyx, tuz, Nănh zef bux stiz: “La-sa-latx, pănh nyăngz lah pyeoz toic, phâyx mâyc njoomh nzof, six yaz ninyh nongc êu nănh điub.” 12Tăng wa, stayb sây buz tauz Nănh: “Zâu lex, năngđ coong nănh mâyc njoomh, nănh six cănh gongx.” 13(Wax zanyf, Zâu Yê-su six coong tauv La-sa-latx tayc, six stayb sây buz nyâyh coong Nănh coong tauv phâyx mâyc njoomh hitb conv.) 14Tăng wa, Zâu Yê-su songđ coong zac bux stiz: “La-sa-latx tayc nzof. 15Yaz numđ nyađ wâyc phunz nyâuh tuz gongx, wâyc yaz max naih minb yămz wa, phunz nyâuh nzăngđ hayh zen. Six, pănh oix zuc ninyh tauv nănh wa.” 16Tăng wa, Tô-matx, yâuc hipđ ayx Sây Toix, coong ănz lêpc Zâu Yê-su wax đomc stayb sây: “Pănh lauf hoopđ zuc ninyh phunz pănh nzăngđ hayh cloon Nănh songc tayc.”

17Tăng wa, ninyh tauv tinc wax zanyf, Zâu Yê-su phătc La-sa-latx zuc plopx ănz wa stâu pyâyz noib nzof. 18Bê-ta-ni njăngv yămz gâyh Yê-lu-sa-lem, cox pôz gâyf. 19Wax đomc Yu-tai munh naih munh đuungx taih Ma-ta cloon Ma-li-ya wa nongc oonz stiz iz ô stayx nyăngz nyâuđ wâyc stiz nyăngz nauf tayc. 20Tăng wa, Ma-ta numđ coong Zâu Yê-su taih, nănh songđ ninyh stipx Zâu Yê-su, six Ma-li-ya stâyv yămz wa pyau. 21Wax zanyf, Ma-ta coong ănz Zâu Yê-su: “Zâu lex, năngđ coong Mâyh yămz nây, yaz nyăngz nauf six max tayc. 22Six, nâyx zanyf, yaz pâyz tuz coong Mâyh joođ Zâu Tênb-Huungh toix laiv huungđ, Zâu Tênb-Huungh six sađ phunz Mâyh.” 23Zâu Yê-su coong ănz nănh: “Mâyh nyăngz nauf six tuz săngh taih.” 24Ma-ta tauz Zâu Yê-su coong: “Yaz pâyz tuz coong tauv stêtb mâyv noib, songx munh tuz săngh taih wax zanyf, yaz nyăngz nauf six lauf tuz săngh taih.” 25Zâu Yê-su coong bux nănh: “Yaz six săngh taih nyăngz săngh mengc; laiv lanh zen yaz, nănh hănđ tayc lauf tuz săngh; 26laiv lanh năngx săngh bix zen yaz wax lanh six stâyv quâyx max hayh tayc. Mâyh zen nâyx đomc max?” 27Nănh tauz Zâu Yê-su coong: “Zâu lex, yaz zen lêc, yaz zen coong Mâyh six Zâu Jix-Tuz, Zâu Tênb-Huungh nyăngz Toonz, yâuc zuc taih yămz nây bamh canz wax Tauh.” 28Coong năngđ nâyx tuz, nănh phunb đangz muf lanyc êu Ma-li-ya, nănh nyăngz stayx, coong: “Stayb pha yămz nây nzof Nănh êu mâyh.” 29Ma-li-ya numđ coong năngđ nâyx, nănh songđ coonx nyoongz quef ninyh Zâu Yê-su wa. 30Wax zanyf, Zâu Yê-su max zeengx nzac njăngv lauf năngx jinh yămz Ma-ta pongh Nănh wax cuib tinc. 31Wax zanyf, wax đomc Yu-tai munh, six cloon nănh yămz wa pyau oonz nănh nyăngz nyâuđ wax đomc, phătc Ma-li-ya coonx nyoongz quef setb cungh ngwaic ninyh, songđ lêpc nănh ninyh, nyâyh coong nănh ninyh wa stâu haoh. 32Tăng wa, Ma-li-ya ninyh tauv Zâu Yê-su yămf nyăngz tinc, ah phătc Zâu Yê-su wax zanyf, nănh songđ quâyc nzac Zâu Yê-su nyăngz staux ninyh, coong ănz Nănh: “Zâu lex, Mâyh năngđ coong yămz nây, yaz nyăngz nauf six max tayc.” 33Năngđ nâyx, Zâu Yê-su phătc nănh haoh, hănđ lêpc nănh ninyh wax đomc Yu-tai munh lauf haoh, Zâu Yê-su senz numđ munz tauv Nănh nyăngz stimz nyâuđ. 34Zâu Yê-su naic: “Nyâuh plopx nănh ănz laiv tix heh?” Stiz tauz Nănh coong: “Zâu lex, joođ ninyh mangc.” 35Zâu Yê-su haoh. 36Wâyc nâyx, wax đomc Yu-tai munh coong: “Phanv mangc, nănh stăngz lâyc tauh munh tuz nâyx!” 37Six yămz stiz naih ah phanx coong: “Lâyc tauh munh, six coib mâyc buđ munh nyăngz mâyc wax tauh, lauf max hayh ayx laix tuz phunz nâyx tauh munh max tayc haz?” 38Tăng wa, Zâu Yê-su zef numđ munz stimz, ninyh tauv wa stâu waz zanyf. Wax nomz stâu six ah nomz njauz ngamh, yâuc naih ah nomz njauz pyây zetx wa ngamh nzetx. 39Zâu Yê-su êu coong: “Stuyđ lâyc nomz njăuz pyây ayx queengx gôh.” Ma-ta, munh tayc nyăngz ô, coong ănz Nănh: “Zâu lex, nănh stâyx nzof, wâyc tuz pyâyz noib nâyx noib nzof.” 40Zâu Yê-su coong ănz nănh: “Yaz max zâyf bux mâyh coong năngđ coong mâyh zen, mâyh six tuz phătc Zâu Tênb-Huungh nyăngz gwăngz eeng nâyx haz?” 41Tăng wa, stiz songđ stuyđ njăuz pyây ayx queengx. Nzof Zâu Yê-su songđ ngoongv minb staox guungh ninyh yâuc coong: “Pha lex, yaz hâuđ Pha wâyc Mâyh mungv yaz nyăngz wac. 42Six yaz pâyz tuz coong Pha muif dlih mungv yaz, yaz coong năngđ nâyx six wâyc stâuđ quib nây nyăngz munh, phunz stiz zen coong Pha paiđ yaz taih.” 43Coong năngđ nâyx tuz, Nănh hamv stingb lub coong: “La-sa-latx lex, setb cungh ngwaic taih gôh!” 44Munh tayc songđ setb taih, puf cloon staux lauf năngx zuc buyx sênh, six nănh nyăngz minb lauf năngx jinh zuc buyx pêuz. Zâu Yê-su coong ănz stiz: “Ninyh stăngc zay nănh phunz nănh muf.”

45Năngđ nâyx, wax peob Yu-tai munh naih munh đuungx, six taih tex Ma-li-ya wax đomc munh stiz phătc Zâu Yê-su ayx nyăngz dlayc, songđ zen Nănh. 46Six stiz wax peob naih ah phanx ninyh pongh Pha-li-si munh yâuc lănv Zâu Yê-su ayx nyăngz cumh pâuz bux stiz.

47Wâyc nây, wax đomc stayb munh cloon Pha-li-si munh êu Ayx Côx Nyăngz Yu-tai Munh taih căpx dlonf sangv gwangh, yâuc coong: “Pănh cayx ayx laix heh, wâyc nâyx tauh munh ayx jix caox njingc đuungx yongb? 48Năngđ coong pănh dluyh nănh ayx năngđ nâyx, munh muif lanh six zen nănh nzuf, nzof Lô-ma munh six taih zab njinh nâyx tungđ jêmh cloon pănh nyăngz côkz.” 49Six, stiz wax peob naih ah lanh munh, bux hipđ ayx, Ca-ya-phatx, wax nyăngv toix nănh ayx stayb munh pyây, coong ănz stiz: “Nyâuh senz max pâyz luungđ tiny stăngv. 50Nyâuh max nyâyh tauv coong nođ phunz ah lanh munh tayc tayv phunz songx munh, six năngx gongx têx, njinh pec stingx zuc stutc nzuf haz?” 51Wax zanyf, nănh coong wax đomc wac six max zâyf nănh cănh coong, six wâyc nănh ayx stayb munh pyây wax nyăngv, nănh bix tâuc wac coong Zâu Yê-su six zuc tayc wâyc pec stingx, 52six max zâyf cungb wâyc nâyx stingx cuungv, six năngx phunz Zâu Tênb-Huungh nyăngz toonz sab zuc ninyh đanv wax đomc taih săngh ah peob. 53Năngđ nâyx, tăng wax noib, stiz songđ lov jau ta zux ayx laix tuz phunz Nănh zuc tayc.

54Wâyc năngđ nâyx, Zâu Yê-su max toongx songx setb ninyh setb lauf yămz Yu-tai munh nyăngz mungh toongx nzof, six Nănh gâyh wax cuyb tinc huungv ninyh ah nomz stâyz phangz stătx wa stâyz phangz blănf, naih ah nomz dlanyh hipđ ayx Ê-pha-im. Nănh cloon stayb sây buz yămz wa. 55Wax zanyf, cayx tauv Yu-tai munh nyăngz Pyenv Mengc Stêtz, max zeengx tauv Pyenv Mengc Stêtz, naih munh đuungx tăng đuungx đoif njăngv ninyh wa Yê-lu-sa-lem quaix đangc nongc stav cănh nyăngz wâyx. 56Tăng wa, stiz lov Zâu Yê-su, yâuc stâuđ yămz bongc Zâu Tênb-Huungh nyăngz pyau lanh naic lanh coong: “Âyz nyâuh nyâyh, six ayx laix? Ha Nănh senz max taih quaix stêtz haz?” 57Wax zanyf, wax đomc stayb munh cloon Pha-li-si munh setb lanyf coong, năngđ coong laiv lanh pâyz Nănh yămz laiv tix, wax lanh munh six zuc bux stiz, phunz stiz nzăngđ hayh zoz Nănh.