Yô-hanx 6

1Blătc wax đomc dlayc, Zâu Yê-su quaix wax nganđ leepz Ga-li-lê coiđ sinh ninyh (six hipđ ayx Ti-bê-lêtx). 2Naih ah peob songx munh hongđ nzongf ninyh lêpc Nănh, wâyc stiz tuz phătc quaix Nănh ayx jix caox njingc zany gongx wax đomc gumc munh. 3Wax zanyf, Zâu Yê-su songđ staox wa zoongz ninyh, Nănh songđ cloon Nănh wax đomc stayb sây stâyv yămz wa. 4(Wax zanyf, six cayx tauv Pyenv Mengc Stêtz, six Yu-tai munh nyăngz stêtz.) 5Tăng wa, Zâu Yê-su zaub minb mangc phătc songx munh hongđ nzongf taih Nănh wa, songđ coong ănz Phi-lipx: “Pănh cayx maif laiv tix nzu phunz nâyx đomc munh nhlinc heh?” 6(Zâu Yê-su naic ayx nâyx six nongc stâyv nănh, wâyc Nănh cayx ayx năngđ laix Nănh pâyz nzuf nzof.) 7Phi-lipx tauz Nănh coong: “Nongc iz pez noib congz nyanh maif nzu lauf max caux patz phunz stiz ah lanh tuz tix cay.” 8Zâu Yê-su wax đomc ah lanh stayb sây, six Si-môn Pi-tê nyăngz yâuf, An-đa-lu, tauz nănh coong: 9“Yămz nây naih ah lanh toonz jenz nănh naih pyaz nomz ba-li blauh nzu cloon iz tauh byauf, six munh hongđ tuz nâyx cungb nâyx tix bix laiv caux heh?” 10Zâu Yê-su coong: “Phanv êu munh tinyh đoih stâyv nzac.” (Wax zanyf yămz wax cuyb tinc six naih mađ đuungx.) Năngđ nâyx, stâyv wa nyăngz munh pha, cox naih pyaz tinb lanh. 11Tăng wa Zâu Yê-su nzauf wax đomc nzu sâuf hâuđ tuz, Nănh songđ patz phunz stâyv wa nyăngz munh nhlinc, byauf lauf ayx năngđ ha, munh oix buc laiv yâuc tuz âyz stimz. 12Tăng wa, tauv songx munh nhlinc pêu nzuf, Zâu Yê-su bux Nănh wax đomc stayb sây coong: “Oix zuc ninyh stâub nhlinc yăngc wax đomc, năngx gâyf ayx huđ laiv huungđ tinyh.” 13Năngđ nây, tăng wa pyaz nomz ba-li blauh nzu, songx munh nhlinc tuz, stiz stâub wax đomc nzu yăngc, tuz săpc nyâyc đanz pong. 14Wâyc, wax đomc munh phătc Zâu Yê-su ayx nyăngz jix caox njingc, songđ coong: “Nâyx lanh munh senz zâyf oix zuc taih bamh canz wax Tauh tâuc wac munh gôh.” 15Tăng wa, wâyc pâyz coong stiz cayx taih yac Nănh nongc pâuh Nănh ayx huungh, Nănh songđ pyenv staox wa zoongz ninyh ah lanh yămz wa.

16Wax zanyf, tauv cayx nzămc, Zâu Yê-su wax đomc stayb sây nzac wa coiđ lauf, 17stiz nzac đangđ ninyh, clăngv quaix wax nganđ leepz coiđ sinh muf huungv ninyh wa Ca-bê-na-um, wax zanyf, guungh yâuc nzămc meengh nzof, six Zâu Yê-su lauf max zeengx taih stiz wa. 18Wâyc naih ah tâuc nzaox njoongh nzongf stâyb wa coiđ songđ naih womz boomf. 19Tâuc tuz cox pyaz joz gâyf, stayb sây buz phătc Zâu Yê-su yăngh womz minc taih stătx wa đangđ, stiz songđ cumh nzav nzongf. 20Six Zâu Yê-su bux stiz coong: “Yaz lêc! Năngx gâyf cumh nzav!” 21Wax zanyf, stiz ah stipx Nănh nzac đangđ ninyh, đangđ songđ toongx sangf zapz wa coiđ sinh, six stiz cayx ninyh nyăngz tinc.

22Tauv nyâyc noib, songx munh lauf năngx jinh yămz wax leepz coiđ sinh, yâuc phătc blătc wax saz đangđ max naih pitc saz đangđ yămz wa, wâyc phătc Zâu Yê-su lauf max cloon Nănh wax đomc stayb sây buz nzac đangđ, cungb phătc Nănh wax đomc stayb sây buz ninyh cuungv. 23Tăng wa, naih ah đomc đangđ tăng Ti-bê-lêtx taih yămz stătx Zâu sâuf hâuđ nzu phunz songx munh nhlinc wax cuyb tinc. 24Wâyc nây, songx munh phătc Zâu Yê-su cloon Nănh wax đomc stayb sây max yămz wa, stiz songđ nzac đangđ ninyh quaix wa Ca-bê-na-um muf lov Zâu Yê-su. 25Lov pongh Nănh yămz wax nganđ leepb coiđ sinh wax zanyf, songx munh naic Nănh coong: “La-bi lex, mâyh laiv zanyf taih nây heh?” 26Zâu Yê-su tauz stiz coong: “Yaz coong senz bux nyâuh, nyâuh taih lov yaz six max zâyf wâyc nyâuh phătc wax đomc jix caox njingc, six wâyc nyâuh tuz nzu nhlinc pêu. 27Năngx gâyf ayx cumh pâuz wâyc hayh yootz nyăngz nhlinc hopb, six ayx wâyc tuz stâyv quâyc nyăngz mengc nyăngz nhlinc hopb, six Bamh Munh sađ phunz nyâuh wax huungđ, wâyc Zâu Tênb-Huungh six Pha, tăpb yenx ănz Nănh nzof.” 28Tăng wa stiz coong ănz Nănh: “Buz zuc ayx luungđ, buz nzăngđ hayh tuz ayx Zâu Tênb-Huungh nyăngz cumh pâuz?” 29Zâu Yê-su tauz stiz coong: “Nây six Zâu Tênb-Huungh nyăngz cumh pâuz, nyâuh six oix zuc zen Nănh paiđ taih wax Tauh.” 30Stiz songđ coong ănz Nănh: “Ha mâyh ayx laiv huungđ jix caox njingc phunz buz phătc bix zen mâyh? Mâyh ayx luungđ cumh pâuz heh? 31Buz nyăngz claof jex yămz wa stâyz phangz blănf nhlinc ma-na, năngđ naih wac ja coong: ‘Nănh sađ nzu tăng guungh nzac taih phunz stiz nongc nhlinc.’” 32Tăng wa Zâu Yê-su zef tauz stiz coong: “Yaz coong senz bux nyâuh, max zâyf Mô-sê sađ nzu tăng guungh taih phunz nyâuh, six yaz nyăngz Pha sađ senz nyăngz nzu tăng guungh taih phunz nyâuh. 33Wâyc Zâu Tênb-Huungh nyăngz nzu six tăng guungh nzac taih nyăngz nzu yâuc phunz bamh munh tuz naih săngh mengc.” 34Tăng wa, stiz coong ănz Nănh: “Stênx steengb lex, joođ sađ phunz buz stâyv quâyx naih wax đomc nzu.” 35Zâu Yê-su tauz stiz coong: “Yaz six săngh mengc nyăngz nzu. Laiv lanh taih lêpc yaz six max zuc nyâuđ sab, nzof laiv lanh zen păngc yaz six stâyv quâyx max nyâuđ gatb. 36Six yaz tuz bux nyâuh coong, nyâuh tuz phătc yaz, six nyâuh max zen. 37Pha jaoz phunz yaz nyăngz munh tauv laiv six cănh taih lêpc yaz, laiv lanh taih lêpc yaz, yaz six max quanyf. 38Wâyc yaz tăng guungh nzac taih six max zâyf âyz yaz cănh nyăngz zux ix, six âyz paiđ yaz taih wax Tauh nyăngz zux ix. 39Nây six paiđ yaz taih wax Tauh nyăngz âyx, Tênb-toongh Pha jaoz phunz yaz wax đomc munh, Nănh max oix yaz phunz laiv lanh gaih ninyh, six tauv stêtb mâyv nyăngz noib, oix yaz ayx phunz wax đomc munh tuz săngh taih. 40Nây six yaz nyăngz Pha nyăngz âyx, tinyh phanv laiv lanh phătc Nănh nyăngz Toonz yâuc zen caođ Nănh nyăngz Toonz, six tuz stâyv quâyx nyăngz mengc, nzof tauv stêtb mâyv nyăngz noib, yaz six ayx phunz wax lanh munh tuz săngh taih.”

41Tăng wa, Yu-tai munh songđ yônx Nănh wâyc Nănh coong: “Yaz six tăng guungh nzac taih nyăngz nzu.” 42Stiz coong: “Lâyc tauh max zâyf Yê-su, Yô-sepx nyăngz toonz nănh nyăngz nzif pha pănh lauf pâyz? Ha săngh laix nâyx zanyf Nănh bix coong six: ‘Yaz tăng guungh taih’?” 43Zâu Yê-su tauz stiz coong: “Nyâuh năngx gâyf lanh yônx ănz lanh gôh. 44Max naih mănv hayh taih lov yaz, năngđ coong Tênb-toongh Pha, paiđ yaz taih wax Tauh, max ênz nănh taih, tauv stêtb mâyv nyăngz noib, yaz six ayx phunz wax lanh munh tuz săngh taih. 45Wax đomc tâuc wac munh nyăngz stâub naih ja coong: ‘Muif lanh six tuz Zâu Tênb-Huungh nzaox.’ Toix laiv lanh mungv Tênb-toongh Pha, yâuc hoođ âyz Nănh six taih lov yaz. 46Wâyc max naih mănv phătc quaix Tênb-toongh Pha, cungb tăng Zâu Tênb-Huungh taih wax Tauh — Nănh tuz phătc Tênb-toongh Pha cuungv. 47Yaz coong senz bux nyâuh, laiv lanh zen six tuz stâyv quâyx nyăngz mengc. 48Yaz six săngh mengc nyăngz nzu. 49Nyâuh nyăngz claof jex yămz wa stâyz phangz blănf nhlinc ma-na, stiz lauf tayc nzof. 50Nây six tăng guungh nzac taih nyăngz nzu, phunz toix laiv lanh nhlinc nây nzu six max tayc. 51Yaz six săngh nyăngz nzu, tăng guungh nzac taih. Năngđ coong laiv lanh nhlinc nây nzu, wax tauh six tuz stâyv quâyx săngh. Yaz sađ phunz nyăngz nzu six cănh yaz nyăngz a, wâyc phunz bamh munh tuz săngh.”

52Năngđ nâyx Yu-tai munh songđ tinyh nzeengz, coong: “Ayx laix lâyc tauh munh bix cayx phunz pănh nhlinc nănh nyăngz a?” 53Tăng wa, Zâu Yê-su bux stiz coong: “Yaz coong senz bux nyâuh, năngđ coong nyâuh max nhlinc Bamh Munh nyăngz a yâuc max hopb Nănh nyăngz samđ, yămz nyâuh six max naih săngh mengc. 54Laiv lanh nhlinc yaz nyăngz a yâuc hopb yaz nyăngz samđ six tuz naih stâyv quâyx nyăngz mengc, tauv stêtb mâyv wax noib yaz six ayx phunz wax lanh munh tuz săngh taih. 55Wâyc yaz nyăngz a cloon yaz nyăngz samđ, six senz nyăngz nhlinc hopb. 56Laiv lanh nhlinc yaz nyăngz a yâuc hopb yaz nyăngz samđ, wax tauh yămc yaz cah njaf, yaz lauf yămz wax tauh cah njaf. 57Cayx năngđ săngh nyăngz Tênb-toongh pha paiđ yaz taih, nzof yaz wâyc Nănh săngh ayx năngđ laix, six laiv lanh nhlinc yaz nyăngz a lauf wâyc yaz săngh ayx năngđ wa nâyx. 58Nây six tăng guungh nzac taih nyăngz nzu, six max năngđ nyâuh nyăngz claof jex nhlinc nyăngz nzu, yâuc năngx zuc tayc. Laiv lanh nhlinc nâyx đomc nzu six tuz stâyv quâyx săngh.” 59Zâu Yê-su coong nâyx đomc wac wax zanyf six yămz wa Ca-bê-na-um dlanyh nyăngz huyđ toongh nzaox munh.

60Tăng wa, naih đuungx lanh Nănh nyăngz stayb sây numđ nâyx đomc wac, stiz songđ coong: “Nâyx đomc wac senz zâuđ tuz nâyx, naih mănv hayh mungv tuz heh?” 61Six Zâu Yê-su pâyz tuz coong Nănh wax đomc stayb sây jinh đangh yônx nâyx đomc wac, Nănh songđ naic stiz coong: “Nâyx đomc wac ayx phunz nyâuh nyâyh longđ mah? 62Ha nâyx năngđ coong nyâuh phătc Bamh Munh muf cah đangc Nănh yămz nyăngz tinc bix laiv ayx laix heh? 63Singx-Lingh six ayx phunz săngh wax Tauh; Stinb a six max setb luungđ tiny. Yaz coong nyăngz wac ănz nyâuh six Singx-Lingh cloon săngh mengc. 64Six yămz nyâuh cah njaf naih lauh lanh lauf max zen.” Wâyc tăng coonz Zâu Yê-su cănh pâyz tuz laiv lanh six max zen, laiv lanh six maic Nănh. 65Nănh songđ coong: “Six wâyc nâyx, yaz nzăngđ coong ănz nyâuh coong, năngđ coong max zâyf Tênb-toongh Pha sađ phunz, six max naih mănv hayh taih lov yaz.”

66Tăng wax zanyf, Zâu Yê-su wax đomc stayb sây, naih đuungx lanh phunb đangz max lêpc Nănh ninyh gôh. 67Wâyc nây, Zâu Yê-su naic wa săpc nyâyc lanh stayb sây coong: “Hănđ nyâuh lauf oix phunb đangz mah?” 68Si-môn Pi-tê tauz Nănh coong: “Zâu lex, buz cayx ninyh lêpc mănv heh? Mâyh naih stâyv quâyx săngh mengc nyăngz wac, 69buz zen yâuc pâyz tuz coong Mâyh six Zâu Tênb-Huungh nyăngz Đăngb Zeengh Munh.” 70Zâu Yê-su zef tauz stiz: “Max zâyf yaz sên nyâuh săpc nyâyc lanh taih nongc ayx stayb sây haz? Yămz nyâuh lâyc peob naih ah lanh six manđ.” 71Zâu Yê-su coong tauv Yu-đatc, Si-môn nyăngz toonz I-sa-ca-li-ôtx, wâyc nănh, six wa săpc nyâyc lanh nyăngz ah lanh stayb sây, cayx maic Zâu Yê-su.