Yô-hanx 5

1Blătc wax đomc dlayc, naih Yu-tai munh nyăngz ah nomz stêtz, Zâu Yê-su songđ ninyh wa Yê-lu-sa-lem dlanyh. 2Wax zanyf, yămz wa Yê-lu-sa-lem, stătx Pax Jiz Yuungh Jeengh sinh, naih ah nomz glangh, Hipđ-lu wac six hipđ ayx Bêtc-sa-ta, naih pyaz nomz tungh sec njiuh. 3Yămz wa naih ah peob gumc munh hongđ nzongf, mâyc buđ, puf quac, staux quac, săngh gumc quac max hayh tongf stinb phâyx yămz wax đomc njiuh. 4[Wâyc naih ah tauh Zâu nyăngz stinz munh toix lauh zanyf hayh nzac glangh taih ayx phunz womz tongf, womz tongf wax zanyf, laiv lanh japc nzac ninyh đangc, nănh hănđ săngh laiv huungđ gumc six tuz gongx nzuf.] 5Yămz wa naih ah lanh munh, nănh săngh gumc tuz stamx săpc pêtz nyăngv. 6Zâu Yê-su phătc nâyx lanh munh phâyx yămz wa, yâuc pâyz coong nănh săngh gumc lauh nzongf, Zâu Yê-su songđ coong ănz nănh: “Mâyh oix tuz gongx max?” 7Gumc munh tauz Nănh: “Zâu lex, womz tongf wax zanyf max naih mănv ênz yaz nzac glangh ninyh. Six, yaz jinh đangh nzac glangh ninyh wax zanyf, pitc lanh munh bâyf ninyh nzac đangc yaz nzof.” 8Zâu Yê-su bux nănh coong: “Phanv nyoongz quef, đamz mâyh nyăngz zâuv bix muf gôh.” 9Wax tauh munh pha, toongx sangf tuz gongx nzuf, nănh songđ đamz nănh nyăngz zâuv, bix muf.

Wax noib six toix tingc congz noib. 10Wâyc nây Yu-tai munh songđ coong ănz tuz zany gongx wax lanh munh: “Nâyx noib six toix tingc congz noib, mâyh max tuz đamz mâyh nyăngz zâuv.” 11Six nănh tauz stiz coong: “Zany yaz tuz gongx wax lanh, nănh cănh êu yaz coong: ‘Phanv đamz mâyh nyăngz zâuv bix muf gôh.’” 12Stiz naic nănh: “Bux mâyh coong ‘Phanv đamz zâuv bix muf gôh’ wax tauh six mănv heh?” 13Six, tuz zany gongx wax lanh munh yâuc max pâyz coong mănv, wâyc Zâu Yê-su nzac yămz wa nyăngz munh hongđ cah njaf ninyh. 14Blătc wa quaix đangz, Zâu Yê-su pongh nănh yămz wa bongc Zâu Tênb-Huungh nyăngz pyau, songđ coong ănz nănh: “Phanv mangc, mâyh tuz gongx nzuf nzof! Năngx gâyf pamf stoif gôh, phunz max naih luungđ huđ nyăngz jau taih hoiđ zuc mâyh.” 15Nâyx lanh munh pha songđ ninyh bux ănz Yu-tai munh coong, zany phunz nănh tuz gongx, wax lanh munh six Zâu Yê-su. 16Wâyc năngđ nây, Yu-tai munh songđ ayx huđ ănz Zâu Yê-su, wâyc Nănh ayx wax đomc dlayc toix tingc congz noib. 17Six Zâu Yê-su coong bux stiz: “Yaz nyăngz Pha lauf năngx jinh ayx cumh pâuz tauv nâyx zanyf, yaz lauf ayx cumh pâuz năngđ nâyx.” 18Wâyc nâyx đomc wac, Yu-tai munh zef oix lov jau tayx Nănh năngx nzongf têx timb, wâyc Nănh max zâyf cungb pamf tingc congz noib cuungv, six zef năngx hipđ Zâu Tênb-Huungh ayx Nănh nyăngz Pha, cănh ayx phunz Nănh căn Zâu Tênb-Huungh tinyh năngđ.

19Wâyc nây, Zâu Yê-su zef tauz ănz stiz coong: “Yaz coong senz bux nyâuh, Toonz max hayh cănh âyz nănh nyăngz nyâuđ ayx tuz laiv huungđ, blătc nzuf nănh phătc Pha ayx wax đomc, wâyc Pha ayx toix laiv huungđ Toonz six lauf ayx wax huungđ. 20Tênb-toongh Pha stăngz Nănh nyăngz Toonz songđ phunz Nănh nyăngz Toonz phătc Nănh ayx nyăngz muif huungđ dlayc, Nănh six phunz Nănh nyăngz Toonz phătc wax đomc dlayc năngx lub têx nây timb Phunz nyâuh numđ nyâyh ganc. 21Wâyc Tênb-toongh Pha ayx phunz munh tayc săngh taih yâuc sađ phunz stiz naih săngh mengc năngđ laix, six Nănh nyăngz Toonz lauf sađ săngh mengc phunz Nănh oix phunz nyăngz munh năngđ wa nâyx. 22Tênb-toongh Pha lauf max stămđ mănv, six Nănh jaoz nzuf lanyf phunz Nănh nyăngz Toonz stămđ, 23phunz muif lanh munh zanyb Nănh nyăngz Toonz lauf năngđ stiz zanyb Tênb-toongh Pha nâyx. Laiv lanh max zanyb Nănh nyăngz Toonz six lauf max zanyb Tênb-toongh Pha, senz paiđ Toonz taih wax Tauh. 24Yaz coong senz bux nyâuh, laiv lanh mungv yaz nyăngz wac yâuc zen paiđ yaz taih wax Tauh six tuz stâyv quâyx nyăngz mengc, wax lanh songđ max zuc tingc stoif, six senz tuz gâyh đutb tayc yâuc tuz naih săngh mengc. 25Yaz coong senz bux nyâuh săngx huđ cayx tauv gôh, nzof tauv wax zanyf, wax đomc munh tayc six tuz numđ Zâu Tênb-Huungh nyăngz Toonz nyăngz stingb, nzof laiv lanh mungv numđ six tuz săngh. 26Wâyc Tênb-toongh Pha naih săngh mengc yămz Nănh ayx năngđ laix, Nănh lauf sađ phunz Nănh nyăngz Toonz naih săngh mengc yămz Nănh năngđ wa nâyx, 27Tênb-toongh Pha jaoz lanyf phunz Nănh nyăngz Toonz stămđ stoif, wâyc Nănh nyăngz Toonz six Bamh Munh. 28Năngx gâyf numđ nyâyh ganc nâyx đomc jau, wâyc săngx huđ tauv wax zanyf, yămz wa stâu nyăngz munh, muif lanh six tuz numđ Nănh nyăngz stingb 29stiz songđ setb wa stâu taih — laiv lanh ayx gongx six săngh taih nongc tuz săngh, six laiv lanh ayx huđ six săngh taih nongc tingc stoif.

30Yaz max hayh cănh păngc yaz ayx toix laiv huungđ. Yaz six âyz yaz numđ quaix nyăngz bix stămđ, yaz six peengh stimz nyăngz stămđ, wâyc yaz max zâyf cănh âyz yaz nyăngz zux ix, six âyz paiđ yaz taih wax Tauh nyăngz zux ix. 31Năngđ coong yaz cănh ayx zanyx manyf phunz yaz, yaz nyăngz zanyx manyf wac six max săngh zen. 32Naih ah lanh munh, cănh ayx zanyx manyf phunz yaz, yaz pâyz coong wax tauh munh ayx zanyx manyf phunz yaz six senz nyăngz. 33Nyâuh paiđ munh ninyh pongh Yô-hanx, nănh yâuc ayx zanyx manyf phunz senz gâyf. 34Yaz hănđ max stipx tăng bamh munh nyăngz zanyx manyf wac, six yaz coong nâyx đomc jau, six nongc phunz nyâuh hayh tuz njâuv. 35Yô-hanx six ah zây toongz pu sac yâuc siux gwăngz, nyâuh yâuc numđ nyađ yămz nănh nyăngz gwăngz ah dlapc. 36Six yaz naih nyăngz zanyx manyf, năngx lub têx Yô-hanx nyăngz zanyx manyf: nây six Pha jaoz phunz yaz wax đomc cumh pâuz, yaz zuc ayx săngh năngx nzuf — six yaz ayx nâyx đomc nyăngz cumh pâuz — cănh ayx zanyx manyf phunz yaz coong Tênb-toongh Pha senz paiđ yaz taih. 37Tênb-toongh Pha cănh paiđ yaz taih, Nănh yâuc ayx zanyx manyf phunz yaz. Nyâuh max zeengx tuz numđ quaix Nănh nyăngz stingb, yâuc max zeengx phătc quaix Nănh nyăngz minb. 38Nyâuh max naih Nănh nyăngz wac yămz nyâuh nyăngz nyâuđ, wâyc nyâuh max zen Nănh paiđ taih wax Tauh. 39Nyâuh zah Canyx Stâub mangc wâyc nyâuh nyâyh coong păngc wa bix tuz stâyv quâyx nyăngz mengc, wax đomc wac six ayx zanyx manyf coong tauv yaz, 40Nyâuh yâuc max oix taih lov yaz nongc tuz naih săngh mengc. 41Yaz max stipx tăng bamh munh nyăngz gwăngz eeng, 42Six, yaz pâyz coong nyâuh nyăngz nyâuđ cah njaf, max naih stăngz Zâu Tênb-Huungh. 43Yaz yămz yaz nyăngz Pha nyăngz manyh taih, nyâuh yâuc max stipx yaz. Six năngđ coong naih pitc lanh munh nongc nănh cănh nyăngz manyh taih, nyâuh six stipx wax lanh munh. 44Nyâuh laiv ayx laix hayh zen heh, wâyc nyâuh stipx tăng munh nyăngz gwăngz eeng, bix max lov tăng ah tauh Zâu Tênb-Huungh taih nyăngz gwăngz eeng? 45Năngx gâyf nyâyh coong yaz yămz Tênb-toongh Pha nyăngz cah đangc cooux nyâuh. Cooux nyâuh wax tauh six Mô-sê, nyâuh nyâyh mungc wax tauh. 46Năngđ coong nyâuh zen Mô-sê, nyâuh six lauf zen yaz, wâyc Mô-sê six ja coong tauv yaz. 47Six năngđ coong nyâuh max zen nănh ja nyăngz wac, nyâuh bix ayx laix hayh zen yaz nyăngz wac?”