Yô-hanx 13:34

1Wax zanyf, cayx tauv Pyenv Mengc Stêtz, Zâu Yê-su pâyz tuz coong Nănh gâyh nâyx nomz bamh canz muf Tênb-toongh Pha wa nyăngz săngx huđ tauv nzof. Nănh songđ numđ stăngz yămz bamh canz zen Nănh nyăngz munh, Nănh six stăngz stiz tauv tauh tauv mâyv. 2Jinh đangh nhlinc bah nzămc năngv, manđ songđ njôx ănz Yu-đatc I-sa-ca-li-ôtx, Si-môn nyăngz toonz nyăngz nyâuđ, phunz nănh maic Zâu Yê-su, 3Wâyc pâyz coong Tênb-toongh Pha jaoz muif huungđ yămz Nănh nyăngz puf, yâuc pâyz coong Nănh tăng Zâu Tênb-Huungh taih, yâuc cayx phunb đangz muf Zâu Tênb-Huungh wa, 4Nănh songđ nyoongz quef gâyh wa hinh, zay cungh ngwaic yămc guyz. Nănh yâuc zoz tungh minb đao taih, sênh ănz Nănh nyăngz clai. 5Tăng wa, Nănh taox womz ănz nzac tungh bônh ninyh songđ đaox staux phunz stayb sây buz, yâuc zoz stayb Nănh nyăngz clai wax nomz tungh minb nongc stotb gaib. 6Nzof, Zâu Yê-su ninyh tauv Si-môn Pi-tê. Pi-tê songđ coong ănz Zâu Yê-su: “Zâu lex, Mâyh đaox staux phunz yaz naz?” 7Zâu Yê-su tauz ănz nănh coong: “Mâyh max tuz yaz nâyx zanyf ayx nyăngz cumh pâuz, six tauv blătc nây, mâyh cănh pâyz.” 8Pi-tê tauz Zâu Yê-su coong: “Yaz six bâyf max phunz Mâyh đaox yaz nyăngz staux.” Zâu Yê-su zef tauz nănh coong: “Năngđ coong yaz max đaox phunz mâyh, mâyh six max naih luungđ phănc cloon yaz tiny.” 9Si-môn Pi-tê tauz Nănh coong: “Zâu lex, max zâyf cungb đaox yaz nyăngz staux cuungv, six đaox njinh puf cloon yaz nyăngz pyây timb.” 10Zâu Yê-su coong ănz nănh: “Laiv lanh tuz đapc stinb six max zuc ayx nâyx, cungb zuc đaox staux cuungv, wax lanh munh six tuz dlăngc nzuf, six max zâyf nyâuh muif lanh tuz dlăngc.” 11(Wâyc Zâu Yê-su pâyz coong mănv maic Nănh, wâyc năngđ nây Nănh nzăngđ coong: “Nyâuh max zâyf muif lanh tuz dlăngc.”)

12Tăng wa Zâu Yê-su đaox staux phunz stayb sây buz tuz, Nănh songđ zoz cungh ngwaic wax yămc guyz zuz, yâuc stâyv nzac, songđ coong ănz stiz: “Nyâuh pâyz tuz yaz ah yac ayx luungđ phunz nyâuh max? 13Nyâuh hipđ yaz ayx ‘Stayb pha’, yâuc hipđ ayx ‘Zâu’; nyâuh coong senz toix nzongf wâyc yaz senz năngđ nâyx. 14Wâyc nây, năngđ coong yaz, six ayx Zâu, yâuc ayx Stayb pha, bix năngx đaox staux phunz nyâuh, nyâuh six lauf zuc lanh đaox staux phunz lanh. 15Wâyc yaz ayx gao phunz nyâuh mangc, phunz nyâuh lauf ayx cayx năngđ yaz ayx phunz nyâuh nâyx. 16Yaz coong senz bux nyâuh, pâuz six max năngx lub têx nănh nyăngz zâu; paiđ ninyh nyăngz munh lauf max năngx lub têx paiđ nănh ninyh wax tauh. 17Năngđ coong nyâuh pâyz nâyx đomc jau, nyâuh yâuc ayx âyz, nyâuh six tuz pôz. 18Yaz max zâyf coong tauv nyâuh muif lanh nzuf; yaz pâyz yaz sên taih nyăngz munh — six phunz Canyx Stâub nyăngz wac tuz setb taih toix nzuf, coong: ‘Cloon yaz nhlinc nzu nyăngz munh nănh zaub staux tămx yaz.’ 19Tăng nâyx zanyf, dlayc max zeengx setb yaz bux nyâuh quaix đangc, tauv dlayc setb taih wax zanyf, nyâuh nzăngđ zen coong yaz six Stâyv Quâyx Săngh. 20Yaz coong senz bux nyâuh, laiv lanh stipx yaz paiđ ninyh nyăngz munh six lauf stipx yaz, nzof laiv lanh stipx yaz six lauf stipx paiđ yaz taih wax Tauh.”

21Coong nâyx đomc wac tuz, Zâu Yê-su numđ stauh stimz, Nănh songđ coong: “Yaz coong senz bux nyâuh, nyâuh lâyc đomc naih ah lanh six maic yaz.” 22Stayb sây buz lanh mangc lanh, max pâyz Nănh coong mănv. 23Wax zanyf, Zâu Yê-su wax đomc stayb sây naih ah lanh, six Zâu Yê-su stăngz wax lanh, stâyv yămz wa hinh cah sinh, pongc Zâu Yê-su nyăngz cah lapc. 24Tăng wa, Si-môn Pi-tê songđ tăng hih ănz wax lanh êu naic mangc jađ, “Stayb pha coong wax tauh six mănv?” 25Wâyc năngđ nâyx, wax lanh munh songđ nzaz stinb pongc Zâu Yê-su nyăngz cah lapc, songđ naic Nănh: “Zâu lex, wax lanh six mănv heh?” 26Zâu Yê-su tauz: “Wax tauh six yaz nokx nâyx ah nzu tuz, bix clôc phunz wax tauh.” Tăng wa, Nănh nokx wax ah nzu tuz, songđ clôc phunz Yu-đatc, Si-môn nyăngz toonz I-sa-ca-li-ôtx. 27Blătc wax ax nzu, Sax-tanx songđ nzac yămz nănh nyăngz stinb. Wâyc nây, Zâu Yê-su bux nănh coong: “Mâyh oix ayx luungđ, bix ayx zef gôh.” 28(Six, stâyv wa hinh nyăngz munh max naih mănv pâyz tuz wâyc săngh laix Zâu Yê-su bix coong ănz nănh năngđ nâyx. 29Wâyc naih ah phanx six nyâyh coong, Yu-đatc nzauf nyanh tic, Zâu Yê-su bix bux nănh: “Êu ninyh maif tax huungđ lauf nongc quaix stêtz,” max six nzâyz tix huungđ ninyh phunz munh zâuđ munh.) 30Tăng wa, Yu-đatc nhlinc wax ax nzu tuz, songđ lênh dlih setb ninyh. Wax zanyf, lauf nzămc nzof.

31Năngđ nâyx, tauv Yu-đatc ninyh blătc Zâu Yê-su songđ coong: “Nâyx zanyf, Bamh Munh tuz gwăngz eeng nzof, Zâu Tênb-Huungh lauf tuz gwăngz eeng yămz Nănh. 32Nzof Zâu Tênb-Huungh six ayx phunz Bamh Munh tuz gwăngz eeng yămz Nănh, Nănh songđ coonx ayx phunz Bamh munh tuz gwăngz eeng. 33Sây jenz lex, yaz năngx cloon nyâuh yămz tix cay timb lêc. Nyâuh six lov yaz, lauf năngđ yaz coong ănz wax đomc Yu-tai munh nâyx, coong: ‘Yaz ninyh nyăngz tinc, nyâuh max hayh ninyh tuz tauv.’ Nâyx zanyf, yaz lauf coong năngđ nâyx ănz nyâuh. 34Yaz jaoz phunz nyâuh ah huungđ săngb lanyf, nyâuh six zuc lanh stăngz lanh; yaz stăngz nyâuh năngđ laix, nyâuh lauf zuc lanh stăngz lanh năngđ wa nâyx. 35Năngđ coong nyâuh lanh stăngz lanh, wâyc nâyx, muif lanh munh six saz tuz coong nyâuh six yaz nyăngz stayb sây.”

36Si-môn Pi-tê coong ănz Nănh: “Zâu lex, Mâyh ninyh laiv heh?” Zâu Yê-su tauz nănh: “Yaz ninyh nyăngz tinc, nâyx zanyf mâyh max zeengx hayh lêpc yaz tuz, blătc nây, mâyh six lêpc ninyh.” 37Pi-tê songđ coong ănz Nănh: “Zâu lex, wâyc săngh laix yaz nâyx zanyf bix max hayh lêpc Mâyh tuz heh? Yaz six nyunc tayc yaz nyăngz mengc wâyc Mâyh.” 38Zâu Yê-su tauz: “Mâyh nyunc tayc mâyh nyăngz mengc wâyc yaz naz? Yaz coong senz bux mâyh, zayz coongh max ayx caix, mâyh six pyenv yaz pôz hâyđ.”