Yô-hanx 14

1“Nyâuh năngx gâyf nyâuđ wangb. Nyâuh oix zuc zen caođ Zâu Tênb-Huungh, yâuc oix zuc zen caođ yaz. 2Yaz nyăngz Pha nyăngz pyau naih tinc yămz đuungx. Năngđ coong max naih, yaz lauf bux nyâuh nzof gôh, wâyc yaz muf bênc ah cuib tinc phunz nyâuh. 3Tauv yaz muf bênc ah cuib tinc phunz nyâuh tuz, yaz six năngx phunb đangz taih ênz nyâuh muf lêpc yaz, phunz yaz yămz laiv nyâuh lauf yămz wa. 4Yaz ninyh nyăngz tinc nyâuh lauf pâyz jau ninyh nzof.” 5Tô-matx naic Nănh coong: “Zâu lex, buz max pâyz tuz mâyh cayx ninyh laiv, buz laiv hayh pâyz jau ninyh heh?” 6Zâu Yê-su coong ănz nănh: “Yaz six ayx jau, yâuc ayx senz gâyf cloon săngh mengc; năngđ coong max păngc yaz six max naih mănv hayh ninyh tuz tauv Tênb-toongh Pha. 7Năngđ coong nyâuh pâyz yaz, nyâuh six lauf pâyz yaz nyăngz Pha. Tăng nây, nyâuh pâyz tuz Nănh yâuc tuz phătc quaix Nănh.” 8Phi-lipx coong ănz Nănh: “Zâu lex, joođ phunz buz phătc Tênb-toongh Pha bex, năngđ nâyx buz songđ numđ caux gôh.” 9Zâu Yê-su coong ănz nănh: “Yaz cloon nyâuh yămz lauh tuz nâyx nzof, mâyh bix lauf max pâyz yaz naz, Phi-lipx? Laiv lanh phătc yaz six lauf phătc Tênb-toongh Pha. Săngh laix mâyh bix coong: ‘Joođ phunz buz phătc Tênb-toongh Pha heh’? 10Mâyh max zen coong yaz yămz Tênb-toongh Pha cah njaf, Tênb-toongh Pha lauf yămz yaz cah njaf haz? Yaz coong nâyx đomc wac ănz nyâuh max zâyf yaz cănh coong setb taih, six Tênb-toongh Pha muif dlih yămz yaz cah njaf ayx Nănh nyăngz cumh pâuz. 11Oix zuc zen yaz coong, yaz yămz Tênb-toongh Pha cah njaf, Tênb-toongh Pha lauf yămz yaz cah njaf; Năngđ max têx, six oix zuc mangc yaz ayx nyăngz cumh pâuz zen. 12Yaz coong senz bux nyâuh, laiv lanh zen yaz, wax lanh six lauf ayx, yaz ayx wax đomc cumh pâuz, nzof zef ayx wax đomc cumh pâuz năngx lub têx timb, wâyc yaz cayx muf Tênb-toongh Pha wa. 13Tinyh phanv nyâuh tim yaz nyăngz bux joođ laiv huungđ, yaz six ayx wax huungđ phunz, Phunz Tênb-toongh Pha wâyc Nănh nyăngz Toonz tuz munh tanv. 14Năngđ coong nyâuh tim yaz nyăngz bux joođ laiv huungđ, yaz six ayx wax huungđ phunz. 15Năngđ coong nyâuh stăngz yaz, nyâuh six âyz yaz nyăngz lanyf ayx, 16yaz six lauf joođ Tênb-toongh Pha, Nănh six sađ pitc Tauh taih oonz nyâuh nyăngz nyâuđ, Nănh cloon nyâuh yămz tuz tauv stâyv quâyx, 17wax Tauh six Senz Gâyf nyăngz Singx-Lingh, bamh munh six max hayh stipx tuz Nănh, wâyc bamh munh max saz tuz Nănh, yâuc max pâyz Nănh. Nyâuh six pâyz Nănh, wâyc Nănh muif dlih cloon nyâuh yămz yâuc yămz nyâuh cah njaf. 18Yaz six max quanyf nyâuh pênx cux hoonh sây đêh; Yaz six taih cloon nyâuh yămz. 19Max naih lauh, bamh munh six max phătc yaz; six nyâuh lauf tuz phătc yaz, wâyc yaz săngh, nyâuh lauf tuz săngh. 20Tauv wax noib, nyâuh six pâyz tuz coong yaz yămz yaz nyăngz Pha cah njaf, nyâuh lauf yămz yaz cah njaf, yaz lauf yămz nyâuh cah njaf. 21Laiv lanh stipx yaz nyăngz lanyf yâuc âyz ayx, wax lanh six stăngz yaz nyăngz munh; nzof laiv lanh stăngz yaz six tuz yaz nyăngz Pha stăngz nănh; yaz lauf stăngz wax lanh yâuc phunz nănh pâyz yaz.” 22Yu-đatc (Max zâyf I-sa-ca-li-ôtx) coong ănz Nănh: “Zâu lex, naih laiv luungđ dlayc setb, bix cayx phunz buz pâyz Mâyh yâuc max phunz bamh munh pâyz heh?” 23Zâu Yê-su tauz ănz nănh coong: “Năngđ coong laiv lanh stăngz yaz, wax lanh six âyz yaz nyăngz wac ayx. Yaz nyăngz Pha yâuc stăngz wax lanh munh; Buz songđ taih cloon wax lanh munh yămz, yâuc yămz wax lanh munh cah njaf. 24Laiv tauh max stăngz yaz six max âyz yaz nyăngz wac ayx. Nyâuh mungv numđ nyăngz wac six max zâyf yaz nyăngz, six Tênb-toongh Pha nyăngz, paiđ yaz taih wax Tauh.

25Yaz năngx jinh cloon nyâuh yămz nyăngz săngx huđ, yaz coong nâyx đomc dlayc bux nyâuh nzuf nzof. 26Six Oonz Nyâuđ Wax Tauh — six Zâu Singx-Lingh senz Pha tim yaz nyăngz bux paiđ taih — wax Tauh six cănh nzaox muif huungđ phunz nyâuh yâuc bux phunz nyâuh săngx yaz coong ănz nyâuh wax đomc wac. 27Yaz njâuh peengh oonz phunz nyâuh; Yaz sađ yaz nyăngz peengh oonz phunz nyâuh, yaz phunz nyâuh nyăngz peengh oonz six max năngđ bamh canz phunz. Nyâuh năngx gâyf nyâuđ wangb, yâuc năngx gâyf cumh nzav. 28Nyâuh tuz numđ yaz bux ănz nyâuh coong: ‘Yaz setb ninyh blătc, yaz zef năngx taih lov nyâuh.’ Năngđ coong nyâuh stăngz yaz, nyâuh six numđ nyađ yaz ninyh Pha wa, wâyc Pha six năngx lub têx yaz. 29Nâyx zanyf, nâyx đomc dlayc max zeengx setb yaz coong phunz nyâuh quaix đangc, zu tauv dlayc setb taih nyâuh nzăngđ zen. 30Yaz max coong luungđ phunz nyâuh nzof, wâyc cun nây bamh canz wax tauh jinh đangh taih. Nănh six max naih luungđ lokc jangx cun yaz, 31Six wâyc phunz bamh munh pâyz tuz coong yaz stăngz Tênb-toongh Pha, nzof Tênb-toongh Pha nzaox phunz yaz năngđ laix, yaz yâuc âyz ayx năngđ wa. Nyoongz quef, pănh ninyh gâyh nây gôh.”