Dao Ao Dai Literal Text
Yô-hanx 15
“Yaz six senz tungh cuđ mâyb, yaz nyăngz Pha six songx tungh cuđ nyăngz munh. Laiv stinz quah blaz yaz bix max săngh pyâu, Nănh six pătb ayx queengx; nzof laiv stinz quah săngh pyâu, Nănh six tiuz zany wax stinz quah phunz nănh hayh săngh pyâu năngx nyăuh têx. Nyâuh tuz dlăngc nzof wâyc păngc yaz nzaox nyâuh nyăngz wac. Phanv săngh yămz yaz, yaz songđ săngh yămz nyâuh. Cănh tungh cuđ quah max hayh săngh tuz pyâu năngđ coong nănh max săngh pyaz tungh cuđ mâyb, lauf tinyh năngđ, nyâuh max cănh hayh săngh tuz pyâu năngđ coong nyâuh max săngh yămz yaz. Yaz six tungh cuđ mâyb coonz, nyâuh six quah. Laiv lanh săngh pyaz yaz, yaz songđ săngh plaz nănh, wax lanh six săngh pyâu nyăuh, năngđ coong gâyh goib yaz, nyâuh max hayh ayx tuz setb laiv huungđ. Năngđ coong laiv lanh max săngh yămz yaz, wax lanh six zuc quanyf ayx queengx, cayx năngđ tungh cuđ quah caođ nâyx, munh ston nzâyz taih songđ quanyf nzac tâuf ninyh, stiz songđ zuc tâuf pu nzuf. Năngđ coong nyâuh săngh yămz yaz, yaz nyăngz wac yâuc săngh yămz nyâuh, nyâuh oix nongc laiv luungđ phanv joođ, nyâuh six tuz wax huungđ. Yaz nyăngz Pha tuz munh zanyb, six wâyc nyâuh săngh pyâu nyăuh, yâuc wâyc nyâuh săngh yaz nyăngz stayb sây. Tênb-toongh Pha stăngz yaz ayx laix, yaz lauf stăngz nyâuh năngđ wa nâyx. Oix zuc yămz yaz nyăngz stăngz cah njaf. Năngđ coong nyâuh âyz yaz nyăngz lanyf ayx, nyâuh six oix zuc yămz yaz nyăngz stăngz cah njaf, năngđ yaz âyz yaz nyăngz Pha nyăngz lanyf ayx yâuc yămz Nănh nyăngz stăngz cah njaf nâyx. Yaz coong nâyx đomc dlayc bux nyâuh, phunz nyâuh hayh tuz yaz nyăngz gwanb looc, nyâuh nyăngz gwanb looc yâuc tuz clăkx clunh nzuf. Nây six yaz nyăngz lanyf, nyâuh oix zuc lanh stăngz lanh năngđ yaz stăngz nyâuh nâyx. Max naih laiv huungđ stăngz năngx lub têx nây — six ah lanh munh nyunc tayc cănh nyăngz mengc wâyc nănh nyăngz lah pyeoz toic. Năngđ coong nyâuh âyz yaz nzaox phunz nyâuh nâyx đomc wac ayx, nyâuh six săngh yaz nyăngz lah pyeoz toic. Yaz max hipđ nyâuh ayx pâuz nzof, wâyc pâuz six max pâyz tuz nănh nyăngz zâu ayx luungđ cumh pâuz. Six yaz hipđ nyâuh ayx lah pyeoz toic, wâyc yaz numđ yaz nyăngz Pha coong nyăngz muif huungđ, yaz yâuc bux phunz nyâuh pâyz nzuf. Max zâyf nyâuh sên yaz, six yaz sên nyâuh taih, yâuc njăpc nyâuh phunz nyâuh ninyh, săngh pyâu, nzof nyâuh nyăngz pyâu six tuz stâyv quâyx yămz, nyâuh tim yaz nyăngz bux joođ Tênb-toongh Pha toix laiv huungđ, Nănh six sađ phunz nyâuh. Yaz nzaox nâyx đomc wac bux nyâuh, six phunz nyâuh hayh lanh stăngz lanh. Năngđ coong bamh munh hănđ nyâuh, six oix zuc pâyz coong bamh munh hănđ yaz đangc nyâuh nzof. Năngđ coong nyâuh săngh nây bamh canz nyăngz, bamh munh six cănh stăngz săngh stiz nyăngz munh wax đomc. Six wâyc nyâuh max zâyf săngh nây bamh canz nyăngz, wâyc, yaz sên nyâuh tăng bamh canz setb taih, wâyc nâyx bamh munh songđ hănđ nyâuh. Nyâuh oix zuc săngx yaz bux nyâuh nyăngz wac: ‘Pâuz six max năngx lub têx nănh nyăngz zâu.’ Năngđ coong stiz ayx huđ ănz yaz, stiz lauf ayx huđ ănz nyâuh; năngđ coong stiz âyz yaz nyăngz wac ayx, stiz lauf âyz nyâuh nyăngz wac ayx. Six wâyc yaz nyăngz manyh, stiz six ayx wax đomc muif huungđ dlayc ănz nyâuh, wâyc stiz max pâyz paiđ yaz taih wax Tauh. Năngđ coong yaz max taih nzaox phunz stiz têx, stiz six max naih stoif, six nâyx zanyf, stiz max naih jau pyenv stiz nyăngz stoif gôh. Laiv tauh hănđ yaz six lauf hănđ yaz nyăngz Pha. Năngđ coong yaz max yămz stiz nyăngz mungh tongx ayx, max zeengx naih mănv hayh ayx tuz nyăngz cumh pâuz, stiz six max naih stoif, six wâyc nâyx zanyf stiz tuz phătc nzof, zef năngx hănđ yaz cloon yaz nyăngz Pha. Six, wâyc phunz ja yămz stiz nyăngz gâyf njanh stâub wax đomc wac tuz setb taih toix nzuf coong: ‘Stiz hănđ yaz six max naih coonz tay.’ Tauv Oonz Nyâuđ Wax Tauh taih, six yaz paiđ tăng Tênb-toongh Pha taih wax Tauh phunz nyâuh — six Senz Gâyf wax Tauh Singx-Lingh tăng Tênb-toongh Pha taih — Nănh six ayx zanyx manyf phunz yaz. Six nyâuh lauf ayx zanyx manyf phunz yaz timb, wâyc nyâuh tăng coonz cloon yaz yămz.”
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.