Ya-coopc 1

1Yaz, Ya-coopc ayx Zâu Tênb-Huungh cloon Zâu Yê-su Jix-Tuz nyăngz pâuz, pungx phunz yămz đanv nyăngz săpc nyâyc stingx munh: Numđ nyađ đeh tauv nyâuh.

2Yaz nyăngz yâuf pez lex, nyâuh pongh muif huungđ stâyv nyâuđ nyăngz jau, oix zuc stunx ayx numđ nyađ clăkx clunh nzuf, 3wâyc pâyz tuz coong nyâuh nyăngz zen stimz zuc stâyv, six phunz hayh naih nyâuđ tanyđ tuz. 4Nzof, naih nyâuđ tanyđ tuz yâuc oix zuc ayx năngx nzuf nănh nyăngz cumh pâuz, phunz nyâuh hayh tuz lub taih clăkx clunh nzuf, max sămv laiv huungđ.

5Năngđ coong nyâuh laiv lanh sămv zuc tongb manyh nănh oix zuc joođ Zâu Tênb-Huungh, Zâu Tênb-Huungh six goib âyx sađ phunz munh yâuc max mađ, nzof wax tauh munh songđ tuz sađ tongb manyh phunz. 6Six wax tauh munh oix zuc nongc zen stimz joođ, năngx gâyf nyâyh plungh plănb, wâyc laiv lanh nyâyh plungh plănb six cayx năngđ coiđ gapb loongc nâyx, zuc nzaox stâyb phatb ninyh phatb lauf. 7Wax đomc munh năngđ nâyx gâyf năngx mungc coong stiz hayh tuz stipx laiv huungđ tăng Zâu, 8năngđ nâyx six naih iz tiuh nyâuđ nyăngz munh, ayx laiv huungđ yâuc max tingc.

9Yămz tinc hav nyăngz yâuf pez oix zuc numđ nyađ tanv tauv nănh six tuz saix nyăngz tinc, 10nzof puv quâyx munh lauf oix zuc numđ nyađ tanv tauv nănh hav nyăngz tinc, wâyc nănh six jac ninyh cayx năngđ lâyc jêmh sangc nyăngz mađ phăngh nâyx. 11Bah noib setb taih njah toc joomz pyaz ayx phunz mađ caođ, phăngh yâuc njeengh blâyc nzuf, nănh quai nyăngz jau zuc jac nzuf. Lauf tinyh năngđ, puv quâyx munh yămz stiz ayx nyăngz cumh pâuz, six lauf zuc jac ninyh nzuf.

12Laiv lanh tanyđ tuz hingh stâyv nyâuđ nyăngz jau senz naih oonz looc gôh. Wâyc, tanyđ tuz hingh nănh songđ tuz stipx săngh mengc nyăngz tany, senz Zâu Tênb-Huungh nyunc sađ phunz stăngz Nănh wax đomc munh tuz nyăngz săngh mengc. 13Năngđ coong laiv lanh zuc jaf ayx longđ, năngx gâyf coong: “Zâu Tênb-Huungh jaf yaz,” wâyc zuc okx nyăngz jau six max hayh jaf tuz Zâu Tênb-Huungh, nzof Zâu Tênb-Huungh yâuc max jaf mănv. 14Munh zuc jaf six wâyc cănh nyăngz stimz nyâuđ oix bix zuc hox ninyh ayx stoif. 15Stimz nyâuđ oix nyăngz jau six cayx năngđ naih stinb nâyx, tauv steengb taih six ayx săngh stoif, nzof tauv stoif lub taih, six ayx phunz munh zuc tayc.

16Yaz stăngz nzongf nyăngz yâuf pez lex, năngx gâyf phunz nyâuh zuc jaf. 17Muif huungđ gongx nyăngz pôz cloon muif huungđ clăkx clunh nyăngz sâuđ nyâyc six tăng cah zâyc taih nzuf, yâuc tăng gwăngz nyăngz Pha taih, yămz Nănh six max naih coi wănc yâuc max naih cux quaiz nyăngz zux ix. 18Âyz Nănh tingc taih nyăngz jau, yâuc nongc senz gâyf nyăngz wac steengb pănh taih, phunz pănh tuz ayx tah yetx yămz Nănh zuyx taih nyăngz muif huungđ.

19Yaz stăngz nzongf nyăngz yâuf pez lex, oix zuc pâyz coong: Muif lanh munh zuc mungv năngx căn, năngx gâyf ayx nzetx căn, yâuc năngx gâyf siv totc căn. 20Wâyc munh siv totc six max hayh ayx tuz setb Zâu Tênb-Huungh peengh stimz nyăngz jau. 21Wâyc nây, oix zuc quanyf nzuf muif huungđ naih wâyx nyăngz jau, cloon muif huungđ huđ nyăngz jau, oix zuc nongc dlênc nyâuđ stipx tuz songx ănz nyâuh cah njaf nyăngz wac, six senz hayh njâuv tuz nyâuh nyăngz mengc hoonh wax đomc wac.

22Oix zuc âyz wac ayx, năngx gâyf laic nyâyh coong cungb mungv bix caux, bix jaf cănh nyăngz stinb. 23Wâyc năngđ coong laiv lanh mungv wac bix max âyz ayx, nănh six cayx năngđ ah lanh munh zoz munh sây canyx siux cănh nyăngz minb nâyx. 24Nănh siux mangc tuz songđ setb ninyh, yâuc lênh dlih nyâuđ cob nănh nyăngz minb six năngđ laix. 25Six laiv lanh năngx cayb neetb stimz zah mangc nây clăkx clunh pungx goib nyăngz gâyf njanh, yâuc njinh luh zah mangc, max zâyf mungv blătc bix nyâuđ cob, six nănh yâuc ayx âyz, wax tauh munh six tuz pôz yămz nănh ayx nyăngz jau.

26Năngđ coong laiv lanh laic nyâyh nănh zen gongx bix max cun tuz cănh nyăngz byetc, yâuc cănh njinh luh jaf nănh nyăngz stimz nyâuđ têx, wax tauh munh zen nyăngz jau six max setb laiv huungđ. 27Âyz zen tuz đăngb zeengh yâuc max naih tinc nzêmh yămz pănh nyăngz Pha, Zâu Tênb-Huungh nyăngz cah đangc, six stăngc cux hoonh sây, cloon au qua yămz stiz pongh zâuđ nanc nyăngz săngx huđ, yâuc leđ cănh nyăngz stinb max phunz nây bamh canz nyăngz jau caox ayx cah lôh.