Hipđ-lu 13

1Nyâuh oix zuc stâyv quâyx naih lanh stăngz lanh. 2Năngx gâyf quanyf stipx zeb nyăngz jau, naih munh ayx nâyx đomc jau, bix stipx wax đomc stinz munh yâuc max pâyz. 3Oix zuc săngx tauv zuc yămz nzauh wax đomc munh, ayx cayx năngđ cloon stiz songđ zuc njab langb stayb, yâuc săngx tauv zuc ayx huđ ănz wax đomc munh, ayx cayx năngđ nyâuh lauf cloon stiz songc ah nomz stinb nâyx. 4Yămz nyâuh cah njaf oix zuc zanyb zoongz pyau nyăngz jau, yămz zâuv bôngh njaf six oix zuc max naih wâyx, wâyc Zâu Tênb-Huungh six stămđ wax đomc ayx pongz lauh nyăngz munh cloon wax đomc văngf munh nyăngz munh. 5Nyâuh ayx nhlinc ayx yămz six năngx gâyf mauh nyanh, oix zuc pong nyâuđ nyâuh naih nyăngz tax huungđ, wâyc Zâu Tênb-Huungh cănh coong: “Yaz six max naih laiv zanyf gâyh mâyh, nzof Yaz yâuc max naih laiv zanyf quanyf mâyh,” 6năngđ nây, pănh six tuz pungx stimz coong:

“Zâu six stăngc yaz wax Tauh yaz songđ max cumh nzav.

Munh cayx ayx laix ănz yaz?”

7Oix zuc săngx tauv yenv ênz nyâuh wax đomc munh, six nzaox Zâu Tênb-Huungh nyăngz gâyf phunz nyâuh wax đomc, oix zuc mangc stiz yămz stâyv sangc ayx nyăngz jau six năngđ laix, yâuc oix zuc ayx âyz stiz nyăngz zen stimz. 8Zâu Yê-su Jix-Tuz cumh noib nâyx noib ninyh tauv banc stâyv banc đaic lauf max coi wănc. 9Năngx gâyf phunz wax đomc gâyf njingc taih njaf nyâuh. Wâyc gongx nyăngz stimz nyâuđ six tuz clăkx clunh păngc yămz Zâu nyăngz pôz, max zâyf păngc wax đomc nhlinc hopb, laiv lanh păngc wax đomc jau six max hayh tuz luungđ gongx. 10Pănh naih ah nomz congx tinc, yămz nây congx tinc, wax đomc ayx cumh pâuz yămz wa njiuh tamf nyăngz munh six max tuz naih gâyf nhlinc. 11Wâyc stav stoif nyăngz samđ, six tăng stanyb hauđ setb taih, tuz stayb munh pyây nzâyz nzac wax đomc đăngb zeengh nyăngz tinc muf, nzof stiz nyăngz stayđ six zuc nzâyz ninyh pu ănz wa njiuh cungh ngwaic. 12Wâyc nây Zâu Yê-su lauf zuc yămz wa dlanyh jeengh cungh ngwaic tanyđ zâuđ, phunz Nănh hayh nongc Nănh cănh nyăngz samđ stav đăngb songx munh. 13Wâyc nây, pănh sămv zuc ninyh cloon Nănh yămz wa njiuh cungh ngwaic, cloon Nănh tanyđ nyayz. 14Wâyc yămz nây pănh six max naih laiv nomz dlanyh stâyv quâyx yămz, nzof pănh six jinh đangh lov ah nomz cayx taih nyăngz dlanyh. 15Păngc Nănh pănh bix bix tuz nongc tanv nyăngz wac ayx stanyb lanyh stungx phunz Zâu Tênb-Huungh yămz manf dlayc, nây six nongc nzetx nhlimc Nănh nyăngz manyh nyăngz cumh pâuz. 16Yâuc năngx gâyf nyâuđ cob ayx gongx nyăngz cumh pâuz cloon setb stimz stăngc munh nyăngz jau, wâyc nâyx đomc năngđ nâyx six stanyb lanyh hoopđ Zâu Tênb-Huungh nyăngz nyâuđ. 17Oix zuc mungv yâuc buc yenv ênz nyâuh wax đomc munh, wâyc stiz sting điub jămđ nyâuh nyăngz mengc hoonh, cayx năngđ bâyf zuc ninyh coong manyf setb taih nâyx, phunz stiz hayh naih nyâuđ numđ nyađ ayx wax đomc cumh pâuz yâuc max yônx luungđ, wâyc nâyx đomc six max stăngc phunz nyâuđ tuz gongx.

18Oix zuc cloo Zâu phunz buz, wâyc buz pâyz tuz coong buz naih gongx nyăngz stimz nyâuđ, songđ numđ oix yămz manf dlayc hayh ayx tuz clăkx clunh. 19Six yaz yâuc oix quinb nyâuh ayx năngđ nâyx năngx nzongf têx timb, phunz yaz tuz pungx muf pongh nyâuh năngx căn.

20Peengh oonz nyăngz Zâu Tênb-Huungh, Nănh njăpc Lub Quaix Wax Tauh Jămđ Pax Jiz Yuungh Nyăngz Zâu taih, six pănh nyăngz Zâu Yê-su, tăng tayc săngh taih păngc njăpc nhlengc wac nyăngz stâyv quâyx samđ, 21cloo Nănh bênc nyâuh taih nongc phunz muif huungđ gongx nyăngz jau, nongc ayx âyz Nănh nyăngz zux ix, phunz pănh hayh ayx hoopđ nyăngz jau yămz Nănh nyăngz cah đangc, păngc Zâu Yê-su Jix-Tuz, senz tuz naih gwăngz eeng tauv banc stâyv banc đaic wax Tauh. A-meen.

22Yâuf pez lex, yaz quinb nyâuh oix zuc numđ nyađ stipx nây quinb nyăngz wac, wâyc yaz cungb ja cay tix zâux wac phunz nyâuh lêc. 23Nyâuh pâyz coong pănh nyăngz yâuf pez Ti-mô-tai tuz pungx goib nzof, năngđ coong nănh taih nây căn yaz six tuz cloon nănh ninyh pongh nyâuh.

24Joođ đeh tauv yetx stong yenv ênz nyâuh wax đomc munh cloon yetx stong đăngb zeengh nyăngz munh. Tăng I-ta-li wax đomc đăngb zeengh nyăngz munh lauf đeh tauv nyâuh.

25Cloo Zâu nyăngz pôz cloon nyâuh tinyh đoih yămz.