Dao Ao Dai Literal Text
Ya-coopc 2
Yaz nyăngz yâuf pez lex, nyâuh zen pănh nyăngz Zâu, six gwăngz eeng nyăngz Zâu Yê-su Jix-Tuz, yâuc năngx gâyf pyac mănv. Jangx pây năngđ coong naih ah lanh munh tăngh sămz bah đoz quinb yâuc zuz nhlêuf nyăngz guyz quav nzac nyâuh nyăngz huyđ toongh cah njaf ninyh, zef naih ah lanh munh zâuđ munh zuz guyz quav yootz lauf nzac ninyh, bix năngđ coong nyâuh zanyb zuz nhlêuf guyz quav wax tauh yâuc coong: “Joođ mâyh taih stâyv nây gongx quaix nyăngz tinc bex,” nyâuh zef coong ănz wax lanh munh zâuđ munh, coong: “Mâyh ninyh stâuđ wa,” max six “Taih stâyv yaz nây staux sinh,” năngđ nâyx max zâyf yămz nyâuh cah njaf naih lanyc ayx sax loif munh, yâuc nongc okx nyăngz zux ix taih stămđ munh haz? Yaz stăngz nzongf nyăngz yâuf pez lex, oix zuc mungv bex: Ha max zâyf Zâu Tênb-Huungh sên bamh canz nyăngz munh zâuđ munh taih, nongc phunz stiz tuz puv quâyx yămz zen stimz yâuc phunz stiz tuz stipx Nănh nyunc phunz stăngz Nănh wax đomc munh nyăngz côkz haz? Năngđ nâyx nyâuh bix ninyh mangc stam munh zâuđ munh! Ha max zâyf puv quâyx munh ayx đokc ănz nyâuh nzof stiz yâuc hayh ênz nyâuh ninyh wa stămđ zăngc tinc haz? Max zâyf stiz hayh coong jămb ănz nyâuh đamz wax nomz saix nyăngz manyh haz?
Six, năngđ coong nyâuh âyz Zâu Tênb-Huungh nyăngz gâyf njanh ayx tuz clăkx clunh nzuf, cayx năngđ Canyx Stâub coong: “Oix zuc stăngz mâyh nyăngz cah sinh munh cayx năngđ cănh nyăngz stinb nâyx”, nyâuh six ayx tuz hoopđ gôh. Six năngđ coong nyâuh pyac munh, nyâuh six longđ stoif, yâuc zuc gâyf njanh tingc stoif cayx năngđ ah lanh pamf gâyf nyăngz munh. Wâyc laiv tauh âyz nzuf gâyf njanh, bix ayx longđ ah tiuh, six lauf cayx năngđ longđ nzuf muif tiuh. Wâyc Zâu Tênb-Huungh coong: “Năngx gâyf văngf munh,” yâuc coong: “Năngx gâyf tayx munh.” Six năngđ coong mâyh max ninyh văngf munh, bix ninyh tayx munh têx mâyh six lauf pênx pamf gâyf njanh nyăngz munh. Wâyc nây njinh coong nyăngz wac cloon ayx nyăngz jau oix zuc ayx cayx năngđ zuc pungx goib nyăngz gâyf njanh stămđ pănh nâyx. Wâyc laiv lanh max naih nyâuđ hâuđ lênh munh, lauf max tuz hâuđ lênh yămz stămđ stoif nyăngz jau. Naih nyâuđ hâuđ lênh munh nyăngz jau six tuz hingh quaix stămđ stoif nyăngz jau!
Yaz nyăngz yâuf pez lex, năngđ coong naih munh coong, yaz naih zen stimz six yâuc max naih cumh pâuz ayx, bix naih luungđ săngh nongc heh? Nănh nyăngz zen stimz six max hayh njâuv tuz nănh, zâyf max? Jangx pây năngđ coong naih tix lanh yâuf pez max six ô stayx max naih guyz quav zuz yâuc max naih muif noib nyăngz nhlinc hopb, six nyâuh naih ah lanh coong ănz stiz coong: “Peengh oonz muf bex, zuz năngx joomz, nhlinc năngx pêu bex,” six nyâuh yâuc max phunz stiz nyăngz stinb sămv nongc nyăngz tax huungđ, bix naih luungđ gongx heh? Zen stimz lauf năngđ nâyx, năngđ coong max naih cumh pâuz ayx nănh six tayc.
Nzof, naih munh six coong: “Mâyh naih zen stimz, six yaz naih cumh pâuz ayx.” Phanv phunz yaz mangc zen stimz bix max naih cumh pâuz ayx yămz mâyh đangc, nzof yaz six cănh phunz mâyh mangc zen stimz naih cloon cumh pâuz ayx yămz yaz. Mâyh zen coong cungb naih ah tauh Zâu Tênb-Huungh cuungv. Mâyh zen toix gôh. Manđ lauf zen tuz stinb sinx nzuf. Munh oongx munh lex, mâyh oix pâyz tuz coong zen stimz bix max naih cumh pâuz ayx six max setb laiv huungđ max? Ha max zâyf pănh nyăngz claof jex, Apx-la-ham, six păngc cumh pâuz ayx bix tuz stunx ayx peengh stimz, wâyc nănh stungx nănh nyăngz toonz I-sakx, ănz wa congx tinc haz? Mâyh phătc nănh nyăngz zen stimz naih payh cloon cumh pâuz ayx max, yâuc păngc cumh pâuz ayx, zen stimz nzăngđ tuz clăkx clunh. Năngđ nây six tuz toix nzuf Canyx Stâub coong nyăngz wac, coong: “Apx-la-ham zen Zâu Tênb-Huungh, wâyc nây nănh bix tuz stunx ayx peengh stimz”, nzof nănh yâuc tuz hipđ ayx Zâu Tênb-Huungh nyăngz lah pyeoz toic. Nyâuh phătc max, munh tuz stunx ayx peengh stimz six yămz cumh pâuz ayx, max zâyf cungb păngc zen stimz cuungv. Lauf tinyh năngđ, ha max zâyf maic stinb wax tauh munh sab La-hapx, lauf păngc cumh pâuz ayx bix tuz stunx ayx peengh stimz haz, wâyc nănh stipx tuz paiđ ninyh wax đomc munh yâuc ênz stiz quaix pitc stinz jau muf? Lauf cayx năngđ stinb max naih hoonh six tayc, zen stimz max naih cumh pâuz ayx six lauf tayc năngđ wa nâyx.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.