Skip to content
BibleKenya

Dao Ao Dai Literal Text

Hipđ-lu 4

Wâyc nây, pănh hoopđ zuc pâyz cumh nzav, săngx đanyf năngx jinh naih nyunc wac tuz nzac Nănh nyăngz hitb conv tinc nyăngz săngx huđ, nyâuh bix zef naih tix lanh zuc seetb blătc. Wâyc Cuđ Jenx lauf tuz nzônh phunz pănh, cayx năngđ wax đomc munh nâyx. Six, stiz numđ nyăngz wac yâuc max hayh stăngc tuz stiz laiv huungđ, wâyc stiz tuz numđ six yâuc max nongc zen stimz bix stipx. Năngx naih pănh six wax đomc zen nyăngz munh, songđ tuz nzac hitb conv tinc, âyz năngđ Nănh coong nâyx, coong:

“Cayx năngđ Yaz siv nhlenx bix nyunc nyăngz wac nâyx,

‘… stiz six stâyv quâyx max tuz nzac Yaz nyăngz hitb conv tinc!’”

max cun Nănh nyăngz cumh pâuz bâyf tuz ayx soongb nzuf nzof, tăng ah yac zuyx guungh zuyx nib wax zanyf. Wâyc naih lauh đoif Nănh yâuc coong tauv tah jetb wax noib, coong:

“Tah jetb wax noib Zâu Tênb-Huungh sec Nănh nyăngz muif huungđ cumh pâuz.”

Nzof năngx naih pitc đoif yâuc coong:

“… Stiz six stâyv quâyx max hayh tuz nzac Yaz nyăngz hitb conv tinc.”

Năngđ nây, nyunc nyăngz wac lauf năngx jinh naih nongc njâuh phunz ah phanx munh hayh tuz nzac wax nomz hitb conv tinc, wâyc cah đangc tuz numđ Cuđ Jenx wax đomc munh max tuz nzac wâyc stiz max mungv wac, Zâu Tênb-Huungh songđ tingc ah noib taih, hipđ ayx “Nâyx yenh noib,” Nănh coong quaix Đa-witx taih quaix đangz lauh yongb nzof, cayx năngđ tuz coong yămz wa cah zâyc nyăngz wac nâyx, coong:

“Nâyx yenh noib, năngđ coong nyâuh numđ Nănh nyăngz wac,

six năngx gâyf ayx nyâuh nyăngz nyâuđ nhlengc.”

Wâyc năngđ coong Yô-su-wa phunz pec stingx tuz hitb conv têx, yămz nây cah đangz phanx Nănh yâuc max zâuđ năngx coong tauv pitc noib nzof gôh. Wâyc nây, lauf năngx naih ah nomz hitb conv tingc congz noib nongc phunz Zâu Tênb-Huungh nyăngz pec stingx. Wâyc laiv lanh tuz nzac Zâu Tênb-Huungh nyăngz hitb conv tinc, wax lanh munh lauf sec nănh nyăngz cumh pâuz, cayx năngđ Zâu Tênb-Huungh sec Nănh nyăngz cumh pâuz nâyx. Năngđ nây, pănh oix zuc joomz nyâuđ nzac wax nomz hitb conv tinc, phunz max naih mănv zuc tuih cayx năngđ wax đomc max mungv wac nyăngz munh nâyx. Wâyc Zâu Tênb-Huungh nyăngz wac six săngh, naih jab, yâuc năngx njayc quaix wax đomc iz minb njayc nyăngz nzuc đao, nzopb tauv mengc cloon hoonh tinyh căpx nyăngz tinc, njinh stung tinyh căpx cloon stung laub, yâuc hayh stămđ tuz wax đomc pyây lâyc nyâyh nyăngz jau cloon stimz nyâuđ oix nyăngz jau. Max naih laiv huungđ hayh pinyx tuz Zâu Tênb-Huungh. Nzof, muif huungđ six zuc hinđ manyf setb taih yămz Nănh nyăngz cah đangc, Nănh six pănh zuc coong nzuf muif huungđ phunz wax Tauh.

Năngđ nây, wâyc năngx jinh naih ah tauh stayb munh pyây lub quaix blătc nzuf wax đomc muif tab guungh, six Zâu Yê-su Zâu Tênb-Huungh nyăngz Toonz, pănh songđ oix zuc nzauf năngx tăngđ pănh nhlimc nyăngz wac. Wâyc pănh six max zâyf naih ah tauh stayb munh pyây, max hayh pâyz tuz pănh đoonh nyăngz jau, six plănc taih Nănh zuc pongh muif huungđ stâyv nyâuđ quaix nzuf cayx năngđ pănh nâyx, six Nănh max longđ laiv huungđ stoif. Năngđ nây, pănh oix zuc pungx stimz ninyh yămz stătx sađ pôz nyăngz huungh tinc, phunz hayh tuz hâuđ lênh yâuc tuz pôz yămz toix pănh sămv zuc stăngc nyăngz săngx huđ.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.