Dao Ao Dai Literal Text
Hipđ-lu 3
Wâyc nâyx, đăngb zeengh nyăngz yâuf pez lex, six senz tuz tăng guungh sên taih nyăngz munh, oix zuc năngx cayb nyâyh tauv tuz Paiđ Taih Wax Tauh, cloon săngh Stayb Munh Pyây six pănh nhlimc nyăngz wac, six Zâu Yê-su, Nănh six neetb stimz cloon njăpc Nănh taih wax Tauh, lauf cayx năngđ Mô-sê neetb stimz cloon Zâu Tênb-Huungh nyăngz pyau njaf munh nâyx. Wâyc nâyx Tauh Zâu Yê-su tuz stunx coong, payh tuz stipx gwăngz eeng năngx lub têx Mô-sê, lauf cayx năngđ zâyv pyau nyăngz munh tuz zanyb saix năngx nzongf têx wax sênz pyau. Wâyc muif sênz pyau six lauf tuz tăng ah lanh munh zâyv taih, nzof Zâu Tênb-Huungh six zuyx muif huungđ taih wax Tauh. Mô-sê yâuc neetb stimz cayx năngđ ah lanh pâuz yămz Zâu Tênb-Huungh nyăngz pyau, nongc ayx zanyx manyf coong tauv cah đangz phanx tuz lănv nzônh nyăngz dlayc; Zâu Jix-Tuz, six neetb stimz cayx năngđ ah lanh Toonz cun Zâu Tênb-Huungh nyăngz pyau njaf munh (nzof Zâu nyăngz pyau njaf munh six pănh, tinyh phanv pănh nzac jab nzauf năngx tăngđ pănh nyăngz zen stimz cloon pănh naih nyăngz njih mungc ayx tuz tauv stêtb mâyv). Wâyc nây, cayx năngđ Zâu Singx-Lingh coong:
“Năngđ coong, nâyx noib nyâuh numđ Nănh nyăngz wac,
six năngx gâyf ayx nyâuh nyăngz nyâuđ nhlengc,
cayx năngđ sêu lunc wax zanyf nâyx,
six zuc stâyv yămz wa stâyz phangz blănf nyăngz săngx huđ
yămz wa nyâuh wax đomc claof jex phătc Yaz ayx nyăngz cumh pâuz,
stiz bix năngx stâyv Yaz,
ayx tuz stâyx săpc nyăngv cah njaf. Wâyc nây, Yaz songđ numđ nhlenx wax nzêuh munh,
Yaz nzăngđ coong: ‘Stiz six zuc njinh luh ayx phunz stiz nyăngz nyâuđ nhlengc,
stiz yâuc max hayh pâyz tuz Yaz nyăngz jau.’
Yaz siv nhlenx nyăngz săngx huđ Yaz songđ nyunc wac, coong:
‘… Stiz six max tuz nzac Yaz nyăngz hitb conv tinc!’”
Yâuf pez lex, oix zuc năngx cayb bôngh, săngx đanyf yămz nyâuh cah njaf hayh naih tix lanh nyâuđ huđ max zen, bix ninyh gâyh stâyv quâyx săngh nyăngz Zâu Tênb-Huungh côz. Six, oix zuc muif noib lanh oonz lanh nyăngz nyâuđ, tinyh phanv năngx tuz hipđ ayx “nâyx yenh noib,” phunz yămz nyâuh cah njaf max naih laiv lanh zuc stoif jaf ayx phunz nyâuđ nhlengc. Wâyc pănh six pênx tuz cloon Zâu Jix-Tuz songc phănc nyăngz munh, tinyh phanv pănh nzauf pănh ah yac nyăngz zen stimz năngx tăngđ ayx tuz tauv stêtb mâyv, cayx năngđ naih ja coong:
“Năngđ coong, nâyx yenh nyâuh numđ Nănh nyăngz wac,
six năngx gâyf ayx nyâuh nyăngz nyâuđ nhlengc,
cayx năngđ sêu lunc wax zanyf nâyx.”
Laiv đomc munh six mungv Nănh nyăngz wac bix zef năngx nyâuđ nhlengc heh? Ha max zâyf wax đomc tuz Mô-sê ênz setb I-yipx stâyz phangz wax đomc munh haz? Nzof Zâu Tênb-Huungh nhlenx cloon laiv đomc munh tuz stâyx săpc nyăngv cah njaf heh? Ha max zâyf nhlenx wax đomc longđ stoif nyăngz munh, bix stiz nyăngz stayđ songđ zuc glinyf yămz wa stâyz phangz blănf wax đomc haz? Nzof Nănh nyunc wac cloon laiv đomc munh coong, stiz six max tuz nzac Nănh nyăngz hitb conv tinc nâyx heh, ha max zâyf cloon wax đomc max mungv wac nyăngz munh haz? Pănh phătc stiz max hayh tuz nzac six wâyc stiz nyăngz nyâuđ max zen.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.