Ga-la-ti 2:20

1Tăng wa săpc stâyx nyăngv cah đangz, yaz zef cloon Ba-na-batc ninyh wa Yê-lu-sa-lem, yâuc ênz cloon Ti-tatc ninyh. 2Wax zanyf, âyz hinđ yangh nyăngz jau, yaz ninyh wa nzônh Cuđ Jenx phunz stiz, cayx năngđ yaz nzônh phunz wax đomc pitc stingx munh nâyx, six cungb lanyc coong ănz wax đomc naih minb mâyc njăngb nyăngz munh cuungv, cungb wangb săngx đanyf yaz hănđ tiuv lauf cungb tiuv bix max setb laiv huungđ. 3Max cun Ti-tatc six Hi-lapc munh, cloon yaz ninyh, yâuc max zuc yac ayx quaix catz. 4Buz ayx năngđ nâyx six wâyc naih ah phanx za nyăngz munh, stiz nimx nzac taih nongc seetx mangc buz tuz pungx goib nyăngz jau, senz buz yămz Zâu Yê-su Jix-Tuz bix tuz pungx goib nyăngz jau, phunz stiz hayh zoz buz nongc ayx nâuh, 5wâyc nây buz songđ max nyangc nănh stiz tix cay tiny, phunz Cuđ Jenx nyăngz senz gâyf hayh tuz stâyv quâyx yămz cloon nyâuh. 6Nzof coong tauv wax đomc naih minb mâyc njăngb nyăngz munh (cah đangc stiz six năngđ laix yâuc max quenđ tauv yaz ax tiny; wâyc Zâu Tênb-Huungh six max pyac toix laiv lanh) — wax đomc munh hănđ six naih minb mâyc njăngb lauf max stăngc tuz yaz laiv huungđ tiny. 7Six, tauv pâyz tuz coong yaz tuz jaoz phunz nongc nzônh Cuđ Jenx phunz max quaix catz nyăngz munh, cayx năngđ Pi-tê tuz jaoz phunz nongc nzônh Cuđ Jenx phunz ayx quaix catz nyăngz munh nâyx 8(wâyc ayx phunz Pi-tê săngh cumh pâuz munh yămz wax đomc ayx quaix catz nyăngz munh wax Tauh, lauf ayx phunz yaz săngh cumh pâuz munh yămz wax đomc pitc stingx munh), 9tauv pâyz tuz coong Zâu nyăngz pôz tuz sađ phunz yaz, Ya-coopc, Sê-pha, cloon Yô-hanx, six ayx coonz nyăngz munh, songđ stuungb byaoh puf cloon buz tinyh tokb, six Ba-na-batc cloon yaz, phunz buz six huungv staox wax đomc pitc stingx munh ninyh, nzof stiz six huungv staox wax đomc ayx quaix catz nyăngz munh ninyh, 10yâuc zăpx coong buz oix zuc săngx tauv munh zâuđ munh, six lauf yaz jinh đangh joomz nyâuđ ayx nyăngz cumh pâuz.

11Six tauv Sê-pha ninyh tauv An-ti-ôkx dlanyh, yaz songđ toongx minb mađ nănh wâyc nănh payh tuz zuc mađ. 12Wâyc Ya-coopc wax đomc munh taih max zeengx tauv wax zanyf, nănh six cloon wax đomc pitc stingx munh songđ nhlinc. Six tauv stiz taih, nănh lov jau tiuv ninyh cănh yămz lanyc, wâyc cumh nzav wax đomc ayx quaix catz nyăngz munh. 13Nzof wax đomc Yu-tai munh songđ âyz nănh nyăngz gao ayx, ayx tuz njinh Ba-na-batc lauf zuc hox âyz stiz wax huungđ pâyh zac nyâuđ yootz nyăngz gao. 14Six tauv yaz phătc stiz jinh đangh max âyz Cuđ Jenx nyăngz senz gâyf ayx, yaz songx toongx songx mađ Sê-pha, coong: “Năngđ coong mâyh six Yu-tai munh, bix yămz ayx cayx năngđ pitc stingx munh max năngđ Yu-tai munh, mâyh bix laiv ayx laix hayh yac êu pitc stingx munh zuc yămz ayx cayx năngđ Yu-tai munh heh?” 15Buz tăng steengb taih six Yu-tai munh, max zâyf tăng pitc stingx naih stoif nyăngz munh setb taih; 16Six wâyc pâyz tuz coong max naih laiv lanh păngc yămz ayx âyz gâyf njanh bix tuz stunx ayx peengh stimz, blătc nzuf păngc zen yămz Zâu Yê-su Jix-Tuz, wâyc nây buz songđ nongc nyâuđ zen caođ Zâu Yê-su Jix-Tuz, phunz buz tuz stunx ayx peengh stimz, păngc zen yămz Zâu Jix-Tuz bix max zâyf păngc yămz ayx âyz gâyf njanh. Wâyc muif lanh munh six max hayh tuz stunx ayx peengh stimz yămz ayx âyz gâyf njanh nyăngz jau. 17Six năngđ coong, buz jinh đangh lov jau ayx phunz tuz stunx ayx peengh stimz yămz Zâu Jix-Tuz, buz bix zuc mangc ayx cayx năngđ cay naih stoif nyăngz munh, ha nâyx Zâu Jix-Tuz six taih ayx nâuh phunz stoif yah? Cănh mayv zâyf nâyx! 18Wâyc năngđ coong yaz zef ninyh zâyv yaz toou lunc nyăngz tax huungđ, yaz six cănh hinđ manyf coong yaz six ayx longđ nyăngz munh. 19Wâyc zuc yămz gâyf njanh yaz six tayc cloon gâyf njanh, phunz yaz hayh tuz săngh wâyc Zâu Tênb-Huungh. Yaz zuc tingz jămz ănz săpc đăngc zax cloon Zâu Jix-Tuz nzof, 20wâyc nây max zâyf yaz săngh nzof, six Zâu Jix-Tuz săngh yămz yaz cah njaf. Nâyx zanyf yaz năngx jinh săngh yămz nây stinb a nyăngz săngx huđ, yaz six săngh wâyc zen caođ Zâu Tênb-Huungh nyăngz toonz, senz stăngz yaz bix sađ Nănh cănh nyăngz mengc tayv phunz yaz wax Tauh. 21Yaz max quanyf Zâu Tênb-Huungh nyăngz pôz đêh, wâyc năngđ coong păngc gâyf njanh bix tuz stunx ayx peengh stimz, têx Zâu Jix-Tuz tayc six max setb laiv huungđ!