Ga-la-ti 3

1Ô nyâuh đomc Ga-la-ti munh oongx lex! Mănv ayx jeengz stâyz ănz nyâuh, ayx tuz toongx nyâuh nyăngz minb, Zâu Yê-su Jix-Tuz bix zuc tingz jămz ănz săpc đăngc zax manyf tuz nâyx nzof? 2Yaz cungb oix naic nyâuh nâyx zâux wac cuungv: Nyâuh tuz stipx Singx-Lingh six păngc âyz gâyf njanh ayx max six păngc mungv bix zen heh? 3Săngh laix nyâuh bix oongx tuz nâyx heh? Nyâuh quef coonz tăng Zâu Singx-Lingh nâyx zanyf zef oix âyz stinb a bix pac? 4Nyâuh cayx ayx phunz nyâuh tanyđ quaix taih nyăngz zâuđ nanc pênx max setb laiv huungđ mah? — Năngđ coong nâyx six senz max setb luungđ gôh! 5Ha Zâu Tênb-Huungh sađ Singx-Lingh phunz nyâuh yâuc ayx wax đomc jix caox njingc yămz nyâuh cah njaf, wax đomc six păngc yămz ayx âyz gâyf njanh, max six păngc yămz mungv bix zen heh? 6Năngđ Apx-la-ham “zen caođ Zâu Tênb-Huungh, nănh bix tuz stunx hipđ ayx peengh stimz,” 7năngđ nây oix zuc pâyz coong laiv lanh naih zen stimz, six săngh Apx-la-ham nyăngz sây stunz. 8Six tauv pâyz tuz coong Zâu Tênb-Huungh stunx pitc stingx munh ayx peengh stimz yămz zen stimz, wâyc Canyx stâub coong tauv nây Cuđ Jenx quaix đangc phunz Apx-la-ham coong: “Tăng mâyh manf stingx munh six tuz pôz.” 9Wâyc nây, laiv lanh naih zen stimz six tuz pôz cloon Apx-la-ham, naih zen stimz nyăngz munh. 10Pâyz sax lanh munh păngc ayx âyz gâyf njanh yâuc jinh đangh zuc zaux; wâyc naih ja coong: “Laiv lanh max nongc nyâuđ âyz ja yămz gâyf njanh stâub wax đomc gâyf ayx six payh tuz zuc zaux.” 11Six wâyc max naih mănv hayh păngc gâyf njanh bix tuz stunx ayx peengh stimz yămz Zâu Tênb-Huungh nyăngz cah đangc, wâyc “peengh stimz nyăngz munh six săngh păngc yămz zen stimz.” 12Nzof gâyf njanh six max zâyf tăng zen stimz taih, six “laiv lanh ayx wax đomc gâyf njanh nyăngz cumh pâuz six păngc wa bix săngh.” 13Zâu Jix-Tuz suc pănh tuz gâyh đutb zuc zaux yămz gâyf njanh nyăngz jau, songđ cănh tanyđ zuc zaux tayv phunz pănh — wâyc naih wac ja coong: “Laiv lanh zuc tingz ănz săpc đăngc zax senz payh tuz zuc zaux gôh” — 14phunz Apx-la-ham nyăngz pôz tuz ninyh phunz tauv pitc stingx munh yămz Zâu Yê-su Jix-Tuz, phunz pănh hayh tuz stipx nyunc sađ phunz nyăngz Singx-Lingh păngc yămz zen stimz.

15Yâuf pez lex, yaz âyz bamh munh nyăngz zux ix coong. Hănđ ayx laix, lauf max naih mănv hayh quanyf max six pâu ănz munh njăpc quaix nyăngz nyunc wac. 16Nzof, wax đomc nyunc nyăngz wac six tuz coong phunz Apx-la-ham cloon nănh nyăngz sây stunz, wax zâux wac max coong “phunz cloon wax đomc sây stunz” năngđ si tauv đuungx lanh munh, six coong “phunz cloon mâyh nyăngz sây stunz” nây six si tauv ah lanh munh, nzof nâyx lanh munh six Zâu Jix-Tuz. 17Six yaz oix coong: Ayx tuz tauv stâyx pez stamx săpc njăngv cah đangz, gâyf njanh lauf max hayh ayx phunz Zâu Tênb-Huungh njăpc quaix nyăngz nyunc nhlengc wac stam ninyh. 18Wâyc zuc năngđ coong nyunc phunz nyăngz phănc six tăng Gâyf njanh taih, têx six max zâyf tăng nyunc nyăngz wac nzof. Six Zâu Tênb-Huungh sađ pôz phunz Apx-la-ham six tăng nyunc nyăngz wac. 19Ha nâyx, gâyf njanh six nongc ayx luungđ heh? Gâyf njanh tuz njăpc taih six wâyc ayx longđ nyăngz jau, tuz paiđ phunz tăng wax đomc stinz munh jaoz tauv ah lanh mungh tongx munh, zu tauv laiv zanyf wax tauh sây stunz taih tauv, nzof nyunc nyăngz wac yâuc tuz njăpc taih yămz wax tauh sây stunz. 20Six mungh tongx munh six max zâyf cungb nongc phunz ah leepb cuungv, nzof Zâu Tênb-Huungh six cungb ah tauh đokc. 21Ha nâyx, gâyf njanh six nzeengz cloon nyunc nyăngz wac max six heh? Yâuc max zâyf! Wâyc zuc năngđ coong gâyf njanh tuz sađ phunz bix năngx hayh ayx phunz tuz săngh, têx peengh stimz nyăngz jau six bâyf lauf tăng gâyf njanh taih. 22Six Canyx Stâub zoz muif huungđ clăngđ ănz stoif nyăngz cah đi nzuf, nongc phunz păngc zen yămz Zâu Yê-su Jix-Tuz, bix nyunc nyăngz wac nzăngđ tuz sađ phunz wax đomc naih nyâuđ zen nyăngz munh.

23Cah đangc nâyx huungđ zen stimz max zeengx taih nyăngz săngx huđ, pănh six zuc clăngđ yămz gâyf njanh cah đi, zuc clăngđ ayx tuz tauv zen stimz tuz hinđ manyf setb taih. 24Ayx tuz, gâyf njanh pênx ah lanh munh jămđ nzaox pănh nongc phunz Zâu Jix-Tuz, phunz pănh nzăngđ hayh tuz stunx ayx peengh stimz yămz zen stimz. 25Six tauv zen stimz taih, pănh nzăngđ max zuc yămz jămđ nzaox wax tauh nyăngz puf đi. 26Wâyc nyâuh muif lanh six păngc zen yămz Zâu Yê-su Jix-Tuz, bix săngh Zâu Tênb-Huungh nyăngz toonz sab. 27Wâyc zuc Tinyh phanv laiv lanh ayx quaix-gâyf yămz Zâu Jix-Tuz, six tuz cloon Zâu Jix-Tuz songc mengc săngh. 28Max cănh lanyc Yu-tai munh max six Hi-lapc munh, max cănh lanyc ayx nâuh max six max ayx nâuh, max cănh lanyc toonz max six sab, wâyc zuc nyâuh yetx stong six tinyh songc yămz Zâu Yê-su Jix-Tuz nzuf. 29Nzof năngđ coong nyâuh six săngh Zâu Jix-Tuz nyăngz, nyâuh six lauf săngh Apx-la-ham nyăngz sây stunz, senz tuz stipx nyunc phunz nyăngz phănc wax đomc munh.