Ga-la-ti 1

1Yaz, Phao-lô, ayx ah lanh cumh pâuz munh — max zâyf tăng bamh munh, yâuc max zâyf tăng laiv lanh munh taih, six tăng Zâu Yê-su Jix-Tuz cloon Zâu Tênb-Huungh six Pha, senz ayx phunz Nănh tăng tayc săngh taih wax Tauh — 2cloon yaz yămz nây nyăngz yâuf pez tinyh đoih, pungx phunz yămz Ga-la-ti stâyz phangz wax đomc jiux pangx: 3Joođ Zâu Tênb-Huungh, six Pha cloon pănh nyăngz Zâu Yê-su Jix-Tuz, sađ pôz, sađ peengh oonz phunz nyâuh, 4Nănh wâyc pănh nyăngz stoif bix sađ cănh nyăngz mengc, phunz Nănh hayh njâuv pănh gâyh đutb nâyx yenh stâyv okx nzongf nyăngz jau, âyz pănh nyăngz Pha, Zâu Tênb-Huungh nyăngz zux ix. 5Cloo phunz Nănh tuz gwăngz eeng tauv banc stâyv banc đaic. A-meen.

6Yaz numđ njingc nzongf wâyc phătc nyâuh coonx winb đangz ănz nongc Zâu Jix-Tuz nyăngz pôz bix êu nyâuh taih wax Tauh, bix ninyh lêpc pitc huungđ Cuđ Jenx, 7senz six max naih pitc huungđ Cuđ Jenx đêh, six wâyc naih ah phanx munh cungb oix loou ayx phunz nyâuh nyăngz nyâuđ lunc, yâuc oix tăng Zâu Jix-Tuz nyăngz Cuđ Jenx. 8Six max cun hănđ buz, max six stinz munh tăng guungh taih, nzônh phunz nyâuh pitc huungđ Cuđ Jenx, bix max năngđ buz nzônh phunz nyâuh nyăngz Cuđ Jenx, wax tauh munh six zuc zaux. 9Cayx năngđ cah đangc buz coong quaix nâyx, six nâyx zanyf yaz zef coong ah hâyđ timb: “Năngđ coong naih laiv lanh nzônh pitc huungđ Cuđ Jenx phunz nyâuh bix max năngđ cah đangc nyâuh tuz stipx nyăngz Cuđ Jenx, wax tauh munh six zuc zaux.” 10Nâyx zanyf, yaz six ayx hoopđ bamh munh nyăngz nyâuđ max six hoopđ Zâu Tênb-Huungh heh? Zâyf yaz jinh đangh lov jau ayx hoopđ munh nyăngz nyâuđ max? Năngđ coong yaz six jinh đangh ayx hoopđ munh nyăngz nyâuđ, yaz six max zâyf Zâu Jix-Tuz nyăngz pâuz.

11Yâuf pez lex, yaz joođ bux phunz nyâuh pâyz coong, yaz nzônh nyăngz Cuđ Jenx, six max zâyf tăng bamh munh taih. 12Wâyc yaz max stipx wax đomc Cuđ Jenx tăng laiv lanh munh taih, yâuc max tuz tăng laiv lanh munh nzaox phunz yaz, nây six tăng Zâu Yê-su Jix-Tuz cănh hinđ yangh phunz yaz. 13Nzof nyâuh lauf cănh tuz numđ coong tauv yaz cah đangc lêpc Yu-tai munh nyăngz gâyf wax zanyf, yaz six ayx huđ ănz Zâu Tênb-Huungh nyăngz jiux pangx, yâuc lov jau mêtc wax đomc munh. 14Yaz hoođ pâyz Yu-tai munh wax đomc gâyf yâuc max stâyv cloon yaz panz toongv wax đomc Yu-tai munh tauv laiv, yâuc joomz nyâuđ nzongf claof jex buz njăpc taih wax đomc gâyf. 15Six tăng yaz năngx yămz nzif nyăngz nyâuđ njaf wax zanyf, Zâu Tênb-Huungh bix lanyc yaz taih, nongc Nănh nyăngz pôz êu yaz taih, yâuc numđ nyađ 16hinđ manyf Nănh nyăngz Toonz yămz yaz cah njaf, phunz yaz hayh nzônh wax tauh Toonz yămz wax đomc pitc stingx munh cah njaf, yaz songđ lênh dlih max cloon bamh munh sangv, 17nzof yaz yâuc max ninyh wa Yê-lu-sa-lem pongh ayx cumh pâuz munh đangc yaz wax đomc. Six, yaz ninyh wa A-la-bi, nzof nzăngđ phunb đangz lauf wa Đa-mat dlanyh.

18Tăng wa, pôz nyăngv cah đangz, yaz nzăngđ ninyh wa Yê-lu-sa-lem cloon Sê-pha tinyh quênx yâuc cloon nănh yămz tuz săpc ngâuf noib. 19Six yaz max pongh wax đomc cumh pâuz munh lanh tiny, blătc nzuf Ya-coopc, Zâu nyăngz yâuf. 20Yămz Zâu Tênb-Huungh nyăngz cah đangc, yaz ja nâyx đomc wac phunz nyâuh six senz nyăngz, yaz max coong jaf. 21Blătc wa, yaz zef ninyh Si-li cloon Si-li-si wax đomc stâyz phangz. 22Wax zanyf, yămz Yu-đê stâyz phangz wax đomc Zâu Jix-Tuz nyăngz jiux pangx lauf max zeengx pâyz yaz. 23Six wax đomc zen Zâu nyăngz munh yâuc tuz numđ coong: “Cah đangc ayx huđ ănz pănh wax tauh nâyx zanyf jinh đangh nzônh cah đangc nănh lov jau mêtc wax huungđ gâyf,” 24stiz songđ wâyc yaz bix tanv Zâu Tênb-Huungh.