Skip to content
BibleKenya

Dao Ao Dai Literal Text

Cô-lô-si 3:15

Verse 15 is marked below, with the whole chapter around it. Read from the start

Wâyc nây, năngđ coong nyâuh tuz ayx phunz cloon Zâu Jix-Tuz săngh taih, six oix zuc lov yămz cah zâyc guungh nyăngz dlayc, six Zâu Jix-Tuz stâyv yămz Zâu Tênb-Huungh byaoh phanx nyăngz tinc. Oix zuc nyâyh tauv yămz wa cah zâyc guungh nyăngz dlayc, max zâyf yămz nây bamh canz nyăngz dlayc. Wâyc nyâuh tayc nzof, nyâuh nyăngz săngh mengc tuz cloon Zâu Jix-Tuz pinyx yămz Zâu Tênb-Huungh cah njaf. Tauv Zâu Jix-Tuz, six senz nyâuh nyăngz săngh mengc, hinđ setb taih wax zanyf, nyâuh six lauf tuz cloon Nănh songc yămz gwăngz eeng hinđ setb taih.

Wâyc nây, oix zuc ayx tayc yămz nây bamh canz nyăngz jau — six pongz lauh nyăngz jau, naih wâyx nyăngz jau, stimz oix nyăngz jau, oix ayx huđ nyăngz jau, cloon mauh tax huungđ, mauh tax huungđ six congx miuc hanyh, six wâyc nâyx đomc dlayc Zâu Tênb-Huungh nzăngc taih tingc stoif, cah đangc nyâuh six lauf naih ayx nâyx đomc dlayc, senz nyâuh năngx jinh zuc nâyx đomc dlayc cun nyăngz săngx huđ. Six nâyx zanyf nyâuh oix zuc quanyf nzuf nâyx đomc muif huungđ dlayc — năngx gâyf numđ nhlenx, năngx gâyf siv lub, năngx gâyf ayx okx, năngx gâyf mađ munh, yâuc năngx gâyf coong laiv huungđ bah camx bah caiz nyăngz wac setb nyâuh nyăngz nzetx. Năngx gâyf coong puv maoh lanh jaf lanh, wâyc pănh quanyf nzuf lôx munh cloon wax đomc lôx stimz nyăngz jau nzof, nâyx zanyf yâuc săngh săngb nyăngz munh, six senz tuz wănc ayx săngb nyăngz munh taih hayh pâyz tuz muif huungđ, cayx năngđ zuyx pănh taih wax Tauh nyăngz hanyh jangx nâyx, yămz nây six max naih lanyc Hi-lapc munh cloon Yu-tai munh, quaix catz nyăngz munh cloon max quaix catz nyăngz munh, max tuz đăngc nyăngz munh cloon Si-te munh, ayx nâuh nyăngz munh cloon max ayx nâuh nyăngz munh, năngđ nây Zâu Jix-Tuz six muif huungđ, yâuc yămz muif huungđ.

Nyâuh six tuz Zâu Tênb-Huungh sên taih nyăngz munh, senz Nănh stăngz nyăngz đăngb zeengh munh, oix zuc naih nyâuđ hâuđ lênh munh, ayx gongx, yâuc nyangc munh, ayx nyâuđ dlênc, ayx nyâuđ đao, lanh nênf lanh yâuc lanh quanyf phunz lanh, năngđ coong naih tix lanh cloon pitc lanh tinyh zenđ, yâuc oix zuc lanh quanyf phunz lanh, cayx năngđ Zâu quanyf phunz nyâuh nâyx. Six yămz manf dlayc yâuc oix zuc lanh stăngz lanh, nây six hayh ayx tuz clăkx clunh nzuf nyăngz jau. Oix zuc phunz Zâu Jix-Tuz nyăngz peengh oonz cun nyâuh nyăngz nyâuđ, wâyc nyâuh six tuz tăng nâyx huungđ peengh oonz sên taih săngh ah nomz stinb, yâuc oix zuc naih nyâuđ hâuđ tauv. Oix zuc zoz Zâu Jix-Tuz nyăngz wac ănz nyâuh nyăngz nyâuđ pong nzuf, yâuc nongc nzuf muif huungđ tongb manyh nyăngz jau lanh nzaox lanh, lanh quinb lanh, nongc wax đomc đăngb nzungz, cloon tanv Zâu nyăngz nzungz, cloon Singx-Lingh phunz munh ayx taih nyăngz nzungz, nongc nzuf nyâuđ sâuf hâuđ ayx nzungz tanv Zâu Tênb-Huungh. Nyâuh ayx nyăngz muif huungđ jau, max cun coong wac max six ayx nyăngz dlayc, oix zuc ayx muif huungđ yămz Zâu nyăngz manyh, six Zâu Yê-su, yâuc păngc Nănh bix sâuf hâuđ Zâu Tênb-Huungh, senz Tênb-toongh Pha.

Ayx au nyăngz munh, oix zuc buc cănh nyăngz langh, wâyc nây six ayx hoopđ yămz Zâu. Ayx langh nyăngz munh oix zuc stăngz cănh nyăngz au, yâuc năngx gâyf ayx đokc ănz au. Ayx sây nyăngz munh, yămz manf dlayc oix zuc mungv nzif pha nyăngz wac, wâyc nây six ayx hoopđ Zâu nyăngz nyâuđ. Ayx pha nyăngz munh, năngx gâyf nhlef cănh nyăngz sây nhlenx, stiz nzăngđ max tuih nyâuđ. Ayx nâuh nyăngz munh, yămz manf dlayc oix zuc mungv cănh nyăngz zâu, max zây cungb toongx zâu nyăngz minb ayx, wâyc phunz stiz numđ nyađ cuungv, six oix zuc senz nongc nzuf nyâuđ ayx, wâyc cumh nzav Zâu. Max cun nyâuh ayx laiv huungđ, oix zuc nongc nzuf stimz nyâuđ ayx cayx năngđ ayx phunz Zâu nâyx, bix max zâyf ayx phunz munh, wâyc pâyz tuz coong nyâuh six tuz stipx sâuđ nyâyc nyăngz phănc tăng Zâu. Wâyc nyâuh six jinh đangh ayx Zâu nyăngz pâuz, six senz Zâu Jix-Tuz. Wâyc zuc laiv lanh ayx max peengh stimz nyăngz jau, six lauf tuz stipx nănh ayx wax đomc max peengh stimz nyăngz jau winb lauf phunz nănh, yâuc max naih pyac toix laiv lanh.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.