Skip to content
BibleKenya

Dao Ao Dai Literal Text

Cumh Pâuz 24

Wax zanyf, pyaz noib cah đangz, stayb munh pyây A-na-ni, cloon ah đomc munh côx, cloon pob gâyf munh hipđ ayx Tê-tu-lat, ninyh tauv stiz six ninyh yămz quanz pyây nyăngz cah đangc nongc cooux Phao-lô. Êu tuz Phao-lô taih, Tê-tu-lat songđ quef coonz cooux Phao-lô, coong: “Quanz lub lex, wâyc tuz tăng mâyh bix tuz taix peengh yămz, yâuc wâyc mâyh six nyâuđ njaf nyâyh tuz quăng, nâyx huungđ pec stingx naih đuungx huungđ max săngh mâyh yâuc zany tuz săngh, saix nyăngz Phê-lik quanz lex, păngc mâyh bix yămz manf dlayc yâuc tuz peengh oonz yămz, buz senz numđ hâuđ tauv nâyx đomc muif huungđ jau. Six max oix taih zenv mâyh nyăngz săngx huđ đao, yaz joođ mâyh pungx nyâuđ mungv buz coong cay tix zâux wac. Wâyc phătc nâyx lanh munh six cayx năngđ staiz gumc, nănh yâuc sêu phunz yămz pong nây guungh đi nyăngz Yu-tai munh lunc nzuf, yâuc ayx pyây yămz Na-sa-leetx wax peob munh, nănh yâuc cah đanyc ayx wâyx bongc Zâu Tênb-Huungh nyăngz pyau, buz nzăngđ zoz nănh, — [nzof buz yâuc oix âyz buz nyăngz gâyf stămđ. Six wax tauh tômx peengz pyây Li-sêt taih nongc lanyf tăng buz nyăngz puf tauh zab nănh, yâuc setb lanyf êu cooux nănh wax đomc munh oix zuc taih yămz mâyh nyăngz cah đangc] — yămz nâyx đomc muif huungđ dlayc, mâyh lauf cănh hayh zah naic tăng nănh, bix tuz setb buz cooux nănh nyăngz stoif.” Nzof, Yu-tai munh yâuc tinyh đoih coong, nâyx đomc dlayc six senz naih.

Tăng wa, wax tauh quanz pyây songđ hiđ phunz Phao-lô coong Phao-lô songđ coong: “Wâyc pâyz tuz mâyh ayx quanz pob wekc phunz nâyx huungđ pec stingx tuz đuungx nyăngv, yaz songđ numđ nyađ cănh coong tauv yaz nyăngz jau, wâyc mâyh cănh pâyz tuz coong tăng yaz muf wa Yê-lu-sa-lem nongc canyx bongc six max zeengx blătc săpc nyâyc noib, stiz yâuc max phătc yaz căn mănv yămz wa bongc Zâu Tênb-Huungh nyăngz pyau tinyh panx, yâuc max lungz ayx phunz songx munh lunc, yămz wax đomc huyđ toongh max six yămz môngf sangc, yămz stiz nâyx zanyf cooux yaz wax đomc stoif, stiz yâuc max hayh zoz luungđ nongc ayx zanyx manyf phunz mâyh. Six yaz nyenc cloon mâyh nâyx huungđ, coong âyz năngđ stiz hipđ ayx za gâyf wax huungđ, yaz yâuc bongc wax đomc claof jex nyăngz Zâu Tênb-Huungh, zen âyz gâyf njanh ja taih nyăngz jau cloon wax đomc tâuc wac munh nyăngz stâub ja taih nyăngz wac, naih njih mungc yămz Zâu Tênb-Huungh cayx năngđ stiz lauf jinh đangh naih nâyx, six zen coong peengh stimz munh cloon munh huđ munh six năngx tuz săngh taih. Yâuc wâyc nâyx, yaz nzăngđ nzac jab ayx laix tuz ah nomz stimz max naih tinc nzêmh yămz Zâu Tênb-Huungh nyăngz cah đangc cloon munh nyăngz cah đangc. Nzof, tuz batz nyăngv nây yaz ninyh côz, yaz nzăngđ phunb đangz lauf, nzâyz nyanh lauf stăngc phunz cănh nyăngz côkz pâu, cloon congx nyăngz tax huungđ, yâuc toix wax zanyf stiz pongh yaz ayx stav wâyx yămz wa bongc Zâu Tênb-Huungh nyăngz pyau, max cloon munh hongđ, yâuc max naih tinyh nzeengz nyăngz jau. Six tăng Ê-si taih wax đomc Yu-tai munh, wax đomc munh six hoopđ zuc taih yămz mâyh nyăngz cah đangc bix cooux yaz, năngđ coong stiz naih tix huungđ nongc cooux. Max six nâyx đomc yămz nây nyăngz munh six zuc coong stiz lov tuz phătc yaz ayx longđ laiv huungđ, yămz yaz stâuđ wa Yu-tai munh nyăngz stămđ zăngc quanz cah đangc wax zanyf, năngđ naih six lauf cungb stâuđ stiz wa mungh tongx wax zanyf, yaz bix hamv coong ah zâux wac ayx nâyx, coong: ‘Yaz nâyx noib zuc stămđ yămz nyâuh nyăngz cah đangc six wâyc munh tayc săngh taih nyăngz jau.’”

Tăng wa Phê-lik pâyz tuz yox wax huungđ Gâyf, songđ sec đangc max stămđ iz leepb, yâuc coong: “Laiv zanyf wax tauh tômx peengz pyây Li-sêt taih tauv nây, yaz mănc stămđ nyâuh nâyx đomc dlayc,” yâuc setb lanyf êu peengz pyây jămđ Phao-lô, yâuc coong oix zuc phunz nănh tuz pungx stimz, năngx gâyf cangđ nănh nyăngz munh taih lif nănh wax đomc.

Blătc batz noib cah đangz, Phê-lik, cloon nănh nyăngz au Đu-sin-la, six ah lanh Yu-tai munh nzif, taih, songđ êu Phao-lô taih yâuc mungv nănh lănv tauv zen Zâu Yê-su Jix-Tuz nyăngz jau. Six tauv Phao-lô lănv tauv peengh stimz nyăngz jau cloon wăn stimz nyăngz jau, cloon đangz noib zuc tingc stoif nyăngz jau, Phê-lik songđ numđ cumh nzav, yâuc coong: “Nâyx zanyf bix muf gôh, laiv zanyf hênh, yaz mănc êu mâyh taih.” Wax zanyf, yâuc wâyc nyâyh mungc oix tuz Phao-lô đăpx tix cay nyanh phunz nănh, wâyc nây wax tauh quanz pyây, songđ njinh luh êu Phao-lô taih cloon coong wac max setc tiny. Six tauv tuz iz nyăngv, naih munh taih tayv Phê-lik six Bo-si-atc Phê-sa-tat, yâuc wâyc oix tuz Yu-tai munh nyăngz nyâuđ, Phê-lik songđ njinh luh clăngđ Phao-lô.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.