Dao Ao Dai Literal Text
Cumh Pâuz 25
Phê-sa-tat taih tauv nănh nyăngz steengv tuz pôz noib cah đangz, nănh tăng Si-sa-li-ya ninyh wa Yê-lu-sa-lem. Tăng wa, wax đomc stayb munh pyây cloon Yu-tai munh nyăngz pyây tauv laiv taih yămz nănh nyăngz cah đangc cooux Phao-lô, stiz yâuc joođ nănh, stiz joođ ah stinz jau nongc nzeengz cloon Phao-lô, coong êu wax tauh quanz pyây phunz Phao-lô muf wa Yê-lu-sa-lem, wâyc stiz ta zux ix toon wa bah đamx jau tayx nănh. Phê-sa-tat tauz coong Phao-lô jinh đangh zuc clăngđ ănz wa Si-sa-li-ya, nzof nănh songđ cayx phunb đangz muf căn gôh. Nănh zef coong: “Wâyc nây, yămz nyâuh cah njaf wax đomc ayx côx munh, tauv lêpc muf wa, năngđ coong nâyx tauh munh naih longđ laiv huungđ stoif, stiz mănc cooux nănh.”
Phê-sa-tat cloon stiz yămz max blătc yetc noib max six săpc noib nănh songđ muf wa Si-sa-li-ya. Tauv nyâyc noib, nănh ninyh stâyv wa stămđ stoif tinc, yâuc êu ênz Phao-lô taih. Phao-lô ah yac taih tauv wax zanyf, tăng Yê-lu-sa-lem taih wax đomc Yu-tai munh songđ ninyh sêmz nănh nzuf, coong đuungx huungđ stoif niđ nzongf plongz nănh, six stiz yâuc max naih luungđ ayx zanyx manyf, Phao-lô songđ cănh pyenv coong: “Yaz max longđ laiv huungđ stoif nzeengz cloon Yu-tai munh nyăngz gâyf njanh, yâuc max nzeengz cloon bongc Zâu Tênb-Huungh nyăngz pyau yâuc max nzeengz cloon Sê-sa.” Six wâyc oix tuz Yu-tai munh nyăngz nyâuđ, Phê-sa-tat songđ naic Phao-lô coong: “Mâyh oix muf yămz wa Yê-lu-sa-lem, nongc stămđ tauv nâyx đomc jau yămz yaz nyăngz cah đangc max?” Six Phao-lô coong: “Yaz six zuc ninyh yămz Sê-sa nyăngz stămđ stoif tinc cah đangc, yaz six sămv zuc yămz wa nongc stămđ. Yaz max ayx laiv huungđ longđ cloon Yu-tai munh, cayx năngđ mâyh lauf pâyz yox nâyx. Yaz năngđ coong longđ stoif max six ayx tix huungđ hoopđ zuc tayc, yaz six max pyenv tayc. Six năngđ coong yămz stiz cooux yaz wax đomc jau bix max naih, yâuc max naih mănv hayh jaoz yaz phunz stiz. Yaz joođ ninyh tauv Sê-sa.” Tăng wa, Phê-sa-tat cloon wax đomc stămđ zăngc quanz sangv tuz, songđ coong: “Mâyh joođ ninyh tauv Sê-sa. Mâyh six tuz ninyh tauv Sê-sa!”
Blătc batz noib, A-gi-ba huungh cloon Bê-nit nzac taih tauv Si-sa-li-ya dlanyh, nongc ninyh pongh Phê-sa-tat. Stiz yămz wa đuungx noib nyăngz săngx huđ, Phê-sa-tat songđ lănv Phao-lô nyăngz jau phunz wax tauh huungh, coong: “Naih ah lanh munh pha, six nzauh munh tăng Phê-lik njâuh ănz nây, nâyx tauh munh, yaz yămz wa Yê-lu-sa-lem wax zanyf, wax đomc stayb munh cloon Yu-tai munh wax đomc munh côx taih cooux nănh, yâuc êu yaz tingc stămđ nănh. Yaz tauz ănz stiz coong Lô-ma nyăngz gâyf six max tuz jaoz laiv lanh munh năngđ coong zuc cooux nyăngz munh bix năngx jinh caix cloon ninyh cooux nyăngz munh, nzof yâuc năngx tuz congv cănh pyenv tauv zuc cooux wax đomc jau. Stiz songđ tinyh ênz taih nây, yaz songđ max ngaih tauv nyâyc noib ninyh stâyv yămz stămđ stoif tinc, êu ênz wax tauh munh taih, wax đomc cooux nănh nyăngz munh, tauv êu stâuđ quef taih coong, stiz yâuc max naih cooux tauv laiv huungđ okx nyăngz stoif năngđ yaz nyâyh nâyx. Nzof stiz yâuc cungb cloon nănh nzeengz tauv stiz nyăngz gâyf cuungv, yâuc coong tauv wax tauh Yê-su tayc bix Phao-lô yâuc njinh luh coong six năngx jinh săngh. Yămz nâyx đomc tinyh zenđ nyăngz jau, wâyc max pâyz tuz senz, yaz songđ naic wax tauh munh coong oix ninyh tauv wa Yê-lu-sa-lem nongc yămz wa stămđ tauv nâyx đomc jau max. Six Phao-lô yâuc joođ êu phunz nănh tuz ninyh yămz huungh nyăngz cah đangc nongc stămđ, yaz songđ setb lanyf êu jămđ nănh tuz tauv laiv zanyf yaz ênz nănh ninyh phunz tauv Sê-sa.” A-gi-ba songđ coong ănz Phê-sa-tat: “Yaz lauf oix tuz mungv nâyx tauh munh.” Nănh songđ tauz: “Tauv sangx đoomz huungh cănh tuz mungv nănh.”
Tăng wa, tauv nyâyc noib, A-gi-ba cloon Bê-nit zoongz dloih nzuf taih nzac wa stămđ stoif tinc, cloon wax đomc quanz lub cloon yămz wa dlanyh wax đomc ayx côx munh tauv laiv, tăng wa Phê-sa-tat songđ setb lanyf êu ênz Phao-lô taih. Phê-sa-tat coong: “A-gi-ba huungh cloon muif lanh naih minb cloon buz yămz nây nyăngz munh lex, nyâuh jinh đangh tuz phătc nâyx lanh munh, nănh six naih ah peob Yu-tai munh hongđ nzongf njinh yămz wa Yê-lu-sa-lem cloon yămz nây nyăngz munh tinyh đoih joođ yaz, hamv coong năngx gâyf phunz nănh săngh gôh. Six yaz pâyz tuz coong nănh max ayx laiv huungđ hoopđ zuc tayc. Nzof wâyc nănh cănh joođ ninyh tauv Sê-sa huungh, yaz songđ tingc săngh ênz nănh ninyh, yaz yâuc max naih luungđ senz nyăngz nongc coong tauv nâyx tauh munh nyăngz jau phunz Sê-sa huungh. Wâyc nây, yaz ênz nănh taih yămz nyâuh nyăngz cah đangc, nzof năngx nongc sen quaix six yămz A-gi-ba huungh nyăngz cah đangc, nongc phunz blătc nâyx noib zah naic nyăngz jau, yaz bix hayh tuz tix huungđ nongc phunz yaz coong. Wâyc zuc yaz năngđ coong, ênz ah lanh stoif munh ninyh bix max naih cay luungđ nongc cooux nzeengz cloon nănh, six senz numđ max săngh.”
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.