Cumh Pâuz 23

1Phao-lô si mangc staox wax đomc stămđ zăngc quanz ninyh, yâuc coong: “Yâuf pez lex, yaz săngh yămz Zâu Tênb-Huungh nyăngz cah đangc, yâuc ayx stimz nyâuđ đăngb zeengh tuz tauv nâyx yenh.” 2Six stayb munh pyây A-na-ni setb lanyf êu stâuđ stătx Phao-lô wax đomc munh beb Phao-lô nyăngz nzetx. 3Tăng wa, Phao-lô songđ coong ănz nănh: “Mâyh lâyc tungđ leetc cungh ngwaic pec nyăngz gongc lex, Zâu Tênb-Huungh cayx bopc mâyh gôh! Mâyh stâyv lâyc âyz gâyf njanh stămđ yaz, bix năngx setb lanyf bopc yaz ayx longđ cloon gâyf njanh naz?” 4Six stâuđ wa cah sinh wax đomc munh yâuc coong: “Mâyh năngx mađ Zâu Tênb-Huungh nyăngz stayb munh pyây naz?” 5Phao-lô coong: “Yâuf pez lex, Yaz max pâyz coong nănh six stayb munh pyây. Wâyc naih ja coong: ‘Mâyh năngx gâyf coong đokc ănz ayx côx cun pec stingx nyăngz munh.’”

6Phao-lô pâyz coong yămz wa naih ah phanx six Sa-đu-si munh, nzof naih ah phanx six Pha-li-si munh, nănh songđ yămz wa stămđ zăngc quanz cah đangc hamv stingb lub coong: “Yâuf pez lex, Yaz six Pha-li-si munh, ayx Pha-li-si munh nyăngz sây; Nâyx zanyf yaz zuc stămđ six wâyc pănh nyăngz njih mungc cloon munh tayx săngh taih nyăngz jau.” 7Wax zanyf nănh coong ayx nâyx, Pha-li-si munh cloon Sa-đu-si munh songđ naih tinyh zenđ setb taih, wax peob songx munh songđ phunz goib taih. 8Wâyc Sa-đu-si munh coong munh tayc max hayh săngh taih, yâuc max naih stinz munh max six manđ, six Pha-li-si munh yâuc zen coong njinh wa iz huungđ six naih nzuf. 9Tăng wa, songđ tinyh nzeengz hamv stingb lub setb taih, naih ah đomc nzaox gâyf stênx steengb Pha-li-si wax huungđ munh, nyoongz quef nzeengz coong: “Buz max phătc nâyx lanh munh naih laiv huungđ stoif huđ nhlenz. Ha săngx đanyf, naih tix tauh manđ max six stinz munh coong ănz nănh …” 10Wax cuyb tinyh zenđ nyăngz dlayc songđ cun ayx cun nzongf, wax tauh tômx peengz pyây songđ wangb Phao-lô zuc stiz zeb ayx săngh tuyđ, songđ setb lanyf êu peengz ninyh zab Phao-lô tăng stiz wax peob munh, yâuc ênz nănh muf wa peengz tinc.

11Six tauv nyâyc munf Zâu taih yămz nănh nyăngz cah sinh, yâuc coong: “Oix zuc pungx nyâuđ bex, wâyc mâyh yămz Yê-lu-sa-lem ayx zanyx manyf phunz Yaz năngđ laix, mâyh lauf oix zuc Yămz wa Lô-ma ayx zanyx manyf năngđ wa nâyx.”

12Tauv guungh gwăngz naih ah đomc Yu-tai munh tinyh đoih ta zux ix yâuc cănh nyunc coong, max nhlinc max hopb ayx tuz tauv laiv zanyf stiz tayx tuz Phao-lô. 13Wax zanyf, cox naih stâyx săpc đuungx lanh munh ta nâyx huungđ zux ix, 14stiz songđ ninyh pongh wax đomc stayb munh cloon wax đomc munh côx, yâuc coong: “Buz bâyf tinyh cloon njăpc nyunc wac ănz cănh nyăngz stinb coong max nhlinc luungđ ayx tuz tauv laiv zanyf buz tayx tuz Phao-lô. 15Wâyc nây, nâyx zanyf joođ nyâuh cloon wax stămđ zăngc quanz setb minb pongh wax tauh tômx peengz pyây, ayx cayx năngđ cay oix năngx cayb zah stămđ Phao-lô nyăngz dlayc năngx yox timb, phunz nănh ênz Phao-lô lauf phunz nyâuh. Nzof buz six zu nănh lauf max zeengx tauv tinc bix tayx nănh.” 16Six Phao-lô ô nyăngz toonz, tuz numđ coong nâyx đomc munh zu jau, nănh songđ nzac wa peengz tinc ninyh, bux nâyx đomc wac ănz Phao-lô. 17Tăng wa, Phao-lô songđ êu ah lanh peengz pyây taih, yâuc coong: “Joođ ênz nâyx tauh munh ninyh pongh tômx peengz pyây, wâyc nâyx tauh munh naih wac oix coong ănz nănh.” 18Wax tauh peengz pyây songđ ênz nănh ninyh pongh wax tauh tômx peengz pyây yâuc coong: “Phao-lô nzauh munh êu yaz ênz nâyx tauh munh taih pongh mâyh, wâyc naih wac oix coong ănz mâyh.” 19Wax tauh tômx peengz pyây songđ nzauf nănh nyăngz puf ênz ninyh lanyc, songđ naic coong: “Mâyh naih luungđ wac oix bux ănz yaz heh?” 20Nănh songđ coong: “wax đomc Yu-tai munh hoopđ nyâuđ, cayx taih joođ mâyh êu tauv sangx đoomz bix ênz Phao-lô ninyh phunz stămđ zăngc quanz, ayx cayx năngđ cay cayx zah naic Phao-lô năngx yox. 21Wâyc nây, joođ mâyh năngx gâyf zen stiz, wâyc stiz naih stâyx săpc đuungx lanh munh jinh đangh meem wa zu nănh, wax đomc munh stiz cănh nyunc coong max nhlinc max hopb ayx tuz tauv laiv zanyf tayx tuz Phao-lô. Nâyx zanyf stiz six jinh đangh bênc săngh wa, zu mâyh nyenc nyăngz wac cuungv.” 22Tăng wa, tômx peengz pyây songđ phunz nănh muf, yâuc zăpx nănh coong: “Năngx gâyf phunz mănv pâyz coong mâyh bux nâyx đomc wac ănz yaz bex.” 23Tômx peengz pyây songđ êu iz lanh peengz pyây taih, bux coong: “Ninyh bênc iz pez lanh yăngh jau peengz, cloon jetb săpc lanh zâyh maf peengz, cloon iz pez lanh nzauf wic peengz, ayx tuz nâyx munf đuh săngx huđ peengz bix tuz setb jau ninyh Si-sa-li-ya dlanyh, 24bênc cloon stanyb hauđ phunz Phao-lô nongc zâyh, phunz wax peob peengz hayh tuz peengh oonz ninyh tauv Phê-lik quanz pyây wa,” 25nănh yâuc ja ah zây jenx phunz wax tauh quanz coong:

26“Saix nyăngz Phê-lik quanz lex, yaz Ca-lau-đi-atc Li-sêt; Joođ đeh mâyh. 27Nâyx tauh munh zuc Yu-tai munh zoz yâuc cayx caiđ zuc stiz tayx, yaz songđ cloon peengz ninyh tuz saic njâuv nănh, wâyc pâyz coong nănh six Lô-ma nyăngz pec stingx. 28Yâuc wâyc oix pâyz tuz săngh laix stiz bix cooux nănh, Yaz nzăngđ ênz nănh ninyh phunz stiz nyăngz stămđ zăngc quanz, 29nzof yaz phătc nănh zuc cooux six cungb coong tauv stiz cănh nyăngz gâyf cuungv, yâuc max phătc naih cooux laiv huungđ stoif hoopđ zuc tayc max six yămz nzauh. 30Yaz yâuc tuz pâyz coong munh ta zux ix hoiđ nănh, yaz songđ coonx ênz nănh taih phunz mâyh, yâuc bux phunz cooux nănh wax đomc munh coong oix zuc ninyh yămz mâyh nyăngz cah đangc cooux nănh.”

31Tăng wa, wax đomc peengz âyz jaoz phunz stiz nyăngz lanyf songđ ênz Phao-lô njinh nzămc ninyh tauv An-ti-ba-ti. 32Tauv nyâyc noib, wax đomc yăngh jau peengz songđ phunb đangz muf wa peengz tinc, phunz wax đomc zâyh maf peengz cloon Phao-lô ninyh timb, 33nâyx peob peengz, ninyh tauv wa Si-sa-li-ya dlanyh songđ jaoz jenx phunz wa tauh quanz pyây, yâuc jaoz Phao-lô phunz nănh. 34Toc jenx tuz nănh songđ naic Phao-lô coong steengb stâyv yămz laiv nomz stâyz phangz, yâuc pâyz tuz coong steengb stâyv yămz Si-li-si stâyz phangz, 35wax tauh quanz pyây coong: “Tauv cooux mâyh wax đomc munh taih tauv yaz six âyz gâyf bix stămđ mâyh,” yâuc paiđ êu peengz jămđ nănh yămz Hê-lôtx nyăngz huungh tinc.