Skip to content
BibleKenya

Dao Ao Dai Literal Text

Cumh Pâuz 22

“Yetx stong yâuf pez cloon munh côx lex, joođ mungv yaz nâyx zanyf coong cay yaz nyăngz jau lâuc ănz nyâuh.”

Wax zanyf, numđ nănh nongc Hipc-lu wac coong ănz stiz, stiz zef năngx stinyb njâuh têx timb. Phao-lô songđ coong:

“Yaz six Yu-tai munh steengb stâyv yămz Ta-sat dlanyh, Si-li-si stâyz phangz, six tuz yămz nâyx nomz dlanyh lub taih, tuz Tăng Ga-ma-li-ên stênx steengb nzaox âyz pănh claof jex wax đomc gâyf njanh nyăngz jau, yaz yâuc joomz nyâuđ Zâu Tênb-Huungh nzongf, lauf cayx năngđ nyâuh nâyx noib yămz nây nyăngz muif lanh nâyx, yaz yâuc tuz ayx huđ ănz lêpc nâyx huungđ gâyf wax đomc tuz tauv tayc, ninyh zoz njinh munh pha cloon munh nzif stayb ênz lauf ănz nzauh, coong tauv nâyx đomc, six naih stayb munh pyây cloon wax đomc songx munh côx ayx zanyx manyf phunz yaz, stiz six wax đomc munh pungx stâub phunz yaz nzâyz ninyh phunz wa Đa-mat dlanyh wax đomc yâuf pez, yaz six cayx ninyh wa nongc zoz stayb yămz wa nyăngz munh ênz lauf Yê-lu-sa-lem, nongc phađ stiz. Wax zanyf, yaz njinh đangh setb jau ninyh cayx tauv Đa-mat dlanyh, cox đamx noib, lênh dlih, naih gwăngz lub nzongf tăng guungh nzac taih siux yaz nzêux nzuf. Yaz songđ glinyf nzac nib ninyh yâuc numđ naih stingb coong ănz yaz, coong: ‘Sau-lô lex, Sau-lô, Săngh laix mâyh bix ayx huđ ănz Yaz?’ Yaz songđ tauz coong: ‘Zâu lex, Mâyh six mănv heh?’ Nănh songđ coong ănz yaz: ‘Yaz six Yê-su Na-sa-leetx munh, six mâyh jinh đangh ayx huđ ănz wax Tauh.’ Wax zanyf, wax đomc cloon yaz yămz wa nyăngz munh mangc phătc wax cuyb gwăngz, six stiz max numđ coong wac ănz yaz wax Tauh nyăngz stingb. Nzof yaz songđ coong: ‘Zâu lex yaz oix zuc ayx laix heh?’ Tăng wa, Zâu coong ănz yaz: ‘Nyoongz quef, bix nzac wa Đa-mat dlanyh ninyh, yămz wa mâyh oix zuc ayx laiv luungđ cănh naih munh bux phunz mâyh nzuf.’ Wâyc tăng wax cuyb gwăngz eeng yaz songđ max phătc jau, zuc păngc cloon yaz yămz wax đomc munh nzauf puf jinb yaz nzac wa Đa-mat dlanyh ninyh. Wax zanyf, naih ah lanh munh hipđ ayx A-na-ni, senz joomz nyâuđ lêpc gongx gâyf njanh, tuz yămz wa nyăngz Yu-tai munh muif lanh ayx zanyx manyf gongx phunz, nănh taih pongh yaz, stâuđ yaz nyăngz cah sinh yâuc coong: ‘Tah Sau-lô lex, phătc jau gôh.’ Toongx wax nomz săngx huđ, yaz songđ mangc phătc nănh. Tăng wa, nănh songđ coong: ‘Pănh claof jex nyăngz Zâu Tênb-Huungh sên mâyh taih nongc phunz pâyz Nănh nyăngz zux ix, yâuc tuz phătc Peengh Stimz Wax Tauh, yâuc tuz numđ tăng Nănh nzetx coong nyăngz wac, wâyc mâyh six yămz muif lanh munh nyăngz cah đangc ayx zanyx manyf phunz Nănh, coong tauv mâyh tuz phătc cloon tuz numđ wax đomc. Nâyx zanyf, mâyh bix năngx ngaih luungđ heh? Nyoongz quef, tim Zâu nyăngz manyh ayx quaix-gâyf, phunz mâyh tuz dlăngc stoif gôh.’ Tăng wa, yaz phunb đangz lauf Yê-lu-sa-lem, yămz bongc Zâu Tênb-Huungh nyăngz pyau jinh đangh cloo Zâu wax zanyf, songđ phătc hinđ yangh nyăngz jau. Yaz phătc Zâu Yê-su coong ănz yaz, coong: ‘Oix zuc coonx lênh dlih setb nây Yê-lu-sa-lem, wâyc stiz six max mungv mâyh ayx zanyx manyf phunz Yaz nyăngz wac.’ Yaz songđ coong: ‘Zâu lex, stiz cănh pâyz coong yaz yămz săngh nomz huyđ toongh zoz wax đomc zen Mâyh nyăngz munh bopc yâuc ănz nzauh. Yămz Ê-tên nyăngz samđ zuc setb wâyc ayx zanyx manyf phunz Zâu wax zanyf, yaz lauf stâuđ wa cah sinh numđ hoođ, yâuc nzauf cungh ngwaic guyz phunz tayx nănh wax đomc munh.’ Zâu songđ coong ănz yaz coong: ‘Oix zuc ninyh, wâyc Yaz paiđ mâyh ninyh tauv yămz côz wax đomc pitc stingx munh.’”

Wax zanyf, songx munh mungv Phao-lô coong tauv nâyx zâux wac, stiz songđ hamv coong: “Oix zuc mêtc lâyc loif munh gâyh nây nib minc, max hoopđ zuc phunz nănh săngh.” Stiz songđ hamv stingb lub, zay cungh ngwaic yămc guyz quanyf, yâuc yamc nib buungb staox guungh ninyh, wax tauh tômx peengz pyây songđ setb lanyf êu ênz Phao-lô nzac wa peengz tinc muf, êu zoz pya stătb zah naic nănh mangc jađ wâyc laiv huungđ, songx munh bix hamv nzeengz cloon nănh ayx tuz nâyx. Six tauv stiz nongc langb stayb nănh cayx đa nongc pya stătb, Phao-lô songđ coong ănz stâuđ wa wax tauh peengz pyây, coong: “Ha nyâuh cayb naih gâyf tuz nongc pya bopc ah lanh Lô-ma munh hănđ max zeengx zah tuz setb stoif yah?” Wax zanyf, wax tauh peengz pyây numđ wax đomc wac, songđ ninyh pongh wax tauh tômx peengz pyây, yâuc coong: “Mâyh cayx ayx luungđ heh? Nâyx tauh munh six Lô-ma nyăngz pec stingx nef.” Wax tauh tômx peengz pyây, songđ ninyh coong ănz Phao-lô: “Oix zuc phunz yaz pâyz mâyh zâyf Lô-ma nyăngz pec stingx max?” Nănh songđ tauz: “Zâyf.” Wax zanyf tômx peengz pyây songđ coong: “Yaz zuc zoz nyanh đuungx maif nzăngđ tuz săngh wax huungđ pec stingx.” Six Phao-lô coong: “Yaz six tăng steengb taih bix tuz săngh nzof.” Tăng wa cayx stămđ nănh wax đomc munh songđ toiv gâyh nănh nzuf, năngx naih wax tauh tômx peengz pyây yâuc cumh nzav, wâyc pâyz coong nănh zoz stayb nâyx tauh Phao-lô six Lô-ma nyăngz pec stingx.

Tauv nyâyc noib, tômx peengz pyây oix pâyz tuz coong, săngh laix Phao-lô bix zuc Yu-tai munh cooux, songđ êu zay Phao-lô, songđ setb lanyf êu wax đomc stayb munh cloon yetx stong stămđ zăngc quanz taih căpx dlonf. Songđ ênz Phao-lô taih, phunz nănh stâuđ yămz stiz wa mungh tongx.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.