Skip to content
BibleKenya

Dao Ao Dai Literal Text

Cumh Pâuz 21

Wax zanyf, buz cloon stiz tinyh gâyh tuz, songđ nzac đangc ninyh, buz ninyh zac tauv wa Côtc dlanyh, nzof nyâyc noib nzăngđ tauv Lô-đê dlanyh, zef tăng wa ninyh tauv Ba-ta-la dlanyh. Tauv lov tuz ah saz đangc ninyh wa Phi-ni-si stâyz phangz, buz songđ nzac wax saz đangđ ninyh. Wax zanyf, mangc phătc Sai-batc coiđ njeengh, songđ pyenv quaix wa coiđ njeengh nyăngz staix phanx muf, buz yămz đangđ muf tauv Si-li stâyz phangz, nzac Tai-lapx dlanyh ninyh zapz wa, wâyc đangđ zuc yămz wa pungx huv. Buz songđ lov tuz pongh wax đomc stayb sây, yâuc yămz wa nhlic noib, nzof stiz yâuc tuz Singx-Lingh phunz pâyz, songđ njinh luh bux Phao-lô coong năngx gâyf ninyh tauv wa Yê-lu-sa-lem. Six, tauv blătc wax đomc noib, buz songđ zef setb jau ninyh, wax đomc stayb sây songđ tinyh đoih cloon au sây stungx buz ninyh blătc dlanyh cungh ngwaic, yâuc tinyh đoih quâyc nzac yămz wa coiđ sinh cloo Zâu, buz songđ coong tinyh gâyh wac tuz, bix nzac đangđ ninyh, nzof stiz yâuc phunb đangz muf stiz nyăngz tinc, six buz ninyh đangđ nyăngz jau zomc, songđ tăng Tai-lapx nzac wa Tô-lê-mi muf, cloon wax đomc yâuf pez coong tinyh pongh wac tuz yâuc cloon stiz yămz wa ah noib. Tauv nyâyc noib buz songđ setb jau ninyh, tauv wa Si-sa-li-ya dlanyh, ninyh nzac Phi-lipx nyăngz pyau, ah lanh nzônh Cuđ Jenx nyăngz munh, yâuc yămz wa nhlic lanh nyăngz ah lanh ayx coonz munh, buz cloon nănh yămz wa. Wax zanyf nănh naih pyâyz lanh sab đăngb hayh tâuc wac. Buz yămz wa tuz đuungx noib, naih ah lanh tâuc wac munh bux hipđ ayx, A-ga-batc, tăng Yu-đê stâyz phangz taih. Nănh taih pongh buz zoz Phao-lô nyăngz quav langb, taih stayb nănh nyăngz puf staux, yâuc coong: “Zâu Singx-Lingh coong ayx năngđ nâyx: ‘Yămz wa Yê-lu-sa-lem nyăngz Yu-tai munh six stayb nâyx lanh munh pha, senz nâyx stinz quav langb nyăngz zâu, stiz yâuc jaoz nănh phunz pitc stingx munh nyăngz puf.’” Tauv buz numđ wax đomc wac songđ njinh buz cloon yămz wa nyăngz munh joođ êu Phao-lô gâyf ninyh wa Yê-lu-sa-lem. Phao-lô songđ tauz coong: “Nyâuh ayx luungđ bix haoh ayx phunz yaz nyăngz nyâuđ munz nâyx heh? Wâyc yaz tingc săngh max zâyf cungb nyunc zuc stayb cuungv, yâuc năngx nyunc zuc tayc wâyc Zâu Yê-su nyăngz manyh yămz Yê-lu-sa-lem.” Wax zanyf, quinb nănh max mungv, buz songđ max quinb gôh, yâuc coong: “Cloo phunz Zâu nyăngz zux ix tuz ayx săngh.”

Blătc wax đomc noib, buz songđ bênc tungh zăngc, bix ninyh wa Yê-lu-sa-lem. Naih ah đomc stayb sây tăng wa Si-sa-li-ya lauf cloon buz ninyh, songđ ênz buz ninyh Ma-na-sanx nyăngz pyau, nănh six yămz Sai-batc taih, ayx stayb sây năngx đangc quaix, nzof yămz wa buz yâuc tuz nănh stipx.

Wax zanyf, buz ninyh tauv wa Yê-lu-sa-lem, wax đomc yâuf pez numđ nyađ stipx buz. Tauv nyâyc noib, Phao-lô cloon buz ninyh pongh Ya-coopc, nzof wax đomc Jiux pangx nyăngz munh côx yâuc tinyh đoih naih minb yămz wa. Cloon stiz coong tinyh pongh wac tuz, Phao-lô songđ lănv săngh huungđ săngh huungđ têx coong Zâu Tênb-Huungh nongc tăng nănh nyăngz cumh pâuz, bix yămz wax đomc pitc stingx munh mungh tongx ayx nyăngz muif huungđ. Wax zanyf, mungv nâyx đomc wac tuz, stiz songđ tanv Zâu Tênb-Huungh, yâuc coong ănz Phao-lô: “Yâuf pez lex, mâyh lauf cănh phătc, Naih pâyz sax panc lanh Yu-tai munh taih zen, stiz yâuc tinyh đoih naih joomz nyâuđ tauv gâyf njanh. Six, stiz numđ munh lănv tauv mâyh coong, mâyh nzaox phunz Yu-tai munh yămz pitc stingx munh mungh tongx wax đomc êu quanyf Mô-sê nyăngz gâyf, êu stiz năngx gâyf ayx quaix catz phunz stiz nyăngz sây, yâuc năngx gâyf ayx âyz wax đomc gâyf naz. Nâyx bix, laiv ayx laix heh? Naih dlih stiz bâyf numđ coong mâyh taih tauv nzof. Wâyc nây, oix zuc ayx năngđ nâyx, âyz buz bux mâyh nyăngz wac. Nâyx zanyf cloon buz yămz nây naih pyâyz lanh munh, stiz njinh đangh naih nyunc wac. Oix zuc ênz nâyx đomc munh lêpc ninyh bix cloon stiz ayx stav wâyx, yâuc setb nyanh cloon stiz, phunz stiz tuz tâyv pyây, munh songđ hayh pâyz tuz coong stiz numđ coong tauv mâyh wax đomc wac six max senz naih, yâuc phătc mâyh lauf cănh ayx âyz gâyf njanh yămz. Năngx naih zen Zâu wax đomc pitc stingx munh, buz yâuc pungx jenx ninyh zăpx êu stiz zuc njif năngx gâyf nhlinc congx miuc hanyh nyăngz tax huungđ, samđ, stanyb hauđ siv stoc tayc, cloon pongz lauh nyăngz jau.” Tăng wa tauv nyâyc noib, Phao-lô songđ ênz wax đomc munh lêpc ninyh, cloon stiz ayx stav wâyx tuz, Phao-lô songđ nzac Bongc Zâu Tênb-Huungh nyăngz pyau ninyh, bux tauv stiz stav wâyx wax đomc noib six tauv laiv zanyf nzăngđ pong, stunx tauv laiv zanyf stiz stuungx tax huungđ phunz stiz wa muif lanh.

Six tauv cayx pong wa nhlic noib, naih ah đomc Yu-tai munh tăng Ê-si stâyz phangz taih, phătc Phao-lô yămz wa bongc Zâu Tênb-Huungh nyăngz pyau, songđ lungz njinh songx munh hongđ taih toopz zoz Phao-lô, hamv coong: “Tinyh đoih I-sa-la-ên nyăngz munh lex, joođ stăngc đôih! Nâyx tauh munh six ninyh muif đoif nzaox tinyh đoih nzeengz cloon pec stingx, nzeengz gâyf njanh cloon nâyx nomz tinc. Nzof nănh yâuc năngx ênz Hi-lapc munh nzac bongc Zâu Tênb-Huungh nyăngz pyau ninyh, ayx wâyx nây đăngb zeengh nyăngz tinc.” Wâyc cah đangc, stiz phătc Tô-phi-mat, Ê-phê-sô munh, cloon Phao-lô yămz wa dlanyh, stiz songđ nyâyh coong Phao-lô ênz cloon wax tauh munh nzac bongc Zâu Tênb-Huungh nyăngz pyau. Lomc wa dlanyh munh lunc nzuf, naih ah peob songx munh hongđ taih zoz Phao-lô, stiz ênz nănh setb wa bongc Zâu Tênb-Huungh nyăngz pyau cungh ngwaic ninyh, songđ lênh dlih omz jeengh. Stiz jinh đangh lov jau tayx nănh wax zanyf, nâyx đomc wac songđ lănv ninyh tauv wax tauh tômx peengz pyây numđ coong lomc Yê-lu-sa-lem dlanyh jinh đangh lunc nzuf, nănh songđ lênh dlih ênz peengz cloon wax đomc peengz pyây, coonx tiuv nzac wa songx munh hongđ ninyh. Tăng wa munh phătc wax tauh peengz pyây cloon wax đomc peengz, stiz songđ sec max bopc Phao-lô. Tăng wa, wax tauh peengz pyây songđ ninyh tauv stătx zoz Phao-lô, setb lanyf êu nongc iz stinz njab langb stayb nănh, songđ naic jađ nănh six mănv, yâuc naic jađ nănh ayx laiv luungđ dlayc. Six yămz songx munh hongđ cah njaf, ah lanh cănh hamv coong ah huungđ, ah lanh cănh hamv coong ah huungđ max tinyh năngđ, nzof wax tauh peengz pyây songđ max hayh zah tuz setb laiv huungđ six senz, wâyc munh lunc nginyz nginyz têx, songđ setb lanyf êu ênz Phao-lô muf wa peengz tinc. Six Phao-lô ah taih tauv wa cac đany wax zanyf, peengz songđ zuc zeengz nănh ninyh wâyc zuc songx munh okx nzongf. Yâuc naih ah peob munh hongđ nzongf njinh luh lêpc đangz, hamv coong: “Tayx nănh gôh!”

Tauv cayx zuc ênz nzac wa peengz tinc ninyh, Phao-lô songđ naic wax tauh tômx peengz pyây coong: “Yaz tuz coong tix cay wac ănz mâyh max?” Wax tauh tômx peengz pyây songđ coong: “Mâyh cayb hayh coong Hi-lapc wac yah? Ha nâyx mâyh six cayb max zâyf wax tauh I-yipx munh, cah đangc nây nyăngz noib taih sêu lunc yâuc ênz cloon pyâyz tinb lanh tayx munh nyăngz munh, ninyh wa stâyz phangz blănf wax tauh munh haz?” Phao-lô songđ coong: “Yaz six Yu-tai munh, yămz Ta-sat dlanyh, Si-li-si stâyz phangz, ah lanh pec stingx yămz naih manyh yangh lub nyăngz dlanyh. Wâyc nây yaz joođ mâyh phunz yaz coong cay wac ănz songx munh.” Tăng wa, wax tauh tômx peengz pyây songđ nyenc phunz, Phao-lô songđ stâuđ wa cac cah zâyc peengh, zaub puf ănz songx munh. Tauv numđ stinyb njâuh, nănh songđ nongc Hipc-lu wac coong:

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.