2 Ti-mô-tai 1

1Yaz, Phao-lô, âyz Zâu Tênb-Huungh nyăngz zux ix ayx Zâu Yê-su Jix-Tuz nyăngz cumh pâuz munh, âyz năngđ nyunc nyăngz wac coong tauv săngh mengc nyăngz jau yămz Zâu Yê-su Jix-Tuz,

2pungx phunz Ti-mô-tai, six yaz stăngz nzongf nyăngz toonz:

Cloo Zâu Tênb-Huungh, six Pha cloon pănh nyăngz Zâu, six Zâu Yê-su Jix-Tuz hâuđ lênh, sađ pôz, sađ peengh oonz phunz mâyh.

3Yaz sâuf hâuđ Zâu Tênb-Huungh, senz yaz nongc đăngb zeengh nyăngz stimz nyâuđ, bix stipx tăng wax đomc claof jex nyăngz puf tauh ayx cumh pâuz bokc dlic wax Tauh, yâuc noib munf săngx tauv mâyh max setc tiny yămz yaz cloo Zâu nyăngz săngx huđ, 4yaz săngx tauv mâyh nyăngz mâyc womz, senz numđ oix tuz pongh mâyh nzongf, phunz yaz tuz numđ nyađ, 5yâuc săngx tauv mâyh neetb zen stimz Zâu, cayx năngđ cah đangc yămz mâyh nyăngz côx ti, Lô-itx wax huungđ zen stimz nâyx, cloon yămz mâyh nyăngz nzif, Yu-nit wa nâyx, yaz zen coong wax huungđ zen stimz lauf jinh đangh yămz mâyh cah njaf.

6Wâyc nâyx, yaz bux mâyh oix zuc ayx phunz Zâu Tênb-Huungh nyăngz pôz phutx hongđ staox, senz tăng yaz tăpx puf ănz mâyh bix tuz stipx wax huungđ pôz. 7Wâyc Zâu Tênb-Huungh six max zâyf sađ phunz pănh naih cumh nzav nyăngz stimz nyâuđ, six phunz njoongh nyăngz stimz nyâuđ, naih nyâuđ stăngz munh yâuc hayh cun tuz cănh. 8Wâyc nây, mâyh ayx zanyx manyf phunz pănh nyăngz Zâu six năngx gâyf numđ nyayz, yâuc năngx gâyf numđ nyayz, yaz wâyc Nănh bix zuc yămz nzauh nyăngz jau, oix zuc wâyc Cuđ Jenx bix songc tanyđ zâuđ, păngc yămz Zâu Tênb-Huungh nyăngz tômx jab, 9nây six Zâu cănh njâuv pănh yâuc êu pănh taih yămz đăngb zeengh nyăngz jau, max zâyf âyz pănh ayx nyăngz cumh pâuz, six âyz Nănh cănh tingc taih nyăngz zux ix yămz pôz cah njaf, senz tăng cah đangc sax stâyv sax đaic tuz sađ phunz pănh yămz Zâu Yê-su Jix-Tuz cah njaf, 10bix nâyx zanyf nzăngđ tuz hinđ manyf setb taih, wâyc pănh nyăngz Njâuv Zâu hinđ setb taih, six Zâu Yê-su Jix-Tuz, Nănh bopc paic tayc nyăngz jab, yâuc hinđ manyf săngh mengc cloon max hayh tayc nyăngz jau yămz nây Cuđ Jenx, 11yâuc wâyc nây Cuđ Jenx yaz bix tuz sên taih nongc ayx nzônh gâyf munh, ayx cumh pâuz munh, yâuc ayx stênx steengb, 12nzof yâuc wâyc nây yaz bix zuc tanyđ nâyx đomc zâuđ. Six yaz max numđ nyayz, wâyc yaz pâyz tuz yaz zen wax Tauh six mănv, nzof yaz yâuc zen coong Nănh six hayh jămđ tuz yaz stungx phunz wax đomc ayx tuz tauv wax noib.

13Mâyh oix zuc nongc nyâuđ zen yâuc stăngz munh yămz Zâu Yê-su Jix-Tuz cah njaf, bix nzauf sen mâyh numđ tăng yaz nzaox mâyh nâyx đomc gongx nyăngz jau. 14Oix zuc păngc Zâu Singx-Lingh bix jămđ tuz jaoz phunz wax đomc gongx nyăngz jau, six săngh yămz pănh cah njaf wa Tauh.

15Mâyh yâuc pâyz, coong yămz wa Ê-si nyăngz munh yetx stong quanyf yaz nzuf, yămz wax đomc naih cloon Phi-jê-lat cloon Hê-mô-gê-nêt.

16Joođ Zâu hâuđ lênh Ô-nê-si-phô-lat wax sênz pyau munh, wâyc nănh njinh leox oonz yaz nyăngz nyâuđ, yaz zuc njab langb stayb nănh yâuc max numđ nyayz, 17nzof, nănh ah yađ taih tauv Lô-ma dlanyh wax zanyf, yâuc coonx taih zah lov yaz, songđ lov tuz pongh. 18Cloo Zâu sađ pôz phunz nănh tauv wax noib hayh tuz tăng Zâu hâuđ lênh. Nzof mâyh yâuc cănh pâyz tuz yox coong, yămz wa Ê-phê-sô nănh ayx cumh pâuz đuungx năngđ laix.