1 Ti-mô-tai 6

1Yetx stong ayx nâuh nyăngz munh tauv laiv, oix zuc nongc nyâuđ zanyb saix cănh nyăngz zâu, phunz Zâu Tênb-Huungh nyăngz manyh cloon nzaox nyăngz gâyf max zuc coong jămb. 2Nzof, laiv lanh nâuh naih zâu six zen Zâu nyăngz munh, six năngx gâyf păngc coong stiz six yâuf pez bix mangc stam, six oix zuc bokc dlic năngx nzongf têx timb, wâyc stiz six stăngz nyăngz zen Zâu munh yâuc songc ayx Zâu cumh pâuz nyăngz munh. Mâyh oix zuc nzaox yâuc quinb bux nâyx đomc jau.

3Năngđ coong naih munh nzaox pitc huungđ gâyf bix yâuc max stipx gongx nyăngz wac, six senz pănh nyăngz Zâu Yê-su Jix-Tuz nyăngz wac, cloon nzaox tauv lêpc gongx Zâu nyăngz jau têx, 4wax tauh six ayx lub nyăngz munh, max pâyz luungđ tiny, yâuc cungb oix ngwâyz naic yâuc tinyh panx, tinyh nzeengz stămđ wax đomc wac, songđ taux wa naih tinyh hănđ, tinyh nzeengz, hib nzêmh, lanh nyâyh huđ ănz lanh, 5naih tinyh zenđ, yămz wax đomc nyâuđ huđ nyăngz munh yâuc max naih senz gâyf, stiz nyâyh coong lêpc gongx Zâu six hayh tuz puv quâyx.

6Six naih pong nyâuđ nyăngz jau cloon lêpc gongx Zâu nyăngz jau, nzăngđ senz nyăngz puv quâyx lub. 7Wâyc pănh max nzâyz luungđ nzac bamh canz taih, wâyc nây pănh lauf max hayh nzâyz tuz luungđ muf. 8Tinyh phanv naih năngv nhlinc, naih guyz quav zuz, pănh six oix zuc pong nyâuđ yămz nâyx đomc jau. 9Six wax đomc oix tuz puv quâyx nyăngz munh, songđ tuih stauc stâyv nyâuđ nyăngz jau yâuc zuc ploz lopb, cloon đuungx huungđ stimz nyâuđ oix oongx nzongf nyăngz jau, six senz phunz munh stimz yuc nzac wax đomc max săngh luungđ nyăngz jau yâuc zuz mêtc. 10Wâyc mauh nyanh nyăngz jau six muif huungđ okx nyăngz coonz tay, naih munh wâyc oix nongc nyanh bix zuc jaf ninyh gâyh zen stimz, yâuc hoiđ phunz stiz zuc pongh đuungx huungđ zâuđ nanc.

11Six sây lex, mâyh six Zâu Tênb-Huungh nyăngz munh, oix zuc pyenv goib wax đomc jau, bix lov peengh stimz nyăngz jau, lêpc gongx Zâu nyăngz jau, zen stimz, stăngz munh nyăngz jau, stimz đao, dlênc. 12Oix zuc wâyc zen stimz bix bopc gongx nyăngz zax, oix zuc nzauf stâyv quâyx nyăngz mengc năngx sen, senz êu mâyh taih nyăngz jau, nzof mâyh yâuc ayx gongx nyăngz zanyx manyf nhlimc yămz đuungx lanh zanyx manyf munh nyăngz cah đangc. 13Yaz yămz Zâu Tênb-Huungh nyăngz cah đangc, senz ayx phunz muif huungđ tuz săngh wax Tauh, yâuc yămz Zâu Yê-su Jix-Tuz nyăngz cah đangc, senz yămz Boon-ti-atc Phi-latx nyăngz cah đangc ayx zanyx manyf gongx wax Tauh, zăpx mâyh, 14coong mâyh oix zuc âyz nâyx đomc lanyf ayx năngx clăkx clunh nzuf, phunz max naih tinc nzêmh, ayx tuz tauv pănh nyăngz Zâu, six Zâu Yê-su Jix-Tuz hinđ setb taih wax noib, 15Nănh six, Yămz Njăngb Quaix Wax Tauh Zâu Tênb-Huungh, senz payh tuz munh tanv, yâuc ah tauh đokc, ayx manf huungh nyăngz Huungh cloon manf zâu nyăngz Zâu, ayx phunz hinđ setb taih toix Nănh nyăngz săngx huđ wax Tauh, 16cungb Nănh ah tauh max hayh tayc, stâyv yămz wa gwăngz eeng nyăngz tinc max naih mănv hayh ninyh stătx tuz, max zeengx naih mănv phătc quaix Nănh, yâuc max naih mănv hayh phătc tuz, cloo phunz Nănh tuz munh zanyb cloon tômx jab tauv banc stâyv banc đaic. A-meen.

17Oix zuc zăpx bux puv quâyx munh yămz nây stâyv sangc năngx gâyf ayx lub, yâuc năngx gâyf păngc yămz max hayh caođ tuz wăn nyăngz jax toongx, oix zuc păngc yămz Zâu Tênb-Huungh, senz sađ muif huungđ dloih nzuf phunz pănh numđ nyađ stipx wax Tauh, 18yâuc zăpx êu stiz ayx gongx nyăngz jau, ayx muif huungđ gongx nyăngz cumh pâuz, ayx nyâuđ quăng stăngc munh, yâuc bênc săngh nyâuđ nongc tanb phunz munh, 19zaub njâuh phunz cănh nyăngz stinb ah huungđ gongx nyăngz coonz tay tăngđ, phunz tauv cah đangz phanx nyăngz noib, stiz nzăngđ hayh tuz naih senz nyăngz săngh mengc.

20Ti-mô-tai lex, mâyh oix zuc cayb leđ tuz jaoz phunz mâyh nyăngz jau, pyenv goib bamh munh wax đomc max naih luungđ stuyh nyăngz wac, cloon tinyh zenđ nyăngz jau ja ayx cayx năngđ six bănh sangz nâyx wax đomc, 21naih ah phanx munh, wâyc coong ayx nâyx, songđ ninyh gâyh goib zen stimz.

Cloo Zâu nyăngz pôz cloon nyâuh yămz.