Skip to content
BibleKenya

Dao Ao Dai Literal Text

2 Ti-mô-tai 2

Năngđ nây, sây lex, mâyh oix zuc caođ Zâu Yê-su Jix-Tuz nyăngz pôz bix ayx phunz mâyh njoongh taih. Mâyh yămz đuungx lanh zanyx manyf munh mungh tongx bix mungv tăng yaz wax đomc wac, oix zuc jaoz phunz neetb zen stimz, nzof stiz yâuc hayh nzaox tuz pitc lanh munh wax đomc. Oix zuc cloon yaz songc tanyđ zâuđ, năngđ Zâu Yê-su Jix-Tuz nyăngz ah lanh peengz yoiz nâyx. Ayx peengz nyăngz munh, six max naih mănv năngx phunz nây stâyv sangc nyăngz jau taih quenđ nyâuđ, cungb nyâyh ayx laix nzăngđ tuz hoopđ sên nănh taih wax tauh munh. Lauf tinyh năngđ, tinyh tâu tiuv nyăngz munh, năngđ coong max âyz jămc gâyf ayx têx, six max hayh tuz stipx hingh nyăngz tany. Njayh njingh nyăngz munh ayx zâuđ tah yetx six zuc tuz stipx jeengz zunb. Oix zuc cayb nyâyh mungv yaz coong nyăngz wac, wâyc Zâu six cănh sađ phunz mâyh hayh pâyz tuz muif huungđ.

Oix zuc săngx coong Zâu Yê-su Jix-Tuz six Đa-witx huungh nyăngz sây stunz, tuz ayx tăng tayc săngh taih, âyz năngđ yaz nzônh nyăngz Cuđ Jenx nâyx, yâuc wâyc nây Cuđ Jenx, yaz bix zuc tanyđ zâuđ ayx tuz zuc njab langb stayb cayx năngđ ah tauh stoif munh, six Zâu Tênb-Huungh nyăngz wac yâuc max zuc stayb. Wâyc nây, yaz nyunc tanyđ muif huungđ wâyc wax đomc tuz sên taih nyăngz munh, phunz stiz lauf hayh tuz njâuv yămz Zâu Yê-su Jix-Tuz, cloon stâyv quâyx nyăngz gwăngz eeng.

Nâyx zâux wac six senz nyăngz:

“Năngđ coong pănh cloon Nănh tayc, pănh six lauf cloon Nănh săngh.

Nzof năngđ coong pănh tanyđ tuz hingh, pănh six lauf tuz cloon Nănh cun.

Năngđ coong pănh pyenv Nănh, Nănh six lauf pyenv pănh.

Năngđ coong pănh nyâuđ max zanyx, Nănh six lauf nyâuđ zanyx,

wâyc Nănh six max hayh cănh pyenv Nănh.”

Oix zuc bux nâyx đomc jau phunz wax đomc zen Zâu nyăngz munh, yâuc yămz Zâu Tênb-Huungh nyăngz cah đangc zăpx stiz năngx gâyf nzeengz nây nzeengz wa, wâyc max hayh stăngc tuz luungđ, cungb hayh hoiđ zuc mungv nyăngz munh cuungv. Mâyh oix zuc jab ayx năngx tuz hoopđ Zâu Tênb-Huungh nyăngz nyâuđ, năngđ ah lanh ayx cumh pâuz nyăngz munh max naih tinc nzêmh nâyx, yâuc nzaox năngx toix senz gâyf nyăngz wac. Yâuc, oix zuc pyenv goib max săngh luungđ wax đomc wac stanc, wâyc wax đomc wac six cungb hayh ayx phunz munh max lêpc gongx Zâu cuungv, stiz coong nyăngz wac six cayx năngđ phutx a yootz nâyx, yămz wax đomc six naih Hi-mê-nê-atc cloon Phi-lê-tat stiz ninyh longđ cloon senz gâyf, yâuc coong six munh săngh taih nyăngz jau taih blătc nzof gôh, stiz songđ ayx phunz ah phanx munh nyăngz zen stimz lunc. Six, Zâu Tênb-Huungh jăpc taih nyăngz coonz tay six tăngđ nzongf, wâyc naih wac cayx năngđ tăpb yenx nâyx coong: “Zâu pâyz tuz laiv lanh six Nănh nyăngz munh” yâuc coong “Tinyh phanv laiv lanh êu Zâu nyăngz manyh six oix zuc pyenv goib huđ nyăngz jau.”

Yămz ah sênz pyau lub, nyăngz tungh zăngc max zâyf cungb nongc sămz nongc nyanh pec ayx cuungv, yâuc năngx nongc njăngx nongc nib nhlâuh ayx, ah phanx six nongc phunz cumh pâuz saix, ah phanx six nongc phunz cumh pâuz stanc. Wâyc nây, năngđ coong laiv lanh cănh stav nănh năngx gâyh wax đomc naih wâyx nyăngz jau, wax lanh six săngh ah cuyb tungh zăngc saix, phunz nănh nyăngz Zâu, yâuc tuz lanyc setb taih nongc njâuh phunz muif huungđ cumh pâuz gongx.

Oix zuc pyenv goib munh gunx munh oix wax đomc pongz lauh nyăngz jau, bix lov peengh stimz nyăngz jau, zen stimz, cloon stăngz munh nyăngz jau, yâuc cloon nongc đăngb zeengh nyăngz stimz nyâuđ caođ Zâu wax đomc munh hoopđ stimz yămz. Yâuc oix zuc pyenv goib wax đomc oongx nyăngz tinyh nzeengz wac, max naih luungđ stuyh, wâyc pâyz tuz coong cungb hayh ayx phunz munh tinyh panx cuungv. Zâu nyăngz pâuz six max hoopđ zuc tinyh panx, yâuc oix zuc ayx gongx ănz muif lanh munh, hayh nzaox munh, yâuc naih nyâuđ tanyđ tuz, yâuc ayx nyâuđ dlênc quinb bux nzeengz cloon pănh wax đomc munh, săngx đanyf Zâu Tênb-Huungh năngx sađ phunz stiz tuz coi nyâuđ nhlimc stoif yâuc pâyz tuz senz gâyf, nzof stiz năngx hayh tuz điub taih pyăux đutb manđ nyăngz ploz, wâyc stiz zuc manđ ênz ninyh yac ayx âyz nănh nyăngz zux ix.

Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.