2 Tê-sa-lô-ni-ca 3

1Six, yâuf pez lex, joođ cloo Zâu phunz buz, phunz Zâu nyăngz gâyf tuz nzônh ninyh quăng yâuc tuz munh tanv, cayx năngđ yămz nyâuh nâyx, 2yâuc phunz buz tuz pyăux đutb nyâuđ nhlengc nyăngz munh cloon ayx okx wax đomc munh, wâyc max zâyf muif lanh munh naih zen stimz. 3Zâu Nănh six nyâuđ zanyx, cănh ayx phunz nyâuh tuz stâuđ tăngđ, yâuc leđ phunz nyâuh tuz pyăux đutb okx nyăngz munh. 4Buz zen tingc yămz Zâu coong nyâuh six jinh đangh ayx, yâuc năngx ayx âyz buz nzaox nyâuh nyăngz jau. 5Cloo Zâu yenv nyâuh nyăngz stimz nyâuđ huungv staox Zâu Tênb-Huungh nyăngz stăngz ninyh, cloon Zâu Jix-Tuz stimz đao nyăngz jau.

6Six, yâuf pez lex, tim pănh nyăngz Zâu Yê-su Jix-Tuz nyăngz manyh, buz quinb nyâuh, oix zuc pyenv goib yămz ayx bah camx bah caiz wax đomc munh, yâuc max ayx âyz nyâuh stipx tăng buz nyăngz gâyf wax đomc. 7Wâyc nyâuh lauf cănh pâyz tuz coong hoopđ zuc âyz buz nyăngz gao ayx năngđ laix, wâyc buz six max zâyf coong tinyh phanv ayx bah camx bah caiz yămz nyâuh cah njaf, 8buz yâuc max cungb nhlinc laiv lanh nyăngz năngv, six đoomz nzămc zuc ayx cumh pâuz zâuđ, zuc dlauc wâyb, phunz max zâuđ wâyb tauv nyâuh laiv lanh, 9Max zâyf wâyc buz max naih gâyf, six wâyc buz numđ oix cănh ayx ah huungđ gao nongc phunz nyâuh âyz buz. 10Wâyc buz năngx jinh cloon nyâuh yămz wax zanyf, buz lauf zăpx nâyx đomc wac bux phunz nyâuh coong: “Năngđ coong laiv lanh max oix ayx cumh pâuz wax lanh six lauf năngx gâyf nhlinc.” 11Wâyc buz numđ coong yămz nyâuh wa naih ah phanx munh yămz ayx bah camx bah caiz, max ayx cumh pâuz yâuc cungb hayh coong munh cuungv. 12Six yămz Zâu Yê-su Jix-Tuz cah njaf, buz quinb bux ayx năngđ nâyx wax đomc munh, stiz oix zuc stingb njâuh bix ayx cumh pâuz nongc cănh yuungf stiz. 13Six yâuf pez lex, nyâuh ayx gongx nyăngz jau, six năngx gâyf numđ ngăngc numđ conv. 14Nzof năngđ coong laiv lanh max ayx âyz buz ja nâyx zây jenx nyăngz wac, six oix zuc săngx wax tauh munh — năngx gâyf cloon nănh tinyh tongb, nongc phunz nănh cănh numđ nyayz. 15Yâuc năngx gâyf stunx nănh ayx yônz zaz, six oix zuc quinb nănh cayx năngđ ah lanh yâuf pez nâyx.

16Joođ peengh oonz nyăngz Zâu muif dlih sađ peengh oonz phunz nyâuh yămz muif huungđ jau. Cloo Zâu cloon nyâuh tinyh đoih yămz. 17Nâyx đomc stêtb nyăngz wac, six cănh yaz — Phao-lô nyăngz puf ja, — nây six yaz njih hoouđ nyăngz đangc yămz muif zây jenx. Yaz six ja ayx nâyx. 18Cloo pănh nyăngz Zâu Yê-su Jix-Tuz nyăngz pôz, cloon nyâuh tinyh đoih yămz.