2 Tê-sa-lô-ni-ca 2

1Yâuf pez lex, coong tauv pănh nyăngz Zâu taih nyăngz jau, six Zâu Yê-su Jix-Tuz, cloon pănh muf pongh Nănh nyăngz jau, buz joođ nyâuh 2năngx gâyf phunz nyâuh nyăngz nyâuđ lunc, max six nyâuđ wangb, yâuc năngx gâyf phunz tăng za gâyf nyăngz manđ, max six naih munh pungx wac taih, max six pungx jenx taih, ayx cayx năngđ cay six tăng buz taih nâyx, bix coong Zâu nyăngz noib tauv nzof gôh naz. 3Cloo phunz max naih mănv hayh nongc laiv huungđ zux ix taih njaf tuz nyâuh, wâyc tah yetx six naih munh nămx nyâuđ quanyf Zâu đangc, cloon pamf gâyf wax tauh munh six tuz hinđ setb taih, senz tingc săngh nongc zuc mêtc wax tauh, 4nănh oix nzeengz sen yâuc cănh tanv nănh ayx năngx lub quaix muif huungđ tuz hipđ ayx huungh nongc bongc wax đomc tauv laiv, ayx tuz nănh năngx cănh stâyv yămz bongc Zâu Tênb-Huungh nyăngz pyau, yâuc cănh coong nănh six Zâu Tênb-Huungh. 5Nyâuh max săngx coong, yaz năngx jinh cloon nyâuh yămz wax zanyf, yaz lauf coong phunz nyâuh pâyz nâyx đomc jau nzof haz? 6Nzof nâyx zanyf nyâuh lauf pâyz tuz laiv tauh jinh đangh tăng nănh, phunz nănh cungb hinđ setb taih toix nănh nyăngz săngx huđ cuungv. 7Wâyc pamf gâyf nyăngz jau six jinh đangh pinyx ayx cumh pâuz nzof gôh, six tăng nzez nâyx huungđ jau wax Tauh six năngx yămz ayx tuz tauv Nănh zuc zoz setb ninyh, 8tăng wa pamf gâyf wax tauh six tuz hinđ setb taih, Zâu Yê-su six nongc tăng Nănh nyăngz nzetx setb taih nyăngz siv mêtc wax tauh, yâuc ayx phunz nănh pênx max setb luungđ, yămz Zâu hinđ setb taih nyăngz gwăngz eeng, 9nzof tauv pamf gâyf wax tauh munh hinđ setb taih, six nongc Sax-tanx nyăngz jab ayx muif huungđ njih hoouđ cloon za nyăngz jix caox njingc setb taih, 10yâuc nongc muif huungđ cuyx quaiz nyăngz zux ix ja zuc mêtc wax đomc munh, stiz zuc mêtc wâyc stiz max stipx senz gâyf nyăngz stăngz nongc phunz stiz tuz njâuv. 11Yâuc wâyc nâyx, Zâu Tênb-Huungh songđ dluyh phunz stiz ninyh longđ jau zen za nyăngz gâyf, 12phunz muif lanh max zen senz gâyf, bix ninyh nyađ max peengh stimz nyăngz jau wax đomc munh, zuc Nănh tingc stoif nzuf.

13Six, nyâuh tuz Zâu stăngz nyăngz yâuf pez lex, buz wâyc nyâuh sâuf hâuđ Zâu Tênb-Huungh max setc tiny. Wâyc Zâu Tênb-Huungh sên nyâuh taih nongc ayx zetx toongv munh phunz nyâuh tuz njâuv, wâyc tuz Singx-Lingh stav đăngb zeengh taih, yâuc zen păngc yămz senz gâyf. 14Yâuc wâyc nâyx, Nănh bix nongc buz nzônh nyăngz Cuđ Jenx êu nyâuh taih, nongc stipx Zâu nyăngz gwăngz eeng, senz pănh nyăngz Zâu Yê-su Jix-Tuz. 15Năngđ nây, yâuf pez lex, oix zuc stâuđ năngx tăngđ, yâuc nzauf năngx sen nyâuh tuz numđ nzaox nyăngz jau, max cun buz coong nyăngz wac max six buz ja jenx nyăngz wac.

16Cloo pănh nyăngz Zâu Yê-su Jix-Tuz cloon Zâu Tênb-Huungh, six pănh nyăngz Pha, senz hâuđ lênh pănh wax Tauh, sađ phunz pănh tuz naih oonz nyâuđ yâuc naih gongx nyăngz njih mungc yămz Nănh nyăngz pôz tauv banc stâyv banc đaic, 17joođ Nănh oonz nyâuh nyăngz stimz nyâuđ phunz hayh tuz stâuđ tăngđ yămz muif huungđ cumh pâuz gongx cloon coong gongx nyăngz wac.