2 Tê-sa-lô-ni-ca 1

1Yaz, Phao-lô cloon Si-la cloon Ti-mô-tai, pungx phunz Tê-sa-lô-ni-ca jiux pangx, yămz Zâu Tênb-Huungh, six Pha, cloon pănh nyăngz Zâu, six Zâu Yê-su Jix-Tuz cah njaf. 2Cloo Zâu Tênb-Huungh, six Pha, cloon Zâu Yê-su Jix-Tuz, sađ pôz sađ peengh oonz phunz nyâuh.

3Yâuf pez lex buz zuc muif dlih wâyc nyâuh sâuf hâuđ Zâu Tênb-Huungh, năngđ nâyx six senz hoopđ, wâyc nyâuh nyăngz zen stimz cun ayx cun njoongh staox, nzof nyâuh muif lanh yâuc naih lanh stăngz lanh cun ayx cun đuungx staox; 4ayx tuz buz yâuc cănh ayx nzetx lub tanv nyâuh yămz Zâu Tênb-Huungh wax đomc jiux pangx nyăngz cah đangc, coong tauv nyâuh naih nyâuđ tanyđ yâuc naih zen stimz yămz nyâuh zuc ayx huđ wax đomc jau, cloon nyâuh jinh đangh tanyđ nyăngz zâuđ nanc, 5nây six ayx zanyx manyf yămz Zâu Tênb-Huungh peengh stimz stămđ stoif nyăngz jau, phunz nyâuh tuz payh cloon Zâu Tênb-Huungh nyăngz côkz, wâyc nâyx nomz côkz nâyx zanyf nyâuh bix zuc tanyđ zâuđ; 6wâyc Zâu Tênb-Huungh six peengh stimz nyăngz nongc huđ nyăngz jau clao phunz ayx huđ ănz nyâuh wax đomc munh, 7yâuc sađ phunz nyâuh zuc tanyđ zâuđ nyăngz munh, tuz cloon buz sec hitb conv, tauv Zâu Yê-su cloon Nănh njoongh nzongf wax đomc stinz munh tăng guungh hinđ setb taih wax zanyf, 8yămz wa tâuf byetc hongđ cah njaf, nongc phađ max pâyz Zâu Tênb-Huungh wax đomc munh, cloon max mungv pănh nyăngz Zâu Yê-su nyăngz Cuđ Jenx wax đomc munh, 9wax đomc munh six zuc phađ — zuc mêtc tauv banc stâyv banc đaic, gâyh Zâu nyăngz minb cloon Nănh tômx jab nyăngz gwăngz eeng, 10tauv Nănh taih nongc tuz gwăngz eeng tăng Nănh wax đomc đăngb zeengh munh, yâuc tuz tăng nongc nyâuđ zen Nănh wax đomc munh tanv, wâyc nyâuh zen stipx buz nyăngz zanyx manyf wac yămz buz ninyh pongh nyâuh wax noib. 11Wâyc nây, buz songđ cloo Zâu phunz nyâuh max setc tiny, phunz pănh nyăngz Zâu Tênb-Huungh stunx nyâuh six payh tuz cloon Nănh sên taih nyăngz jau, phunz Nănh nongc tômx jab ayx tuz săngh nzuf muif huungđ gongx nyăngz cumh pâuz, cloon zen stimz nyăngz cumh pâuz, 12phunz pănh nyăngz Zâu Yê-su nyăngz manyh tuz munh tanv yămz nyâuh, nzof nyâuh yâuc tuz gwăngz eeng yămz Nănh, âyz pănh nyăngz Zâu Tênb-Huungh cloon Zâu Yê-su Jix-Tuz nyăngz pôz.