1 Ti-mô-tai 1

1Yaz, Phao-lô, âyz pănh nyăngz Njâuv Zâu, six Zâu Tênb-Huungh, cloon pănh naih njih mungc nyăngz Zâu Yê-su Jix-Tuz nyăngz lanyf, ayx Zâu Yê-su Jix-Tuz nyăngz cumh pâuz munh,

2pungx phunz Ti-mô-tai, senz yaz nyăngz toonz yămz zen stimz cah njaf:

Joođ Zâu Tênb-Huungh, six Pha cloon pănh nyăngz Zâu Yê-su Jix-Tuz, hâuđ lênh, sađ pôz, sađ peengh oonz phunz mâyh.

3Cayx năngđ yaz setb jau ninyh Ma-si-đô-ni wax zanyf, bix êu mâyh zuc yămz wa Ê-phê-sô nongc phunz mâyh zăpx bux wax đomc munh năngx gâyf nzaox pitc huungđ gâyf, 4yâuc năngx gâyf mungv tauv wax đomc max naih luungđ âyz gâyf nyăngz câu cloon wax đomc stu stongz max hayh zomc, wax đomc six cungb hayh ayx phunz munh tinyh nzeengz cuungv, max hayh stăngc tuz phunz Zâu Tênb-Huungh nyăngz cumh pâuz lub staox, six tuz ayx săngh yămz zen stimz nyăngz cumh pâuz. 5Yaz zăpx nâyx đomc wac six yămz stăngz nyăngz jau cloon đăngb zeengh nyăngz stimz nyâuđ, cloon stimz nyâuđ gongx cloon senz zen nyăngz jau, 6six naih ah phanx munh, quanyf nâyx đomc jau, bix ninyh nzeengz wax đomc max setb luungđ nyăngz jau, 7oix ayx stênx steengb nzaox gâyf, six yâuc max manyh pec stiz coong nyăngz wac cloon stiz zen tingc nyăngz jau.

8Six pănh pâyz tuz coong, gâyf njanh six gongx, năngđ coong munh hayh nongc gâyf njanh tuz toix jau, 9wâyc pâyz tuz coong, gâyf njanh six max zâyf njăpc taih nongc phunz peengh stimz nyăngz munh, six nongc phunz pamf gâyf nyăngz munh cloon max mungv wac nyăngz munh, max zen gongx Zâu nyăngz munh cloon pamf stoif nyăngz munh, max zen nyăngz munh, cloon coong pib nyăngz munh, tayx nzif, tayx pha nyăngz munh, cloon tayx munh nyăngz munh, 10ayx pongz lauh nyăngz munh, munh toonz nongc munh toonz munh nzif nongc munh nzif nyăngz munh, nimc munh maic nyăngz munh, puv maoh nyăngz munh, ayx za zanyx manyf nyăngz munh, cloon yetx stong nzeengz cloon senz gâyf nyăngz munh tauv laiv, 11nây six âyz Zâu Tênb-Huungh gwăngz eeng nyăngz Cuđ Jenx gâyf, nzof yaz yâuc tuz jaoz phunz nongc nzônh nâyx huungđ gâyf.

12Yaz sâuf hâuđ pănh nyăngz Zâu, six Zâu Yê-su Jix-Tuz, senz sađ jab phunz yaz wax Tauh, wâyc Nănh zah phătc yaz six săngh zen mungc, songđ oonz yaz nongc ayx cumh pâuz, 13max cun cah đangc yaz six ah tauh coong pamf Zâu nyăngz munh, ayx huđ yâuc ayx đokc ănz, six yaz yâuc tuz Zâu hâuđ lênh wâyc yaz max zeengx pâyz luungđ, yămz yaz max zen bix ayx wax đomc. 14Six, pănh nyăngz Zâu senz naih pôz lub nzongf cloon zen stimz cloon stăngz nyăngz jau yămz Zâu Yê-su Jix-Tuz.

15Nâyx zâux wac six senz nyăngz yâuc hoopđ zuc stipx năngx nzuf, nây six: “Zâu Yê-su Jix-Tuz nzac bamh canz taih nongc njâuv stoif munh” — nzof yămz wax đomc stoif munh tauv laiv, yaz six ayx pyây. 16Yaz tuz hâuđ lênh, six wâyc năngđ nâyx, nây six nongc phunz Zâu Yê-su Jix-Tuz hayh tuz hinđ manyf nzuf Nănh nyăngz stimz đao yămz yaz cah njaf, ah lanh naih stoif lub quaix nyăngz munh, nongc ayx ah huungđ zanyx manyf phunz wax đomc zen caođ Nănh nyăngz munh hayh tuz naih stâyv quâyx nyăngz mengc. 17Cloo stâyv quâyx yămz nyăngz Huungh, senz mangc max phătc nyăngz ah tauh Zâu Tênb-Huungh tuz zanyb saix yâuc tuz gwăngz eeng, tauv banc stâyv banc đaic. A-meen.

18Yaz nyăngz toonz, Ti-mô-tai lex, yaz zăpx bux mâyh nâyx đomc wac, âyz năngđ cah đangc naih tâuc wac coong tauv mâyh wax đomc wac nâyx, phunz păngc wax đomc wac, mâyh bix hayh bopc tuz gongx nyăngz zax, 19cayb nzauf zen stimz cloon stimz nyâuđ gongx năngx tăngđ, naih ah phanx munh quanyf nâyx đomc jau, stiz nyăngz zen stimz songđ zuc sêmh nzac, 20yămz wax đomc munh six naih Hi-mê-nê-atc cloon A-lek-san-đê, yaz yâuc jaoz stiz phunz Sax-tanx nzof gôh, wâyc phunz stiz hayh tuz nzaox nzăngđ max coong pamf Zâu.