2 Cô-lin-tô 2

1Wâyc yaz nyâyh taih max ninyh pongh nyâuh six năngx gongx têx, ninyh bix zef ayx phunz nyâuh stauh. 2Wâyc zuc năngđ coong yaz cănh ayx phunz nyâuh numđ stauh, bix yaz laiv tuz numđ nyađ, tăng yaz ayx phunz numđ stauh nyăngz munh heh? 3Yaz ja phunz nyâuh năngđ nâyx, phunz tauv yaz ninyh, yaz nzăngđ max numđ stauh tăng yaz hoopđ zuc numđ nyađ nyăngz munh, yaz zen coong nyâuh muif lanh lauf stunx yaz nyăngz numđ nyađ six nyâuh nyăngz numđ nyađ. 4Nây six yaz numđ tăng yaz nyăngz stimz nyâuđ munz zâuđ, bix njâuc mâyc womz taih yâuc ja phunz nyâuh, max zâyf nongc ayx phunz nyâuh stauh, six nongc phunz nyâuh pâyz tuz yaz nyăngz stăngz yămz nyâuh six năngđ laix.

5Six năngđ coong laiv tauh ayx phunz naih numđ stauh, six max zâyf cungb cănh ayx phunz yaz numđ stauh cuungv, six lauf cloon nyâuh đuungx lanh numđ stauh — yaz lauf numđ max oix coong niđ tuz bah laiv. 6Wax tauh munh zuc nyâuh munh đuungx mađ năngđ nâyx, lauf caux nzof gôh, 7wâyc nây, nyâuh zuc quanyf phunz nănh yâuc oonz nănh nyăngz nyâuđ, six năngx gongx têx, săngx đanyf nănh hayh tuih nyâuđ, wâyc nănh numđ stauh yongf. 8Wâyc nây, yaz joođ nyâuh oix zuc zef ayx gongx ănz wax lanh munh. 9Yaz ja nâyx zây jenx six wâyc nâyx: phunz yaz hayh pâyz tuz nyâuh, mangc jađ nyâuh six mungv wac yămz manf dlayc max mungv. 10Wâyc zuc, nyâuh quanyf phunz laiv lanh munh, yaz six lauf quanyf phunz — nzof, năngđ coong yaz quanyf phunz laiv lanh munh (yaz quanyf laiv huungđ), six lauf wâyc nyâuh bix quanyf yămz Zâu Jix-Tuz nyăngz cah đangc, 11wâyc phunz Sax-tanx max hayh hingh tuz pănh, yâuc max zâyf coong pănh max pâyz tuz nănh nyăngz zux ix.

12Six, yaz ninyh tauv wa Tô-atc dlanyh wax zanyf, Zâu songđ coib jeengh phunz yaz yămz wa nzônh Zâu nyăngz Cuđ Jenx, 13six wâyc yaz max tuz pongh yaz nyăngz yâuf pez Ti-tatc, songđ numđ nyâuđ njaf max gwanb. Tăng wa, yaz songđ gâyh stiz, bix setb jau ninyh wa Ma-si-đô-ni stâyz phangz.

14Six, sâuf hâuđ Zâu Tênb-Huungh, Nănh ayx phunz buz muif dlih tuz hingh yămz Zâu Jix-Tuz, yâuc tăng buz, Nănh bix ayx phunz hayh pâyz tuz Nănh wax huungđ siv đangz pong muif đoif nzuf. 15Wâyc yămz Zâu Tênb-Huungh, buz six ayx Zâu Jix-Tuz nyăngz siv đangz, yămz tuz njâuv nyăngz munh cloon zuc mêtc nyăngz munh mungh tongx — 16yămz ah phanx munh, six săngh tayc nyăngz siv ayx phunz zuc tayc, six yămz ah phanx munh, yâuc săngh đangz nyăngz siv tăng săngh mengc taih ayx phunz tuz săngh. Laiv lanh payh tuz phunz nâyx đomc jau? 17Wâyc buz six max zâyf cayx năngđ naih đuungx lanh munh nzâyz Zâu Tênb-Huungh nyăngz wac ninyh maic ayx steengb âyx, buz six senz nongc nzuf stimz nyâuđ, âyz năngđ Zâu Tênb-Huungh paiđ phunz buz nyăngz wac, bix coong setb taih yămz Zâu Tênb-Huungh nyăngz cah đangc yâuc yămz Zâu Jix-Tuz.