Dao Ao Dai Literal Text
2 Cô-lin-tô 1
Yaz, Phao-lô, âyz Zâu Tênb-Huungh nyăngz zux ix ayx Zâu Yê-su Jix-Tuz nyăngz cumh pâuz munh, cloon pănh nyăngz yâuf pez Ti-mô-tai, pungx phunz Zâu Tênb-Huungh nyăngz jiux pangx yămz wa Cô-lin-tô, cloon yămz nzêux A-ca-ya stâyz phangz wax đomc yetx stong đăngb zeengh munh. Joođ pănh nyăngz Tênb-toongh Pha six Zâu Tênb-Huungh cloon Zâu Yê-su Jix-Tuz sađ pôz sađ peengh oonz phunz nyâuh!
Senz payh tuz tanv nyăngz Zâu Tênb-Huungh six pănh nyăngz Zâu Yê-su Jix-Tuz — nyăngz Pha — senz hâuđ lênh munh wax tauh Tênb-toongh Pha, cloon oonz nyâuđ tauv laix nyăngz Zâu Tênb-Huungh, yămz buz pongh nyăngz muif huungđ zâuđ nanc, Nănh oonz buz nyăngz nyâuđ, năngđ nây buz nzăngđ hayh nongc tăng Zâu Tênb-Huungh oonz buz nyâuđ nyăngz jab, nongc oonz nyâuđ phunz pongh zuc muif huungđ zâuđ nanc wax đomc munh. Wâyc zuc Zâu Jix-Tuz nyăngz zâuđ nanc taih yămz buz ayx năngđ laix, buz lauf yămz Zâu Jix-Tuz bix năngđ wa nâyx oonz nyâuđ. Six năngđ coong buz zuc tanyđ zâuđ nanc, nây six wâyc phunz nyâuh tuz oonz nyâuđ yâuc tuz njâuv; nzof năngđ coong buz tuz oonz nyâuđ, six lauf phunz nyâuh hayh tuz oonz nyâuđ, wâyc nyâuh tuz songc tanyđ wax đomc zâuđ nanc cayx năngđ buz tanyđ nâyx. Buz senz naih njih mungc yămz nyâuh tăngđ nzongf, wâyc pâyz tuz coong nyâuh cloon buz songc tanyđ zâuđ ayx năngđ laix, six lauf songc tuz oonz nyâuđ năngđ wa nâyx.
Yâuf pez lex, buz max oix nongc nyâuh max pâyz tuz tauv buz yămz wa Ê-si stâyz phangz pongh quaix nyăngz zâuđ nanc, buz pongh nyăngz zâuđ nanc senz neetb nzongf, blătc nzuf buz nyăngz jab, ayx tuz buz lôx max naih nyâuđ nyâyh mungc coong năngx hayh tuz săngh. Buz six nyâyh coong buz bâyf zuc tayc lêc, buz numđ max hayh cănh mungc tuz buz nyăngz jab, six mungc yămz Zâu Tênb-Huungh nyăngz jab, senz hayh ayx phunz munh tayc săngh taih wax Tauh, Nănh njâuv buz tuz gâyh đutb tayc nyăngz jau lub năngđ nâyx, Nănh six njâuv buz — nzof, buz yâuc naih njih mungc coong Nănh six lauf năngx njâuv buz timb, nzof nyâuh lauf wâyc buz bix stăngc cloo Zâu — wâyc tuz tăng đuungx lanh munh cloo Zâu, buz bix tuz pôz, yâuc tăng buz bix naih đuungx lanh munh sâuf hâuđ Zâu Tênb-Huungh.
Nzof buz cănh tanv buz nyăngz jau six năngđ nây: wâyc buz nyăngz stimz nyâuđ cănh ayx zanyx manyf coong, buz yămz nây bamh canz six ayx nyâuđ zanyx yâuc đăngb zeengh yămz Zâu Tênb-Huungh, max zâyf păngc bamh munh nyăngz tongb manyh, six păngc Zâu nyăngz pôz, tah yetx six yămz nyâuh cah njaf. Wâyc buz max ja pitc huungđ gâyf phunz nyâuh, blătc nzuf nyâuh toc yămz nây jenx tauv laiv nzof yâuc saz tuz, yaz yâuc mungc coong nyâuh hayh saz tuz nzuf — cayx năngđ nyâuh lauf cănh pâyz tuz buz nâyx — nây six buz ayx phunz nyâuh tuz numđ nyađ, cayx năngđ nyâuh lauf ayx phunz buz tuz numđ nyađ nâyx, tauv pănh nyăngz Zâu Yê-su taih wax noib.
Wâyc zen ayx năngđ nâyx, cah đangc yaz cayx đa ninyh tayđ nyâuh, phunz nyâuh hayh tuz pôz năngx đuungx têx timb, bix zef tăng nyâuh wa quaix wa Ma-si-đô-ni muf, zef tăng Ma-si-đô-ni phunb đangz lauf nyâuh wa, phunz nyâuh stungx yaz ninyh wa Yu-đê stâyz phangz. Yaz nyâyh ayx năngđ nâyx, zâyf yaz ayx max tingc max? Max six yaz cănh âyz stimz nyâuđ nyâyh ayx nâyx đomc, bix phunz yaz ah zanyf coong “Zâyf” ah zanyf coong “Max zâyf” heh?
Wâyc Zâu Tênb-Huungh six neetb stimz, năngđ nây buz coong phunz nyâuh nyăngz wac six max zâyf coong, ah zanyf coong “Zâyf” ah zanyf coong “Max zâyf”. Wâyc Zâu Tênb-Huungh nyăngz Toonz, six Zâu Yê-su Jix-Tuz, senz buz nzônh phunz nyâuh wax Tauh — six yaz cloon Si-la cloon Ti-mô-tai — max zâyf ah zanyf coong “Zâyf” ah zanyf coong “Max zâyf”, yămz Nănh six cungb “Zâyf nzuf”. Wâyc Zâu Tênb-Huungh nyunc wax đomc wac yămz Nănh six “Senz nzuf”. Wâyc nây, lauf păngc yămz Nănh pănh bix coong, “A-meen” stungx phunz Zâu Tênb-Huungh wâyc Nănh nyăngz gwăngz eeng. Nzof, Zâu Tênb-Huungh six njăpc buz taih phunz nyâuh yămz Zâu Jix-Tuz wax Tauh, yâuc zoz yâuh njămh ănz buz, Nănh tăpb yenx ănz buz, songđ sađ Singx-Lingh nongc ayx tingc stinh ănz buz nyăngz nyâuđ njaf.
Yaz joođ Zâu Tênb-Huungh nongc yaz nyăngz mengc hoonh ayx zanyx manyf coong, nây six wâyc nyangc phunz nyâuh, yaz bix max ninyh wa Cô-lin-tô. Max zâyf coong buz oix cun nyâuh nyăngz zen stimz, six wâyc buz six cloon nyâuh songc numđ nyađ, wâyc nyâuh tuz stâuđ tăngđ yămz nyâuh nyăngz zen stimz nzof.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.