1 Yô-hanx 4

1Stăngz nyăngz yâuf pez lex, munh coong stiz naih Singx-Lingh nyâuh six năngx gâyf tinyh phanv zen, six oix zuc stâyv mangc jađ stiz naih nyăngz six zâyf tăng Zâu Tênb-huungh taih max zâyf, wâyc naih đuungx lanh za tâuc wac munh, yămz nzêux nây guungh đi. 2Nây six phunz nyâuh hayh saz tuz Zâu Tênb-Huungh nyăngz Singx-Lingh: Laiv Tauh nhlimc Zâu Yê-su Jix-Tuz nzac taih pênx tauh bamh munh, wax tauh six tăng Zâu Tênb-Huungh taih, 3nzof laiv Tauh max nhlimc Zâu Yê-su, six max zâyf tăng Zâu Tênb-Huungh taih. Wax tauh six nzeengz cloon Zâu Jix-Tuz nyăngz manđ, senz nyâuh numđ coong oix zuc taih wax tauh, nâyx zanyf yâuc yămz nây bamh canz nzof gôh. 4Sây lex, nyâuh six săngh Zâu Tênb-Huungh nyăngz munh, yâuc tuz hingh nănh stiz nzof, wâyc yămz nyâuh nyăngz cah njaf wax Tauh, six năngx njoongh têx, yămz nây bamh canz wax tauh. 5Stiz six săngh nây bamh canz nyăngz munh. Wâyc nây, stiz cungb coong âyz bamh canz, nzof bamh munh yâuc mungv nănh stiz. 6Pănh săngh Zâu Tênb-Huungh nyăngz munh. Laiv lanh pâyz Zâu Tênb-Huungh six cănh mungv pănh. Laiv lanh max zâyf Zâu Tênb-Huungh lauf cănh max mungv pănh. Wâyc nây, pănh songđ hayh saz tuz senz gâyf nyăngz Singx-Lingh cloon za gâyf nyăngz manđ.

7Stăngz nyăngz yâuf pez lex, pănh oix zuc lanh stăngz lanh, wâyc zuc stăngz six tăng Zâu Tênb-Huungh taih, nzof laiv lanh stăngz six tuz tăng Zâu Tênb-Huungh stengb taih, yâuc pâyz tuz Zâu Tênb-Huungh. 8Laiv lanh max stăngz munh six max pâyz Zâu Tênb-Huungh, wâyc zuc Zâu Tênb-Huungh six stăngz nyăngz coonz. 9Zâu Tênb-Huungh nyăngz stăngz tuz hinđ manyf setb taih phunz pănh năngđ nâyx, Zâu Tênb-Huungh paiđ Nănh nyăngz Tauh Toonz nzac bamh canz taih phunz pănh păngc wax tauh Toonz bix tuz săngh. 10Stăngz nyăngz jau six năngđ nây, max zâyf pănh stăngz Zâu Tênb-Huungh đangc, six Nănh stăngz pănh đangc, yâuc paiđ Nănh nyăngz Toonz taih, nongc ayx stanyb lanyh, wâyc stav pănh nyăngz stoif. 11Stăngz nyăngz yâuf pez lex, wâyc Zâu Tênb-Huungh stăngz pănh tuz năngđ nâyx, pănh lauf oix zuc lanh stăngz lanh. 12Max zeengx naih mănv tuz phătc quaix Zâu Tênb-Huungh. Six năngđ coong pănh lanh stăngz lanh, Zâu Tênb-Huungh six yămz pănh cah njaf, nzof Nănh nyăngz stăngz yâuc tuz clăkx clunh yămz pănh cah njaf. 13Wâyc nây pănh pâyz tuz coong pănh yămz Nănh cah njaf, Nănh yâuc yămz pănh cah njaf, wâyc Nănh sađ Nănh nyăngz Singx-Lingh phunz pănh. 14Wâyc buz tuz phătc songđ ayx zanyx manyf coong, Tênb-toongh Pha paiđ Nănh nyăngz Toonz taih, ayx bamh munh nyăngz Njâuv Zâu. 15Tinyh phanv laiv lanh nhlimc coong, Zâu Yê-su six Zâu Tênb-Huungh nyăngz Toonz, Zâu Tênb-Huungh songđ yămz wax tauh cah njaf, nzof wax tauh lauf yămz Zâu Tênb-Huungh cah njaf. 16Pănh pâyz yâuc zen coong Zâu Tênb-Huungh nyăngz stăngz yămz pănh cah njaf. Zâu Tênb-Huungh six stăngz nyăngz coonz, laiv lanh naih nyâuđ stăngz munh, six yămz Zâu Tênb-Huungh cah njaf, nzof Zâu Tênb-Huungh lauf yămz wax lanh munh cah njaf. 17Wâyc nây, stăngz nyăngz jau oix zuc ayx năngx clăkx clunh yămz pănh cah njaf, phunz tauv stămđ stoif wax noib pănh nzăngđ hayh tuz pungx stimz, wâyc zuc Nănh six năngđ laix, pănh lauf oix zuc năngđ wa nâyx, yămz nây bamh canz. 18Yămz stăngz cah njaf six max naih cumh nzav nyăngz jau, nzof, clăkx clunh nyăngz stăngz zoz cumh nzav nyăngz jau setb ninyh, wâyc zuc cumh nzav nyăngz jau six cumh nzav zuc tingc stoif. Nzof laiv lanh numđ cumh nzav, six max zeengx tuz clăkx clunh yămz stăngz cah njaf. 19Pănh stăngz six wâyc Nănh stăngz pănh đangc. 20Năngđ coong laiv lanh coong: “Yaz stăngz Zâu Tênb-Huungh,” bix hănđ nănh nyăngz yâuf pez, wax tauh six puv maoh nyăngz munh. Wâyc zuc laiv lanh max stăngz, nănh mangc tuz phătc nyăngz yâuf pez, wax tauh munh lauf max hayh stăngz, mangc max phătc wax Tauh Zâu Tênb-Huungh. 21Senz, pănh tuz stipx tăng Nănh taih nâyx huungđ lanyf, coong laiv lanh stăngz Zâu Tênb-Huungh, six lauf oix zuc stăngz cănh nyăngz yâuf pez.