1 Yô-hanx 3

1Phanv mangc, Tênb-toongh Pha sađ lub nzongf nyăngz stăngz phunz pănh, phunz pănh tuz hipđ ayx Zâu Tênb-Huungh nyăngz toonz sab, nzof pănh yâuc senz zâyf Nănh nyăngz toonz sab. Wâyc nây, bamh munh max pâyz pănh, wâyc zuc stiz max pâyz Nănh. 2Stăngz nyăngz yâuf pez lex, nâyx zanyf pănh six Zâu Tênb-Huungh nyăngz toonz sab, nzof pănh six năngđ laix yâuc max zeengx pâyz tuz. Six pănh pâyz tuz coong, tauv Nănh hinđ setb taih wax zanyf, pănh yâuc tuz cayx năngđ Nănh nâyx, wâyc pănh six tuz phătc Nănh, năngđ Nănh senz naih nyăngz nâyx. 3Laiv lanh naih nyâyh mungc oix tuz cayx năngđ Nănh nâyx, wax lanh six cănh leđ nănh ayx đăngb zeengh, cayx năngđ Zâu Jix-Tuz six đăngb zeengh nâyx. 4Tinyh phanv laiv lanh longđ stoif six ayx pamf gâyf njanh nyăngz jau. Wâyc zuc, stoif six pamf gâyf njanh nyăngz jau. 5Nyâuh pâyz tuz coong Zâu Jix-Tuz nzac taih, six nongc tayv pănh nyăngz stoif, wâyc Nănh six max naih stoif. 6Tinyh phanv laiv lanh yămz Nănh cah njaf six max pamf stoif. Nzof laiv lanh pamf stoif six max zeengx phătc quaix Nănh, yâuc max zeengx pâyz Nănh. 7Sây lex, năngx gâyf phunz laiv lanh ênz nyâuh ninyh longđ jau. Wâyc zuc laiv lanh ayx peengh stimz nyăngz jau, six peengh stimz, cayx năngđ Nănh six peengh stimz nâyx. 8Laiv lanh longđ stoif six săngh manđ nyăngz munh, wâyc zuc manđ six tăng quef coonz longđ stoif. Wâyc nây, Zâu Tênb-Huungh nyăngz Toonz nzac taih, six nongc mêtc nzuf manđ nyăngz cumh pâuz. 9Laiv lanh tuz tăng Zâu Tênb-Huungh steengb taih, six max longđ stoif, wâyc naih Zâu Tênb-Huungh nyăngz stimz stingx yămz nănh cah njaf. Wax lanh munh songđ max hayh longđ stoif, wâyc zuc nănh six tuz tăng Zâu Tênb-Huungh steengb taih. 10Wâyc nây, pănh six hayh saz tuz, Zâu Tênb-Huungh nyăngz toonz sab, cloon manđ nyăngz toonz sab: Laiv lanh max ayx peengh stimz, six max zâyf Zâu Tênb-Huungh nyăngz munh, nzof laiv lanh max stăngz nănh nyăngz yâuf pez lauf ha. 11Nây six nyâuh tuz tăng quef coonz numđ nyăngz gâyf, coong, pănh six oix zuc lanh stăngz lanh, 12năngx gâyf ayx cayx năngđ Ca-in, nănh six săngh manđ nyăngz munh, yâuc tayx nănh nyăngz yâuf. Nănh wâyc săngh laix bix tayx nănh nyăngz yâuf? Wâyc zuc nănh ayx nyăngz cumh pâuz six okx, nzof nănh nyăngz yâuf nyăngz cumh pâuz six peengh stimz.

13Yâuf pez lex, năngđ coong bamh munh hănđ nyâuh, six năngx gâyf numđ njingc. 14Pănh pâyz tuz coong pănh tuz gâyh đutb tayc nyăngz jau, yâuc tuz naih săngh mengc, six wâyc pănh stăngz pănh nyăngz yâuf pez. Laiv lanh max stăngz six năngx jinh yămz tayc cah njaf. 15Laiv lanh hănđ nănh nyăngz yâuf pez six tayx munh nyăngz munh, nyâuh yâuc pâyz tuz coong muif lanh tayx munh nyăngz munh, six max naih stâyv quâyx nyăngz mengc yămz nănh. 16Wâyc nây, pănh pâyz tuz stăngz munh nyăngz jau: Wâyc zuc Zâu Yê-su sađ Nănh nyăngz mengc tayc wâyc pănh. Pănh lauf oix zuc sađ pănh nyăngz mengc tayc wâyc yâuf pez. 17Năngđ coong laiv lanh munh naih bamh canz nyăngz jax toongx, bix phătc nănh nyăngz yâuf pez pongh zâuđ nanc, nănh bix mangc tuz quaix mâyc, max stăngc wax tauh yâuf pez, bix ayx laix naih Zâu Tênb-Huungh nyăngz stăngz, yămz wax lanh munh cah njaf heh? 18Sây lex, năngx gâyf cungb nongc nzetx nongc byetc coong stăngz munh cuungv, six oix zuc senz ayx setb cumh pâuz. 19Wâyc nây, pănh six pâyz tuz coong pănh six săngh senz gâyf nyăngz munh, nzof pănh songđ tuz pungx stimz yămz Nănh nyăngz cah đangc, 20wâyc zuc, năngđ coong pănh nyăngz nyâuđ cănh cooux pănh, Zâu Tênb-Huungh lôx zef năngx lub têx pănh nyăngz nyâuđ, Nănh yâuc pâyz tuz manf dlayc. 21Stăngz nyăngz yâuf pez lex, năngđ coong pănh nyăngz nyâuđ max cooux pănh, pănh songđ tuz pungx stimz huungv staox Zâu Tênb-Huungh ninyh, 22nzof tinyh phanv pănh joođ laiv huungđ, pănh songđ tuz stipx wax huungđ tăng Nănh, wâyc pănh ayx âyz Nănh nyăngz lanyf, yâuc ayx hoopđ Nănh nyăngz nyâuđ, yămz Nănh nyăngz cah đangc. 23Nây six Nănh nyăngz lanyf: pănh oix zuc zen Nănh nyăngz Toonz nyăngz manyh, six Zâu Yê-su Jix-Tuz, yâuc lanh stăngz lanh, cayx năngđ Nănh coong bux phunz pănh nyăngz lanyf nâyx. 24Laiv lanh âyz Nănh nyăngz lanyf ayx six yămz Nănh cah njaf, Nănh yâuc yămz wax lanh cah njaf. Wâyc nây, pănh pâyz tuz coong Nănh yămz pănh cah njaf, wâyc zuc Nănh sađ Singx-Lingh phunz pănh.