Dao Ao Dai Literal Text
1 Yô-hanx 2
Yaz nyăngz sây lex, yaz ja nâyx đomc jau phunz nyâuh, six wâyc phunz nyâuh max longđ stoif. Six năngđ coong naih laiv lanh longđ stoif, pănh yâuc naih ah Tauh stăngc pănh joođ Tênb-toongh Pha, six peengh stimz wax Tauh, Zâu Yê-su Jix-Tuz. Nănh six stanyb lanyh wâyc stav pănh nyăngz stoif, six max zâyf cungb wâyc pănh nyăngz stoif cuungv, yâuc wâyc cloon guungh đi munh nyăngz stoif. Năngđ coong pănh âyz Nănh nyăngz lanyf ayx, pănh songđ pâyz tuz coong pănh senz pâyz Nănh. Laiv lanh coong: “Yaz pâyz Nănh” bix max âyz Nănh nyăngz lanyf ayx, wax tauh six puv maoh munh, senz gâyf yâuc max yămz wax tauh munh nyăngz nyâuđ. Six laiv lanh âyz Zâu Tênb-Huungh nyăngz wac ayx, wax lanh nzăngđ senz stăngz Zâu Tênb-Huungh clăkx clunh nzuf. Năngđ nây, pănh nzăngđ senz pâyz coong pănh yămz Nănh cah njaf: laiv lanh coong nănh yămz Zâu cah njaf, wax lanh six lauf oix zuc ayx cayx năngđ Nănh ayx nyăngz nâyx.
Stăngz nyăngz yâuf pez lex, yaz max zâyf ja ah tiuh săngb lanyf phunz nyâuh, yaz ja nyăngz six lôx lanyf, six nyâuh tăng quef coonz lauf naih nyăngz. Nâyx tiuh lôx lanyf six nyâuh tuz numđ quaix nyăngz wac. Nzof, yaz zef ja ah tiuh săngb lanyf phunz nyâuh, nâyx tiuh săngb lanyf six senz nyăngz yămz Nănh cah njaf, yâuc yămz nyâuh cah njaf, wâyc zuc nzămc tuz đanv ninyh nzuf, nzof senz nyăngz gwăngz yâuc siux nzac taih. Laiv lanh coong nănh yămz gwăngz cah njaf, bix zef năngx hănđ nănh nyăngz yâuf pez, six lauf năngx jinh yămz nzămc cah njaf. Laiv lanh stăngz nănh nyăngz yâuf pez six yămz gwăngz cah njaf, yămz nănh yâuc max naih laiv huungđ jaf munh longđ stoif. Six laiv lanh hănđ nănh nyăngz yâuf pez, six yămz nzămc cah njaf, yâuc yăngh nzămc nyăngz jau, wax tauh munh yâuc max pâyz tuz nănh ninyh laiv, wâyc nzămc ayx phunz nănh nyăngz mâyc buđ.
Sây lex, yaz ja jenx phunz nyâuh, wâyc nyâuh six păngc Nănh nyăngz manyh bix tuz quanyf stoif. Nyâuh munh côx munh lex, yaz ja jenx phunz nyâuh wâyc nyâuh pâyz tăng quef coonz naih nyăngz wax Tauh. Nyâuh munh gunx munh lex, yaz ja jenx phunz nyâuh, wâyc nyâuh tuz hingh quaix njangh okx wax tauh. Munh sây lex, yaz ja jenx phunz nyâuh wâyc nyâuh pâyz tuz Tênb-toongh Pha. Nyâuh munh côx munh lex, yaz ja jenx phunz nyâuh, wâyc nyâuh pâyz tuz tăng quef coonz naih nyăngz wax tauh. Nyâuh munh gunx munh lex, yaz ja jenx phunz nyâuh wâyc nyâuh six njoongh, Zâu Tênb-Huungh nyăngz wac yâuc yămz nyâuh nyăngz nyâuđ, nyâuh yâuc tuz hingh quaix njangh okx wax tauh. Năngx gâyf stăngz bamh canz, yâuc năngx gâyf stăngz bamh canz nyăngz tax huungđ. Năngđ coong laiv lanh stăngz bamh canz, wax lanh six max naih nyâuđ stăngz Tênb-toongh Pha. Wâyc yămz nây bamh canz nyăngz muif huungđ — six stinb sangc oix nyăngz jau, cloon mâyc mangc bix oix tauv laiv, cloon yămz stâyv sangc ayx nzetx lub nyăngz jau — six max zâyf tăng Tênb-toongh Pha taih, nây six tăng bamh canz taih. Bamh canz cloon yămz bamh canz yauc munh nyăngz tax huungđ six quaix ninyh nzuf, six laiv lanh ayx âyz Zâu Tênb-Huungh nyăngz âyx, six naih tauv banc stâyv banc đaic.
Sây lex, stêtb mâyv nyăngz săngx huđ tauv gôh, cayx năngđ nyâuh tuz numđ nâyx coong, nzeengz Zâu Jix-Tuz wax tauh oix zuc taih, nzof nâyx zanyf, yâuc naih đuungx tauh nzeengz Zâu Jix-Tuz nyăngz munh setb taih nzof, wâyc nây, pănh songđ pâyz tuz coong, nâyx yenh stâyv six stêtb mâyv nyăngz săngx huđ. Stiz six tăng pănh setb ninyh, six stiz max zâyf săngh pănh nyăngz munh. Wâyc năngđ coong zâyf săngh pănh nyăngz munh, stiz six cănh cloon pănh yămz, six stiz ayx năngđ nâyx, six wâyc phunz pănh pâyz tuz coong, stiz six max zâyf pănh nyăngz munh ax tiny. Nzof nyâuh six tuz tăng đăngb zeengh wax Tauh sađ Singx-Lingh phunz, nyâuh songđ pâyz tuz muif huungđ gôh. Yaz ja jenx phunz nyâuh six max zâyf wâyc nyâuh max pâyz senz gâyf, six wâyc nyâuh pâyz tuz senz gâyf, wâyc zuc max naih laiv huungđ za nyăngz jau bix tăng senz gâyf taih. Ha, laiv lanh six puv maoh nyăngz munh, max zâyf wax tauh pyenv coong, Zâu Yê-su six max zâyf Zâu Jix-Tuz wax tauh haz? Wax tauh six senz nzeengz Zâu Jix-Tuz nyăngz munh, nănh yâuc max nhlimc Tênb-toongh Pha cloon Nănh nyăngz Toonz. Laiv lanh max nhlimc Toonz six lauf max naih Tênb-toongh Pha. Nzof laiv lanh nhlimc Toonz six lauf naih Tênb-toongh Pha. Nyâuh, tuz tăng coonz numđ wax đomc wac oix zuc zoz ănz nyâuh nyăngz nyâuđ cah njaf. Năngđ coong nyâuh tăng coonz tuz numđ wax đomc wac, bix njinh luh săngx ănz nyâuh nyăngz nyâuđ cah njaf têx, nyâuh six lauf yămz Tênb-toongh Pha cloon Nănh nyăngz Toonz cah njaf. Nây six Nănh nyunc phunz pănh nyăngz wac — six senz stâyv quâyx nyăngz mengc. Yaz ja nâyx đomc wac phunz nyâuh hayh pâyz tuz, ênz nyâuh ninyh longđ jau wax đomc munh. Six nyâuh, tuz Zâu sađ phunz nyăngz Singx-Lingh yămz nyâuh cah njaf, nyâuh songđ max sămv zuc mănv nzaox nyâuh, wâyc zuc, Zâu nyăngz Singx-Lingh cănh nzaox muif huungđ phunz nyâuh, nây six senz nyăngz max zâyf cungb jaf, wâyc nây, oix zuc yămz Nănh cah njaf cayx năngđ Nănh nzaox nyâuh nâyx.
Sây lex, oix zuc muif dlih yămz Nănh cah njaf, zu tauv Nănh hinđ setb taih, pănh songđ tuz pungx stimz yămz Nănh nyăngz cah đangc, yâuc max zuc nyayz, tauv Nănh taih wax zanyf. Năngđ coong nyâuh pâyz coong, Nănh six peengh stimz, nyâuh lauf oix zuc pâyz coong, laiv lanh ayx peengh stimz nyăngz jau, six tăng Nănh stengb taih.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.