1 Yô-hanx 1

1Coong tauv săngh mengc nyăngz gâyf, six tăng quef coonz naih nyăngz gâyf, nây gâyf six buz tuz numđ quaix nyăngz, yâuc tuz mâyc phătc nyăngz, nzof yâuc tuz mangc, cloon buz nyăngz puf yâuc tuz lumz tauv — 2wâyc săngh mengc senz tuz hinđ setb taih, buz tuz mâyc mangc phătc, songđ ayx zanyx manyf nzônh phunz nyâuh, nây stâyv quâyx nyăngz săngh mengc, six cloon Tênb-toongh Pha yămz nyăngz, yâuc tuz hinđ setb taih phunz buz — 3buz tuz phătc yâuc tuz numđ quaix nyăngz, buz songđ nzônh bux nyâuh, phunz nyâuh cloon buz tuz naih tinyh tongb. Nzof, pănh yâuc tuz cloon Tênb-toongh Pha cloon Nănh nyăngz Toonz naih tinyh tongb, six Zâu Yê-su Jix-Tuz. 4Buz ja nâyx đomc wac phunz nyâuh, six wâyc phunz pănh nyăngz numđ nyađ tuz clăkx clunh nzuf.

5Nây six buz tuz numđ tăng Nănh coong nyăngz wac, songđ nzônh phunz nyâuh, coong: Zâu Tênb-Huungh six senz gwăngz, yămz Nănh six max naih tix cay nzămc tiny. 6Năngđ coong pănh coong, pănh cloon Nănh naih tinyh tongb, bix zef yăngh yămz nzămc nyăngz jau, pănh six coong puv maoh yâuc max âyz senz gâyf ayx. 7Six năngđ coong pănh yăngh yămz gwăngz cah njaf, cayx năngđ Nănh yămz gwăngz cah njaf nâyx, pănh songđ lanh cloon lanh naih tinyh tongb, nzof Nănh nyăngz Toonz, Zâu Yê-su nyăngz samđ, yâuc đaox dlăngc pănh nyăngz yetx stong stoif. 8Năngđ coong pănh coong pănh max naih stoif, pănh six cănh jaf pănh cuungv senz gâyf yâuc max yămz pănh nyăngz nyâuđ gôh. 9Năngđ coong pănh nhlimc pănh nyăngz stoif, Nănh six nzuf stimz nzuf nyâuđ, yâuc peengh stimz quanyf stoif phunz pănh, yâuc stav nzuf pănh ayx nyăngz yetx stong stoif. 10Năngđ coong pănh coong pănh max pamf stoif, pănh six ayx cayx năngđ cay Zâu Tênb-Huungh six puv maoh nyăngz munh nâyx, nzof Nănh nyăngz wac yâuc max yămz pănh nyăngz nyâuđ.