1 Cô-lin-tô 13

1Max cun yaz hănđ hayh coong tuz guungh đi munh nyăngz muif huungđ wac cloon stinz munh nyăngz wac, bix yaz năngđ max stăngz munh, yaz six cayx năngđ ah nomz canyz buib stingb nhlangđ max six cayx năngđ tungh jemv buib nâyx. 2Năngđ coong yaz tuz sâuđ nyâyc hayh tâuc wac yâuc hayh manyh pec muif huungđ pinyx vâyv nyăngz jau cloon muif huungđ bănh sangz, nzof yaz hănđ naih zen stimz lub ayx tuz êu zoongz zâyc stuyđ, bix yaz năngđ max stăngz munh, yaz six max setb luungđ tinyh. 3Nzof năngđ coong yaz zoz yaz nyăngz muif huungđ jax toongx phunz munh zâuđ munh, yâuc cănh jaoz yaz nyăngz stinb phunz munh pu, bix yaz năngđ max stăngz munh, yaz six lauf max tuz luungđ. 4Stăngz munh six hayh nyangc tuz yâuc dlênc, stăngz munh six max stâyx munz, stăngz munh six max ayx nzetx lub yâuc max ayx lub, 5yâuc max ayx longđ nyăngz jau, yâuc max tâuh cănh tuz gongx, yâuc max siv totc căn, yâuc max stunx munh ayx huđ nyăngz jau, 6yâuc max numđ nyađ huđ nyăngz jau, six numđ nyađ yămz senz gâyf; 7stăngz munh six hayh quanyf tuz muif huungđ, zen mungc muif huungđ, yămz manf dlayc yâuc naih njih mungc, yâuc hayh tanyđ tuz muif huungđ. 8Stăngz nyăngz jau max naih laiv zanyf hayh jac. Hănđ tuz sâuđ nyâyc hayh tâuc wac, stiz six lauf zuc pac; hănđ tuz sâuđ nyâyc coong pitc huungđ wac, stiz lauf zuc sec; hănđ tuz bănh sangz naih tongb manyh, stiz lauf zuc quanyf. 9Wâyc pănh hoođ six cungb pâyz tuz tix cay, nzof pănh tâuc wac lauf cungb tâuc tuz tix cay. 10Six tauv clăkx clunh nyăngz jau taih tauv, max clăkx clunh nyăngz jau yâuc zuc quanyf. 11Yaz năngx jinh ayx munh sây nyăngz săngx huđ, yaz coong wac six cayx năngđ munh sây, yaz nyâyh lauf cayx năngđ munh sây, yaz zah mangc lauf cayx năngđ munh sây. Tauv yaz săngh munh côx, yaz quanyf wax đomc munh sây nyăngz gao. 12Wâyc nâyx zanyf, pănh mangc quaix munh sây canyx six cungb phătc cay plâub plâub cuungv, six tauv wax zanyf yâuc tuz phătc minb toix minb. Nâyx zanyf yaz cungb pâyz tuz tix cay cuungv, six tauv wax zanyf yaz yâuc tuz pâyz nzuf, năngđ yaz senz pâyz tuz nzuf nâyx. 13Six nâyx zanyf cungb năngx naih nây pôz huungđ: Zen stimz, njih mungc, cloon stăngz munh nyăngz jau. Nzof yămz nây pôz huungđ năngx nongc sen quaix six stăngz munh nyăngz jau.