1 Cô-lin-tô 14

1Oix zuc lov stăngz munh nyăngz jau, yâuc oix zuc joomz nyâuđ lov wax đomc Singx-Lingh nyăngz sâuđ nyâyc, năngx nongc sen quaix six phunz nyâuh hayh tâuc wac. 2Wâyc laiv lanh coong wac njingc six max zâyf cloon munh coong, six cloon Zâu Tênb-Huungh coong; wâyc max naih mănv saz, six, nănh yămz Singx-Lingh bix coong pinyx vâyv nyăngz jau. 3Six laiv lanh tâuc wac six coong hayh zâyv tuz munh nyăngz wac, quinb nzaox yâuc oonz tuz munh nyăngz nyâuđ. 4Coong pitc huungđ wac nyăngz munh six cănh zâyv nănh, nzof tâuc wac nyăngz munh six zâyv Jiux Pangx. 5Yaz oix nyâuh muif lanh hayh coong pitc huungđ wac, six yaz năngx oix têx, six nyâuh hayh tâuc wac. Tâuc wac nyăngz munh six năngx nongc sen quaix coong wac njingc nyăngz munh, năngđ naih munh phanv tuz wax đomc wac six max coong, wâyc phunz jiux pangx hayh tuz zâyv staox. 6Six, yâuf pez lex, năngđ coong nâyx zanyf yaz ninyh nyâuh wa bix coong wax đomc muif huungđ wac njingc ănz nyâuh, bix yaz yâuc max coong plongx yangh nyăngz jau, max six tongb manyh nyăngz wac, max six tâuc wac max six nzaox nyăngz wac ănz nyâuh, bix hayh stăngc tuz nyâuh laiv huungđ heh? 7Hănđ six wax đomc max setb luungđ nyăngz tungh zăngc naih stingb buib — cayx năngđ blungh blex max six lanyh njămh — năngđ coong stiz nyăngz stingb bix buib tinyh năngđ, bix naih mănv hayh saz tuz coong pyom blungh blex nyăngz stingb max six quetb lanyh njămh nyăngz stingb heh? 8Nzof năngđ coong pyom joongz blungh blex nyăngz stingb bix max manyf, laiv naih mănv hayh pâyz bênc săngh nongc ninyh panx peengz heh? 9Nyâuh lauf năngđ nâyx, năngđ coong nyâuh nyăngz nzetx coong nyăngz wac bix max coong tuz manyf têx, naih mănv hayh saz tuz nyâuh coong nyăngz wac heh? Wâyc nyâuh cungb coong quaix nzaox cuungv. 10Yămz nây bamh canz senz naih đuungx huungđ wac nzongf, max tinyh năngđ, yâuc max naih laiv huungđ coong bix max naih âyz gâyf. 11Nzof, năngđ coong yaz max saz wax cuyb wac nyăngz âyz gâyf, yaz six stunx coong wac ănz yaz wax tauh six pitc stingx munh, nzof coong wac wax tauh lauf stunx yaz six pitc stingx munh. 12Nyâuh lauf năngđ nâyx, wâyc nyâuh joomz nyâuđ lov Singx-Lingh nyăngz sâuđ nyâyc, wâyc nongc zâyv jiux pangx, wâyc nây oix zuc lov phunz nyâuh tuz naih muif huungđ sâuđ nyâyc. 13Năngđ nây, coong wac njingc nyăngz munh oix zuc cloo Zâu phunz naih munh hayh pob manyf wax đomc wac. 14Năngđ coong yaz nongc wac njingc cloo Zâu, six yaz nyăngz stimz nyâuđ cloo Zâu cuungv, yaz nyăngz pyây lâyc six max nyâyh tuz phătc luungđ tiny. 15Ha nâyx six ayx laix heh? Yaz six nongc stimz nyâuđ cloo Zâu, yâuc nongc pyây lâyc nyâyh cloo Zâu. Yaz nongc stimz nyâuđ ayx nzungz, yâuc nongc pyây lâyc nyâyh ayx nzungz. 16Năngđ coong nyâuh cungb nongc Stimz nyâuđ tanv Zâu cuungv, wax đomc stâuđ wa cah đi nyăngz munh laiv hayh cloon nyâuh songc coong “A-meen” yămz nyâuh sâuf hâuđ nyăngz jau heh, wâyc stiz max pâyz tuz nyâuh coong luungđ? 17Max cun nyâuh sâuf hâuđ nyăngz wac six senz gongx, yâuc max hayh stăngc tuz pitc lanh munh. 18Yaz sâuf hâuđ Zâu Tênb-Huungh, wâyc yaz coong pitc huungđ wac năngx đuungx quaix nyâuh tinyh đoih, 19six yămz jiux pangx cah njaf, yaz nođ coong pyaz zâux mungv tuz saz nyăngz wac nongc nzaox phunz munh, lôx năngx gongx têx coong ah panc zâux wac njingc.

20Yâuf pez lex, nyâuh nyâyh nyăngz jau six gâyf ayx cayx năngđ munh sây nâyx. Six yămz ayx huđ nyăngz jau oix zuc ayx cayx năngđ munh sây, nzof yămz nyâyh nyăngz jau six oix zuc ayx cayx năngđ munh côx nâyx. 21Yămz gâyf njanh naih ja coong:

“Zâu coong:

‘Yaz six nongc

coong wac njingc nyăngz munh, yâuc nongc pitc stingx munh nyăngz nzetx coong phunz nâyx stingx munh;

six hănđ nâyx, stiz lauf max mungv Yaz.’”

22Wâyc nây, wax đomc wac njingc six nongc ayx ah huungđ njih hoouđ, max zâyf phunz zen nyăngz munh, six phunz max zen nyăngz munh; nzof tâuc wac six max zâyf phunz max zen nyăngz munh, six phunz zen nyăngz munh. 23Ha, năngđ coong lomc jiux pangx căpx dlonf yămz ah cuyb tinc bix tinyh đoih coong wac njingc, bix naih tongh hangh munh max six max zen nyăngz munh nzac taih mungv, stiz six max zâyf coong nyâuh vutx nâyx haz? 24Six năngđ coong tinyh đoih tâuc wac, bix naih max zen nyăngz munh max six tongh hangh nyăngz munh nzac taih, wax tauh munh six tuz numđ nyâuh coong nyăngz wac nzopb tauv nănh, 25yămz nănh nyăngz nyâuđ njaf pinyx vâyv nyăngz jau yâuc tuz coong setb taih, năngđ nâyx, nănh songđ puc nzac paix Zâu Tênb-Huungh, yâuc coong “Zâu Tênb-Huungh senz cloon nyâuh yămz.”

26Năngđ nây, yâuf pez lex? Nyâuh căpx dlonf nyăngz săngx huđ, laiv lanh naih nzungz, naih wac nzaox, naih phătc hinđ yangh nyăngz jau, naih coong wac njingc, max six naih hayh phanv wac. Oix zuc ayx muif huungđ taih nongc zâyv jiux pangx. 27Năngđ coong naih munh coong wac njingc, muif hâyđ cungb tuz iz max six pôz lanh coong, ah lanh coong tuz nyâyc lanh mănc coong, nzof ah lanh six zuc phanv setb taih. 28Nzof năngđ coong max naih mănv hayh phanv tuz, wax lanh munh six oix zuc meengx stinyb njâuh yămz wa jiux pangx. Six plănc taih, oix zuc cănh coong ănz nănh yâuc cloon Zâu Tênb-Huungh coong. 29Wax đomc tuz sâuđ nyâyc tâuc wac nyăngz munh, lauf phanv phunz iz max six pôz lanh coong, nzof năngx naih wax munh six oix zuc zah mangc. 30Six, năngđ coong stâyv mungv nyăngz munh tuz hinđ phunz phătc tix huungđ têx, coong wac đangc wax tauh six zuc sec wac. 31Wâyc tinyh đoih six oix zuc săngh lanh săngh lanh têx tâuc wac, phunz muif lanh hayh tuz hoođ pâyz yâuc muif lanh tuz oonz nyâuđ. 32Wax đomc tâuc wac munh nyăngz stimz nyâuđ six buc wax đomc tâuc wac munh. 33Wâyc Zâu Tênb-Huungh six max zâyf lunc laoc nyăngz Zâu, six peengh oonz nyăngz Zâu.

Cayx năngđ yămz wax đomc đăngb zeengh munh nyăngz muif nomz jiux pangx nâyx, 34munh nzif six oix zuc stinyb njâuh yămz wa jiux pangx. Stiz max tuz coong wac, six oix zuc mungv wac, cayx năngđ gâyf njanh coong nâyx. 35Six năngđ coong stiz oix hoođ pâyz tix huungđ, stiz six oix zuc yămz wa pyau naic cănh nyăngz langh, wâyc munh nzif yămz wa jiux pangx coong wac senz nyayz nzongf. 36Ha Zâu Tênb-Huungh nyăngz wac six tăng nyâuh taih mah? Max six Nănh nyăngz wac cungb taih yămz nyâuh cuungv heh?

37Năngđ coong laiv lanh stunx nănh six tâuc wac munh, max six naih Singx-Lingh yenv nyăngz munh, wax lanh munh six oix zuc pâyz tuz coong, yaz ja phunz nyâuh nâyx đomc wac six Zâu nyăngz lanyf. 38Six năngđ coong laiv lanh max nyenc năngđ nâyx, six phanv dluyh nănh max nyenc.

39Wâyc nây, yâuf pez lex, oix zuc caođ tuz hayh tâuc wac, yâuc năngx gâyf cangđ munh coong wac njingc. 40Six oix zuc ayx muif huungđ năngx hoopđ yâuc ayx năngx naih stâuv ninyh.