Dao Ao Dai Literal Text
1 Cô-lin-tô 12
Nzof coong tauv Singx-Lingh nyăngz sâuđ nyâyc, Yâuf pez lex, yaz max oix nongc nyâuh max pâyz luungđ. Nyâuh pâyz coong yămz nyâuh năngx jinh max zeengx zen nyăngz săngx huđ, nyâuh lauf zuc hox năngđ nâyx, zuc ênz ninyh pongc wax đomc max hayh coong wac nyăngz miuc hanyh. Wâyc nây, yaz bux phunz nyâuh pâyz coong max naih mănv păngc Zâu Tênb-Huungh nyăngz Singx-Lingh bix coong: “Yê-su hoopđ zuc zaux!”, Nzof năngđ max păngc Zâu Singx-Lingh, yâuc max naih mănv hayh nhlimc coong “Zâu Yê-su six Zâu!”.
Nzof, naih đuungx huungđ sâuđ nyâyc max tinyh năngđ, six lauf cungb songc ah tauh Singx-Lingh cuungv. Yâuc naih đuungx huungđ cumh pâuz ayx max tinyh năngđ, six lauf songc ah tauh Zâu. Naih đuungx huungđ cumh pâuz max tinyh năngđ, six lauf cungb songc ah tauh zâu Tênb-Huungh cuungv, senz ayx muif huungđ cumh pâuz yămz muif lanh munh wax Tauh. Zâu Singx-Lingh tuz sađ phunz yămz muif lanh munh wâyc phunz tinyh đoih tuz gongx. Wâyc păngc Singx-Lingh, bix nâyx lanh tuz hayh coong tongb manyh wac, nzof yâuc tăng ah tauh Singx-Lingh bix wax lanh hayh coong sting jaođ wac; yâuc tăng ah tauh Singx-Lingh bix nâyx lanh tuz naih zen stimz, nzof lauf tăng ah tauh Singx-Lingh bix wax lanh yâuc tuz sâuđ nyâyc hayh zany gumc, yâuc phunz nâyx lanh hayh ayx jix caox njingc; zef phunz wax lanh, hayh tâuc wac, yâuc phunz nâyx lanh hayh stămđ tuz setb manđ max six Singx-Lingh; zef phunz wax lanh, hayh coong pitc huungđ wac; zef phunz pitc lanh timb hayh phanv tuz wax đomc pitc huungđ wac. Six lauf cungb songc ah tauh Singx-Lingh đokc ayx wax đomc muif huungđ cumh pâuz, cănh âyz Nănh nyăngz zux ix sađ phunz muif lanh tuz nyăngz yâuc max tinyh năngđ.
Wâyc cayx năngđ ah nomz stinb bix naih đuungx huungđ phănc nâyx, nzof stinb sangc nyăngz muif huungđ phănc, manyf naih đuungx, six lauf cungb songc ah nomz stinb cuungv; Zâu Jix-Tuz lauf năngđ nâyx. Yâuc tăng ah tauh Singx-Lingh pănh muif lanh bix tuz ayx quaix-gâyf taih songc yămz ah nomz stinb, max cun Yu-tai munh max six Hi-lapc munh, ayx nâuh max six max ayx nâuh, yâuc muif lanh tuz songc ah tauh Singx-Lingh hopb. Wâyc stinb six max zâyf cungb naih ah huungđ phănc cuungv, six naih đuungx huungđ phănc. Năngđ coong staux coong: “Wâyc yaz max zâyf pu, yaz six max zâyf stinb nyăngz ah huungđ,” yâuc max zâyf coong wâyc nâyx nănh bix max zâyf stinb nyăngz ah huungđ. Nzof năngđ coong bah noomh coong: “Wâyc yaz max zâyf mâyc, yaz six max zâyf stinb nyăngz ah huungđ,” yâuc max zâyf coong wâyc nâyx nănh bix max zâyf stinb nyăngz ah huungđ. Năngđ coong lomc stinb six mâyc nzuf, bix nongc luungđ mungv heh? Nzof năngđ coong lomc stinb six bah noomh nzuf, bix nongc luungđ homv siv heh? Wâyc nây, Zâu Tênb-Huungh songđ bênc muif huungđ phănc yămz ah nomz stinb, ah huungđ cănh naih ah huungđ nyăngz phănc, âyz Nănh nyăngz zux ix. Nzof năngđ coong tinyh đoih bix cungb ah huungđ phănc cuungv, bix stinb yămz laiv heh? Wâyc nây, manyf naih đuungx huungđ phănc, six lauf cungb naih ah nomz stinb cuungv. Nzof, mâyc max hayh coong ănz puf coong: “Yaz max sămv tauv mâyh”, max six pyây yâuc max hayh coong ănz staux coong: “Yaz max sămv tauv mâyh.” Plănc taih, yămz stinb sangc nyăngz laiv huungđ phănc năngx đoonh têx, yâuc zuc lif năngx gongx têx; nzof pănh phătc stinb nyăngz laiv huungđ phănc max saix, pănh yâuc nongc nănh ayx năngx saix têx; phătc laiv huungđ phănc max quai pănh yâuc zoongz năngx nzongf têx, nzof laiv huungđ phănc cănh quai pănh yâuc max sămv zuc zoongz. Six Zâu Tênb-Huungh căpx stinb taih, nongc phunz wax đomc max tuz zanyb saix yâuc tuz zanyb saix, stinb six max hayh phunz goib, stinb sangc nyăngz phănc six tinyh đoih lanh hâuđ lênh lanh. Năngđ coong naih ah huungđ phănc zuc munz, six lomc stinb sangc tinyh đoih tanyđ nzuf; năngđ coong naih ah huungđ phănc tuz zanyb saix, six lomc stinb sangc tuz songc numđ nyađ. Nzof, nyâuh six Zâu Jix-Tuz nyăngz stinb, yâuc săngh wax đomc stinb sangc nyăngz muif huungđ phănc six max tinyh năngđ. Zâu Tênb-Huungh sên ah đomc munh taih yămz jiux pangx, tah yetx six, cumh pâuz munh, tah nyâyc six, wax đomc tâuc wac munh, tah stamz six wax đomc stênx steengb, zef ah phanx hayh ayx jix caox njingc, ah phanx tuz sâuđ nyâyc hayh zany gumc, stăngc munh, hayh cun, cloon coong wax đomc pitc huungđ wac. Max zâyf muif lanh six cumh pâuz munh? Yâuc max zâyf muif lanh six tâuc wac munh? Max zâyf muif lanh six ayx stênx steengb? Yâuc max zâyf muif lanh hayh ayx jix caox njingc? Max zâyf muif lanh tuz sâuđ nyâyc hayh zany gumc? Yâuc max zâyf muif lanh hayh coong pitc huungđ wac? Nzof yâuc max zâyf muif lanh hayh phanv tuz wax đomc wac? Six oix zuc nzac jab lov wax đomc năngx gongx quaix nyăngz sâuđ nyâyc. Nzof nâyx zanyf yaz six bux phunz nyâuh pâyz tuz laiv huungđ six năngx gongx quaix nyăngz jau.
Dao Ao Dai Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.