1 Cô-lin-tô 11

1Oix zuc hoođ âyz yaz nyăngz gao ayx, cayx năngđ yaz âyz Zâu Jix-Tuz nyăngz gao ayx nâyx.

2Yaz tanv nyâuh wâyc nyâuh yămz manf dlayc yâuc săngx tauv yaz, nzof nyâuh yâuc nzuf stimz nzuf nyâuđ ayx âyz yaz nzaox phunz nyâuh wax đomc jau. 3Six, yaz yâuc oix nongc nyâuh pâyz tuz coong Zâu Jix-Tuz six ayx muif lanh munh pha nyăngz pyây, nzof munh pha six ayx munh nzif nyăngz pyây, nzof Zâu Tênb-Huungh six ayx Zâu Jix-Tuz nyăngz pyây. 4Muif lanh munh pha cloo Zâu max six tâuc wac, năngđ coong nongc tix huungđ plongz pyây, six ayx nyayz cănh nyăngz pyây. 5Six muif lanh munh nzif cloo Zâu max six tâuc wac bix max plongz pyây, six ayx nyayz cănh nyăngz pyây. Six cayx năngđ cay zuc tâyv pyây nâyx. 6Năngđ coong munh nzif max plongz pyây, nănh wănh jăpx pyây. Six munh nzif jăpx pyây max six tâyv pyây yâuc senz nyayz nzongf, năngđ nâyx nănh oix zuc plongz pyây. 7Six munh pha yâuc max hoopđ zuc plongz pyây, wâyc munh pha six nzâyz Zâu Tênb-Huungh nyăngz gwăngz eeng. Nzof, munh nzif six munh pha nyăngz gwăngz eeng. 8Wâyc munh pha six max zâyf tăng munh nzif taih, six munh nzif tăng munh pha taih. 9Yâuc wâyc munh pha max tuz zuyx taih wâyc munh nzif, six munh wâyc munh pha. 10Wâyc nây, munh nzif oix zuc đongx njic hoouđ hinđ manyf lokc jangx yămz nănh nyăngz pyây, wâyc wax đomc stinz munh. 11Năngđ nây, yămz Zâu cah njaf, munh nzif six max lanyc munh pha, munh pha yâuc max lanyc munh nzif. 12Wâyc munh nzif tăng munh pha taih ayx năngđ laix, munh pha lauf tăng munh nzif steengb taih năngđ wa nâyx, six muif huungđ yâuc tăng Zâu Tênb-Huungh taih nzuf. 13Nyâuh cănh oix zuc nyâyh mungv jađ: Munh nzif cloon Zâu Tênb-Huungh cloo Zâu bix max plongz pyây six hoopđ max hoopđ? 14Max zâyf nyâuh lauf cănh pâyz coong, năngđ coong munh pha njâuh pyây đongz đao, six cănh nyayz nănh, 15nzof munh nzif njâuh pyây đongz đao, six săngh nănh nyăngz gwăngz eeng haz? Wâyc nănh tuz sađ phunz naih pyây đongz đao cayx năngđ bah nyaic đongx plongz pyây nâyx. 16Năngđ coong naih mănv oix nzeengz nâyx đomc jau, buz yâuc max ayx nâyx, nzof Zâu Tênb-Huungh nyăngz jiux pangx lauf max ayx nâyx.

17Six nâyx zanyf yaz coong nâyx đomc lanyf, yaz max tanv nyâuh, wâyc nyâuh căpx dlonf six max zâyf nongc ayx gongx, bix taih nongc ayx huđ. 18Tah yetx, yaz numđ coong nyâuh yămz jiux pangx căpx dlonf nyăngz săngx huđ, yămz nyâuh cah njaf yâuc naih phunz goib ayx sax peob, yaz lauf zen coong nâyx đomc dlayc six senz naih. 19Wâyc yămz nyâuh cah njaf senz zuc naih phunz goib taih, nongc phunz hayh tanyđ tuz stâyv nyâuđ nyăngz jau wax đomc munh, yâuc tuz hinđ manyf setb taih yămz nyâuh cah njaf. 20Wâyc nây, nyâuh taih căpx dlonf yămz ah nomz tinc nyăngz săngx huđ, six max zâyf songc Zâu nyăngz hinh nhlinc nzof. 21Wâyc nhlinc nyăngz săngx huđ, mănv cănh coonx nhlinc mănv nyăngz đangc; wâyc nây songđ naih ah phanx six zuc tanyđ nyâuđ sab, nzof naih ah phanx yâuc tiu binz. 22Ha nyâuh max naih pyau nongc yămz wa nhlinc hopb mah? Max six nyâuh mangc stam Zâu Tênb-Huungh nyăngz jiux pangx bix ayx phunz wax đomc max naih luungđ nyăngz munh nyayz heh? Yaz cayx hoopđ zuc coong ayx laix ănz nyâuh heh? Hoopđ zuc tanv nyâuh ayx nâyx đomc jau max? Yaz max tanv đêh! 23Wâyc yaz tuz stipx tăng Zâu nyăngz gâyf, yaz songđ jaoz phunz nyâuh, nây six Zâu Yê-su, yămz Nănh zuc maic wax munf, songđ zoz nzuf taih, 24sâuf hâuđ tuz Nănh songđ watz taih yâuc coong: “Nây six yaz nyăngz stinb, six wâyc tayv phunz nyâuh. Oix zuc ayx năngđ nâyx wâyc săngx tauv yaz.” 25Lauf tinyh năngđ nhlinc nzuf tuz zef zoz nomz zan taih, yâuc coong: “Nâyx nomz zan six nongc yaz nyăngz samđ njăpc săngb nhlengc wac. Laiv zanyf nyâuh hopb nâyx nomz zan, oix zuc ayx năngđ nâyx wâyc săngx tauv yaz.” 26Tinyh phanv laiv zanyf nyâuh nhlinc nâyx nomz nzu, hopb nâyx nomz zan, nyâuh six coong tauv Zâu tayc nyăngz jau ayx tuz tauv Nănh taih. 27Wâyc nây, tinyh phanv laiv lanh nhlinc Zâu nyăngz nzuf max six hopb Zâu nyăngz zan, bix ayx max payh six naih stoif cloon Zâu nyăngz stinb cloon Zâu nyăngz samđ. 28Năngđ nây, muif lanh oix zuc cănh zah pănh mangc, nzof mănc nhlinc nzu, hopb zan. 29Wâyc laiv lanh nhlinc cloon hopb bix max saz tuz Zâu nyăngz stinb, six nhlinc cloon hopb nongc tingc nănh. 30Wâyc nây, yămz nyâuh cah njaf nzăngđ naih đuungx lanh zuc munz, săngh gumc, yâuc naih đuungx lanh mâyc njoomh. 31Nzof năngđ coong pănh cănh zah pănh mangc, pănh six max zuc tingc stoif. 32Six tauv zuc Zâu tingc stoif, pănh six zuc phađ, phunz pănh max zuc songc cloon bamh canz munh zuc tingc stoif. 33Wâyc nây, yaz nyăngz yâuf pez lex, laiv zanyf căpx dlonf nongc nhlinc, six oix zuc lanh zu lanh. 34Năngđ coong laiv lanh nyâuđ sab, six oix zuc yămz wa pyau nhlinc, phunz nyâuh căpx dlonf bix max zuc tingc stoif. Năngx naih pitc huungđ zu tauv laiv zanyf yaz ninyh yaz mănc coong.