Wale Magar Kham
मर्कुस 16
येसु फरि ज्युङडा ओटाव
मत्ती २४:१-८; लुका २४:१-१२; युहन्ना २०:१-२०
नाःसिने डिन ओखेमो पान्त्रा मरियम मग्डलिनी सोनो याकुबलो वामा मरियम, होसोनो सलोमीराई येसुलो ओक्याङटं ठिड्याने वार्डे चाव बसैने ठी यालोःङो। साताका पैला डिन छ्याम छकाल्ने निमी ओपलेरिज़्याकं नोरं खाडरलं यानाव। होकाम नोराई हैयावारो, “गेलाई खाडरलो ओयाः कप्सिव लुङ काङ्काये फैड्यासिवके?”
नोराई याडे यारःङकं खाडर कप्सिव लुङ फैसिव उलिज़्याव यारोःङो नो लुङ बनै घ्योव लेव। नोरं खाडर लेवकं यानाकं टक-टक पलाङो खेव क्वा क्वाइसिव टोबो ढापा मीलाई खाडरकाम वोःरडे चुङडे उलिज़्याव यारोःङो, नेटानाव रःङडे नोरं बनै छक्क याटाव।
हो ढापा मीये नोरंलाई हैओडोवरं, “अचम्ब टाटाच्यो, जे क्रुसटं टाङगिडे यासोयो नासरतला येसुलाई जिखिम्ज़्याव माङ्क डोरो। नो के सिवलाम ज्युङडा याटाडु, आलं माले। नोलाई यानोयो पोलं गरःङरिच्योके। गनाच्योके, नाडे उसिसरंलाई सोनो पत्रुसलाई हैडाच्यो। येसु जेङाः-जेङाः गालीललं नारिज़्या। येसुये जेलाई हैओडाच्योव मान्टि जे होलाई नलं डैने जेले।”
होकाम नो मेमारं येसुलो रितो ओखाडरलाम पुलुडे आव मी के खर्कज़ मासिने ची ओलेव वार्डे ज़ोःये-ज़ोःये यानाव, कडालेकं नोरं येसु सिडे ज्युङडा ओटाव ओखाडर पो रःङडे याछ्यासैये करिङ-करिङ यागुज़्याव। होकाम नोरं डस्साज़ छेडे नो रोः उसिसरंलाई सोनो पत्रुसलाई काङ्कालाईज़ हैमाडोरंये।
येसु मरियम मग्डलिनी लेवङ ओसंतन्सिव
मत्ती २८:९-२०; लुका २४:१३-४३; युहन्ना २०:११-२३; प्रेरित १:४-११
साताका पैला डिन छ्याम छकाल्ने येसु ज्युङडा ओटाव पान्त्रा मरियम मग्डलिनी लेवङ ओसंतन्सिव। ङाःडे नो लेवङाम येसुये सातगोटा ज़्याःरं ओहायोरं। नो मरियमये येसु ज्युङडा ओटाव रोः उसिसरंलाई हैओडोवरं। नोरं लाम्सी-लाम्सी याघरज़्याव। येसु ज्युङडा टाडे मरियम लेवङं ओसंतन्सिव वार्ने सोर याठैकं उसिसराई मापतिरंये।
होकाम येसुलो नेबऱ्याङ उसिसनि नाङखारडे नेनाज़्याकं नोनि लेवङ येसु छुटं उरुप रैडे ओसंतन्सिव। होकाम नोनि वोल्डे नाडे उरुरंलाई पनि हैनेडोवरं। होकाम नोराई नोनि नेरोः पनि मापतिरंये।
झिन्डे येसु एघार जना उसिसराई काङ याज़्योज़्याव बेलाकं ओसंतन्सिव। होकाम नोराई येसु ज्युङडा ओटाव नो रोः यामपतिव रःङडे ओहकलोयोरं, कडालेकं नोराई यायुङ खाव टाडेउलिज़्याव। होसोनो येसु सिवलाम ज्युङडा ओटाव झिन्डे ओल्लाई रःङनेराई यारोः उसिसराई यामपटिव। येसुये नोरंलाई हैओडोवरं, “जे प्रिठीबीला स्यान्टै पोलं नाडे परमेस्वरये उसिर्जोयो स्यान्टै मीरंलाई चाव सोर सठैच्योरं। बिस्वास डोनेरं सोनो बप्तिस्मा टानेरं, पापलाम बान्चिनेलेरं। बुरु बिस्वास माडोनेरं डोसि ठहरिडे सजै डैने लेरं। बिस्वास डोनेरासं ऐटाव चिन्नरं टानेले येसुलो उमिन्ट ज़्याःर सोढोङने लेरं, होसोनो नोरं साःरौ पाङ पनि पाङने लेरं। नोराई गुलरं क्योःनेलेरं होसोनो सिने वासं याज़ोनि पनि नोरं कैज़ टाने मालेरं। नोराई ठलिव मीराई याक्याङटं याकुइ नैने लेरं, होकाम नोरं सम्ने लेरं।”
होकाम प्रभु येसु नोरासं ओपाङो मान्त्रा स्वर्गडे ओछेनसिव, होकाम परमेस्वरलो वोःरडेङा उकुइडे उचुङो। उसिसराई आव रोः चारकोना यासंठोयो। नोराई आव येःन याडोकं प्रभुये पनि ओगयोरं। होकाम चिन्नरं सटन्डे प्रभुलो ओपाङलाई अजं पक्का याझोयो।
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.