Wale Magar Kham
मर्कुस 15
पिलातसलो ओङाःकं येसु
मत्ती २७:११-३१; लुका २३:२-३; २३:१८-२५; युहन्ना १८:२८-४०; १९:१-१६
छकाल्ने ओटाव पाना मुख्या सेवा डोने मीरं, यहुडी नेतारं, सास्त्रटा न्याम पैने मीरं सोनो स्यान्टै यहुडीरं याडुप्सिने ज़ीःमला स्यान्टै मीराई सल्ला डाडे येसुलाई किडे पिलातस लेवङ लाङडे यासुम्पिव।
पिलातसये येसुलाई ओपजोयो, “होकाम नङ यहुडीराई याराजा रो?” येसुये जबाफ ओयोव, “नङ हैनवार्ज़्याव स्यानावज़।”
मुख्या सेवा डोने मीराई येसुलाई बनै भ्या रोःटं याडोसोयो। पिलातसये येसुलाई फरि ओपजोयो, “होकाम नङसं कडि जबाफज़ माले रो? नोराई नबिरोड डाडे खाडंङ डोसैसन्ज़्यारं।”
होकाम येसुये फरि पनि कडि जबाफज़ मायोवये, पिलातस पनि बक्क ओटाव।
येसुलाई सैःने डन्ड
मत्ती २७:१५-२६; लुका २३:१३-२५; युहन्ना १८:३९—१९:१६
निस्तार पर्ब बेलाकं प्रजाराई राःने यावारो टोबो कैतीलाई पिलातसये ङाःडेकामज़ राःड्यानेरं चलन लेव। हुलडङ्गा ओटाव बेलाकं मी सैःने हत्यारारं झ्यालखानालं लेवरं। होरंलाम बारब्बा याडोज़्याव टोबो कैती पनि होल लेव। मीरं राडे पिलातसलाई ओचलन अनंसार कैती राःड्याने वार्डे बिन्ती याडोव। नोरंलाई पिलातसये ओपंजोयोरं, “होकाम ङा यहुडीराई याराजालाई राःडेङायाच्यो वार्ने जियुङलं उलिज़्याव रो?” कडालेकं इख डाडेज़ मुख्या सेवा डोने मीराई येसुलाई पिलातस लेवङ यासुम्पिव, वार्ने रोः पिलातसलाई ङाःडेज़ ठा लेव।
बुरु बारब्बालाई राःड्यासिच्यो वार्डे मुख्या सेवा डोने मीराई होला मीरंलाई याचम्कोयोरं।
पिलातसये फरि नोरंलाई ओपंजोयोरं,
“जोलाई जे यहुडीराई याराजा जेडोज़्या, जे हैगवार्च्योके होलाई ङा कै झैने?”
नोरं फरि कस्सिडे किःडे हैयावारो, “नोलाई क्रुसटं टाङ्गि।”
पिलातसये नोरंलाई हैओडोवर, “कडा? आवये कडि अपराड डाडे ओनैज़्यावड?” होरं झन कस्सि-कस्सिडे याकिःव, “नोलाई क्रुसटं टाङ्गि।”
होकाम पिलातसये माहुल्ये मीरंलाई सोन्टोको झैनेरं वार्डे बारब्बालाई राःडे ओयोवरं, होकाम येसुलाई कोर्राये पोःडे क्रुसटं टाङगिव उपरिःङोरं।
सिफाइँराई येसुलाई यागिल्लोयो
सिफाइँराई येसुलाई प्रेटोरियान याडोज़्याव घ्योव ज़ीःमलं यालाङो, होकाम सिफाइँराई पल्टनला स्यान्टैलाईज़ याडुपोरं। होकाम नोराई येसुलाई निल्ल्याव क्वा याक्वायो। होकाम ज़ुलो ओखारलाई पगरि झैडे ओङैःटं यासंजाव। होकाम सिफाईँराई, “यहुडीराई याराजालाई जय!” वारोग्यान सलाम डोवग्यान याडोव। होकाम ओङैःटं ज़िःङलो भाटाये पोःवग्यान, त्युलो ग्यान डाडे याघुन्डा टिकिसिडे ढो पनि याडोव। होकाम येसुलो उगिल्ला याडोवमान्त्रा ओक्याङटाम निल्ल्याव क्वा याहाइड्योव, होकाम येसुलाई ओक्वाज़ याक्वायो। होकाम येसुलाई क्रुसटं टाङ्गिने पाखाडे यालाङो।
येसुलाई क्रुसटं याझुन्डोयो
मत्ती २७:३२-४४; लुका २३:३३-३४; युहन्ना १९:१७-२७
होकाम अलेकजेन्डर सोनो रुफसलो ओबाबु, कुरेनीलं लेने सिमोनलाई नाङखारलाम ओराज़्याकं येम्ट डैडे येसुलो उक्रुस जबरजस्ति सुघुर्ने वार्डे याक्योःव। होकाम नोराई येसुलाई गलगठा वार्ने पोलं यालाङो। गलगठालो ओमाने “खप्पर लेव पो” टाये। होकाम नोराई येसुलाई मुर्र बराईसिव अङ्गुरलो मड्ड यायोव, हैनि पनि येसुये नो माओँवये। नोराई येसुलाई क्रुसटं याटाङगिव। होकाम नोराई येसुलो ओक्वा भाने, वार्डे याखार्ल गोला याझाव। नोराई येसुलाई क्रुसटं याटाङगिज़्याकं छकाल्नेका नौ बजिव लेव। येसुलाई याडोसोयो डोस पाटीटं “यहुडीराई याराजा” सर्सिव लेव नोराई येसुसं नेबऱ्याङ डाङ्कुरंलाई पनि क्रुसटं याटाङगिवरं, येसुकाम टोबोलाई वोःरडे, छुटंलाई डाबऱ्याडे। सास्त्रटा बचन ऐ झैडे पुरा ओटाव, “येसु अपराडीलं उगनिसिव।”1
होलाग्यान्ट बाने मीराई याङैः हल्लैडे ऐ लेडे उबिरोड डाडे यागिल्लोयो, “डे! नङ माङ्कडोरो प्रार्ठना डोने ज़ीःम टैःडे सोङलाका तयार झैने, क्रुसटाम झरिडे राडे नङ नङलाईज़ गबचैके।”
हैजैडे मुख्या सेवा डोने मीरं सोनो सास्त्रटा न्याम पैने मीरं ऐ लेडे ख्याल याडोव, “आवये उरुरंलाई ओबोचोयोरं हैनि पनि ओललाई के माबचैडुवये। आव इस्राएलला याराजा, ख्रीस्ट आबो क्रुसटाम वोल्डे ओराकं, होकाम गे नोलाई रःङडे बिस्वास डोनेगेले।” ओल्स क्रुसटा टाङ्गिसिवनि पनि निगिल्लोयो।
येसु उसिव
मत्ती २७:४५-५६; लुका २३:४4-४९; युहन्ना १९:२८-३०
बार बजे काम तीन बजे समं स्यान्टै डेस भरि अन्ड्यारो ओटाव। तीन बजेयालं येसु ऐ लेडे कस्सिडे उकिःव, “इलोई-इलोई लामा सबखठनी?” आवलो ओमाने, “ए ङापरमेस्वर ए ङापरमेस्वर नङ ङालाई कडाने नराःसोङो?”
होकाला लेवराई कोइ कोइराई आव ठैडे हैयावारो, “ठैच्यो खेने नोये एलियालाई उखुल्ज़्याव।” होकाम टोबो मी गुर-गुर ज़ोःनाडे टोबो भुटुने सिर्कालं छिमडे टोबो खेव ज़िःङटाम ओयोव, “डे, रःङनेडाइ कडिग्यान एलियाये आवलाई झारैरिव सै?”
येसु कस्सिडे उकिःव होकाम ओसं ओफ्याव।
होकाम प्रार्ठना डोने ज़ीःमला क्वालो बार रोटाम मेलं समं चिडे नेफंलाङ ओटाव। येसुलो ओसं ऐ टाडे ओफ्याव रःङडे येसुलो ओछ्योका च्याङसिव कप्तानये हैओवारो, “आव के डस्साज़ परमेस्वरलो ओज़ाची ओलेवलेव।”
होकं टाडाङाम रःङने, कोइ-कोइ मेमारं पनि लेवरं। नोरंलाम मरियम मग्डलिनी, आलिज़ा याकुब, योसेफलो वामा मरियम सोनो सलोमी लेवरं। येसु गालीललं ओलेव बेलाकं नोरं येसुलो उझिन्ट बारिरंये। होकाम ओसेवा पनि डोरंये। येसुसं यरुसलेमलं रावरं भ्या मेमारं पनि लेवरं।
येसुलाई गाडिसिव
मत्ती २७:५६-६१; लुका २३:५०-५६; युहन्ना १९:३८-४२
तयार टाने डिन छ्याम (नाःसिने छ्यामलो ओङाटा छ्याम), रिःम्डे ओटारिज़्याकं। घ्योव सभाला ओमान लेव मी अरिमाठियाला योसेफये परमेस्वरलो ओराज्य राने येम ओरःङज़्याव, होये माछेडे पिलातस लेवङं नाडे पिलातससं येसुलो सिव ओक्याङ उनीःव। येसु ङाःडेज़ उसिव ची लेव वार्ने रोः ठैडे पिलातस अचम्ब ओटाव। होकाम पिलातसये कप्तानलाई खुल्डे येसु उसिव सै उम्सिव वार्डे ओपजोयो। येसु उसिव रोः कप्तानये हैओडोव मान्त्रा पिलातसये योसेफलाई येसुलो सिव ओक्याङ गलाङके ओडोव। होकाम योसेफये सुतिलो क्वा लःङडे येसुलो सिव ओक्याङ क्रुसटाम मेलं झारैडे क्वाटं पोडे लुङ खुलिडे झैसिव खाडरलं ओनोयो, नो खाडरलो ओयाःलाई टोबो पल्याटाये ओकोपो। मरियम मग्डलिनी सोनो योसेफलो वामा मरियमनि येसुलाई गाडिसिव पो रःङडेज़ नेनैज़्याव।
Source notes (1)
- Footnote आव बचन कोइ कुइये सर्सिव कागत यालं माले लुका २1:3७
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.