Wale Magar Kham
मर्कुस 10:45
Verse 45 is marked below, with the whole chapter around it. Read from the start
ज्यारि भासिने
मत्ती १९:१-९
हो पोलाई राःडे यर्डन भै होपंटं यहुडिया छेत्रलं येसु ओनाव होकाम माहुले मीरं येसु लेवकं याराव, होकाम येसुये ओचलन अनंसार होरंलाई ओपोयोरं।
फरिसीरं राडे येसुलाई ऐ वार्डे याजान्चिव, “होकाम कोइ खेपाये ओज्यासं भासिने चाव सै माचाव?”
येसुये होरंलाई हैओडोवरं, “मोसाये जेलाई कडि आग्या ओयाच्योव?”
फरिसीराई हैयावारो, “टोबो कागतटं भरपाई सर्डे ज्यारि भासिने टाये वार्डे मोसाये आग्या याडेनोयो।”
होकाम येसुये नोरंलाई हैओडोवरं, “जेलाई पैने बनै ढौ ओटावये मोसाये नो न्याम सर्डे ओयाच्योव। सास्त्रटं सर्सिव ले, ‘सङसार ओटावकामज़ परमेस्वरये नोनिलाई खेपा सोनो मेमा ओझोयोनि ची।’ हैजैडेज़ खेपा मीये ओबाबु वामालाई राःडे ओज्यासं मिलिडे ओलेकं, होकाम नो ज्यारि टोबो ज्यु टाने लेनि। नो ज्यारिनि नेम्लो माङ्क, बुरु टोबो ज्युज़ टाने लेनि। हैजैडे परमेस्वरये जोलाई ज्यारि झैडे नोयोरं, मीराई होरंलाई टाछुटैरंकं।”
ज़ीःमकं याराव छिन्डे आव रोः फरि येसुलाई उसिसराई यापजोयो। येसुये उसिसरंलाई हैओडोवरं, “जोये ओज्यालाई राःडे छुटंसं बिह्याँ डोव, होये ओज्यालो उबिरोडलं ब्यभिचार डोवये। होकाम मेमाये पनि ओरेसं भासिडे छुटं खेपासं बिह्याँ याडोवखे भने, हो मेमाये ब्यभिचार ओडोव टाये।”
आलिज़ा बाल्खरंलाई येसुये आसिक योवरंये
मत्ती १९:१३-१५; लुका १८:१५-१७
मीराई आलिज़ा छोऱ्या लुज़ारंलाई येसुये छुडेगयासिवकं वार्डे ओङाःकं यारोयोरं, होकाम उसिसराई होरंलाई याहक्लोयोरं। हो रःङडे येसु उरिसिव, होकाम उसिसरंलाई हैओडोवरं, “आलिज़ा बाल्खरंलाई ङालेवकं राव याच्योरं, नोरंलाई टावोङच्योरं, कडालेकं परमेस्वरलो ओराज्य आव स्यानावराईज़। डस्साज़ ङा जेलाई हैङाडाच्योज़्या, जोये परमेस्वरलो ओराज्यलाई टोबो आलिज़ा बाल्खलाई स्यानाव ग्रहन माडोव, नो खर्कज़ परमेस्वरलो ओराज्यलं पसिडुने माले।” होकाम येसुये बाल्खरंलाई ओघोन्ल रैडे याङैःटं उकुइ नैडे आसिक ओयोवरं।
टोबो ढापा ढनी मी
मत्ती १९:१६-३०; लुका १८:१८-३०
येसु येम्ट ओनाज़्याकं, टोबो मी ज़ोरिडे येसुलो ओङाःकं उघुन्डाये ओच्याङसिव, होकाम येसुलाई ओपजोयो, “ए चाव गुरबा, खर्कज़ मासिने जीबन डैने ङा कडि येःन डोने टाये?”
येसुये हो मीलाई हैओडोव, “नङ ङालाई कडाने चाव नडाङज़्याव? टोबो परमेस्वर काम काङ्काज़ चाव मालेरं। नङ न्यामरं के नसनये, हत्या टाडो, ब्यभिचार टाडो, टाकुङंन, झुठ गोहाइ टायो, टाडुटै, नबाबु सोनो नामालाई मान योनि।”
होकाम हो मीये येसुलाई हैओडोव, “गुरबा आव स्यान्टै के ङा आलिज़ा ङालेवकामज़ डाडे ङाराव ची।”
येसुये हो मीलाई ओरोःङो, होकाम मया डाडे हैओडोव “नङ नजीबनलं टोबो रोः माडुमो लिज़्या। गनानके, नाडे नङसं कडि-कडि लिज़्या स्यान्टै येडे गरिबरंलाई गयोरंके, होकाम नङ नो सम्पति स्वर्गटं डैने नले। होकाम राडे ङाछिन्ट नराके।” होकाम आव रोःये हो मी डुखि ओटाव, होकाम ओसोगो हाइडे ओनाव, कडालेकं हो मीसं भ्या ढन सम्पति लेव।
होकाम आडे होडे रःङडे येसुये उसिसरंलाई हैओडोवरं, “ढनी मीरंलाई परमेस्वरलो ओराज्यलं पसिने खाडंङ ढौ लिज़्या।”
येसुये हैओवारो आव रोःटं उसिसरं अचम्ब याटाव। होकाम येसुये फरि नोरंलाई हैओडोवरं, “ए बाल्खरं परमेस्वरलो ओराज्यलं नाने खाडंङ ढौ लिज़्या। ढनी मी परमेस्वरलो ओराज्यलं पसिने भन्डा के उँटलाई गपलो उकुङलं पसिने सजालो टाये।”
येसुलो उसिसरं बनै अचम्ब टाडे येसुलाई हैयाडोव, “हो टावसं बान्चिने काङ्काखेने?”
येसुये उसिसरंलाई रःङडे हैओडोवरं, “मीराईङाम आव माटाडु, बुरु परमेस्वरङाम टाव ढुव, कडालेकं परमेस्वरये स्यान्टै रोः डोडुव।”
पत्रुसये येसुलाई हैओडोव, “रःङखेने, गे स्यान्जाति राःडे नछिन्ट गेबाज़्या।”
येसुये हैओडोवरं, “डस्साज़ ङा जेलाई हैङाडाच्योज़्या, जोये ङालागिटं सोनो चाव सोरलो ओलागिटं, उज़ीःम ओडाज्यु भाइ, ओनाना बैनी, वामा ओबाबु ओज़ारं सोनो ओढन सम्पति राःव, होसोनो हो सहटैसिव निःनेले होकाम नोसंज़ सय गुना भ्या ज़ीःम, डाज्यु भाइ, नाना बैनी, आमा, ज़ारं सोनो जग्गा जमिन नो बेलाकंज़ डैनेले, होकाम राने जुगुलं खर्कज़ मासिने जीबन डैनेले। होकाम ङाःडेङारं छिन्ङ सोनो छिन्ङारं ङाःङ टानेलेरं।”
येसु सोङ्खेपका फरि उसिने बारेलं भबिस्यबानी ओडोव
मत्ती २०:१७-१९; लुका १८:३१-३३
येसु उसिसरासं यरुसलेमडे नाने येमलाग्यान्ट यानाज़्याकं, येसु नोराई याङा-याङा ओनाज़्याव। उसिसरं अचम्ब टाव लेवरं, होकाम उरु छिन्टा रानेरं छेव लेवरं। होकाम येसुये बार जना उसिस भरिरंलाई टङकं लाङरंडे ओल उज्युटं टारिने रोःलो ओबारेलं उसिसरंलाई हैओडोवरं। येसुये हैओवारो, “रःङच्यो, गे यरुसलेमडे गेनाज़्या। होङं मानवालो ओज़ालाई मुख्या सेवा डोनेराई सोनो सास्त्रटा न्याम पैने मीराई लेवङ सुम्पिसिने ले, होकाम नोराई होलाई सैःने सजै यानेलेरं, होकाम नोराई यहुडीरंकाम उरुका मीराई याकुइटं सुम्पिड्यानेलेरं। होकाम होराई नोलाई उल्ली नि गिल्ली डाडे त्युःल्नेलेरं, होकाम कोर्राये यापोःव पाना नोलाई सैःनेलेरं। होकाम उसिव सोङलाका नो फरि ज्युङडा टाडे सोने ले।”
याकुब सोनो युहन्नानि बिन्ती नेडोव
मत्ती २०:२०-२८
जब्डियालो ओज़ानि, याकुब सोनो युहन्नानि येसु लेवकं राडे हैनेवारो, “गुरबा गिन नङसं जो गिनिः होज़ झैड्यासि वार्ने गिइच्छया लिज़्या।”
येसुये होनिलाई ओपजोयोनि, “जेलागिटं ङा कडि झैड्याने वार्ने जियुङलं लिज़्या?”
होनि येसुलाई हैनेडोव, “नमहिमाला राज्यलं गिनलाई नङसंज़ टोबो वोःर्डे टोबोलाई डाबऱ्याडे लेव यासि।”
येसुये नोनिलाई हैओडोवनि, “जिन कडि जिनिःज़्याव हो जिन जेमसन। होकाम ङा जो डुखंलो कचौरालाम ङाओँ, हो कचौरालाम जिन जेओँडु? होसोनो ङा जो बप्तिस्मा ङाटारिज़्या हो जिन जेटाडु?”
नोनि येसुलाई हैनेडोव, “गिन गिढु।”
येसुये नोनिलाई हैओडोवनि, “जो कचौरालाम ङा ङाओँ हो कचौरालामज़ जिन पनि ओँनेजेले, जो बप्तिस्मा ङा ङाटारिज़्या हो बप्तिस्मा जिन पनि टानेजेले। हैनि पनि वोःर्डे सोनो डाबऱ्याडे चुङो याने ङा ङाकुइटं माले, आव के जो-जोराई यालागिटं तयार झैसिव लिज़्या, होराई यालागिटंज़ ची।”
आव ठैडे डस जना उसिसरं याकुब सोनो युहन्नासं याभर्किव। होकाम येसुये स्यान्टै उसिसरंलाई खुल्डे हैओडोवरं, “जे जेसनये यहुडीरंकाम उरुका मीराई याखार्ल सासंन डोनेराई नो यहुडीरंकाम उरुका मीराई यातर्ट सासंन चलैरंये। होकाम होराई यासेःरराई फरि होराई यातर्ट अडिकार चलैरंये। जे नेटाव टाटाच्यो। बुरु जेलाम काङ्काये घ्योव टाने पानो, हो जेसेवा डोने ओटाकं। होकाम जेलाम काङ्का पैला टाने बिचार डोव, हो स्यान्टैराई याकमारा ओटाकं, कडालेकं मानवालो ओज़ा सेवा डैने वार्डे माङ्क, बुरु सेवा डोने सोनो स्यानटैराई यापापलो ओझोलो लागिटं ओपोहोन याने ओराव ची।”
अन्डला बारतिमै ओसोमो
मत्ती २०:२९-३४; लुका १८:३५-४३
होकाम येसु सोनो उसिसरं यरीहो सहरलं याराव, येसु उसिसरासं सोनो माहुले मीरासं यरीहोलाम उपुलुज़्याकं तिमैलो ओज़ा बारतिमै, टोबो अन्डला भिखारी, येमलो ओगोराटं चुङडे उलिज़्याव। नोये आव के नासरतला येसु ची ओलेव वार्डे ओठोयो, होकाम किःडे हैओवारो, “ए येसु, डाउडलो ओज़ा, ङालाई डया डाङ।”
होकाम भ्या मीराई हो मीलाई टापाङ्ङन वार्डे याहक्लोयो। होकाम नो अजं कस्सिडे किःडे हैओवारो, “ए डाउडलो ओज़ा ङालाई डया डाङ।”
होकाम येसु ठन अडिडे हैओडोवरं, “नोलाई खुल्च्यो।”
होकामटानि होराई नो अन्डलालाई ऐ वार्डे याखुलो, “हिक्मत डोडे च्याङसिडे गराङन्के, येसुये नङलाई खुल्सनज़्याव।” होकाम ओक्वा हुँइख्याडे नो ठरच्याङसिडे येसु लेवकं ओराव।
येसुये नोलाई हैओडोव, “नङलाई कडि ओचाहिज़्याव, नलागिटं ङा कडि झैने?”
हो मीये येसुलाई हैओडोव, “रब्बी ङामिलङ फरि ओरःनकं।”
होकाम येसुये नो मीलाई हैओडोव, “नयेम्डे गनानके। नबिस्वासये नङलाई ससम्डेनैसोनो।”
होकाम होमान्त्राज़ नोलो उमिलंङ ओरोःनो, होकाम येम्ट येसुलो उछिन-उछिन ओनाव।
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.