Skip to content
BibleKenya

Sheshi Kham

मत्ती 6:33

Verse 33 is marked below, with the whole chapter around it. Read from the start

दान यांन्या बारेल आह्युउन्या

लूका ११:२-४

“होस सकाए चुङचिते, जे रुयाङजन धार्मिकताला काम ताढोच्यो। मानकन्ता स्वर्गल लिज्यान्या जे बौङन जे नैज इनाम माडोएचिदी।”1 “नैताइस्यु जब जे दान योंच्यो, तब आलेऊक तुरही2 ताटपच्यो, जोमनलेस्यु घुर्बीयाङै यहूदीयाङ आराधना झिमजिऊल सनर यम जिऊल रुयाङ्ङन प्रसम्सा डोटौ नाल्ट ढोरा। मछ्यु ङा जेजन पानस्याच्या, नकाङै रांमि इनाम डोएस्युई लेरा।” तर जब नङ दान योंन, न दाइन्या कुईले नै ढाज्याऔ ना दाबऱ्या कुईले तासनौत्या। न दान गुप्तल ग्याताइत्या, ओटन गुप्तल रङन्या न बौले नङजन इनाम यांन्वा।

प्रार्थनाल बारेल आह्युउन्या

लूका ११:२-४

“जब नङ प्रार्थना ढोच्यो तब घुर्बीयाङमन ताटाइच्यो, दानाङभन्या नकाङ आराधना झिमजिऊल सनर द्वाहादोबाटा जिऊल रुयाङै ग्यारङरत्या ऐलेस्यु च्याङस्यु प्रार्थना ढान्या निज्युरा। मछ्यु, ङा जेजन ऐढाच्या, नकाङ रांमि इनाम डोएदुरा।3 तर जब नङ प्रार्थना ढोन, न कोठा भितरलं पसिन्ते, ओटन झलाप रूफ्स्यु स्वर्गला लिज्यान्या न बौ परमेस्वरजन प्रार्थना ढोते, गुप्तल रङन्या न बौले नङजन इनाम यांन्वा। ओटन प्रार्थना जेढाऔक गैरयहूदीयाङमन दाङजै गनगन तालेच्यो दानाङभन्या तबर शब्दल छ्योङौक नकाङल थएसिया ऐलेन्या नकाङ यिङरा।4 नैताइस्यु नकाङमन ताटाइच्यो, दानाङभन्या जे बौसकाए जेनीऊ हादेए जेजन नै-नै चाहिऊ। ना स्वर्गला जे बौले ऐसन्वा।

“तर जे ऐलेस्यु प्रार्थना ढोचिते,

‘औ, स्वर्गल लिज्यान्या गे बौ,

नमिन पबित्र ग्यामानिसित्या।

न राज्य ग्यारांत्या। नइच्छ्या स्वर्गल जोमनताइन्या ले, नामन्ज ईका पिरथ्बील पुरा ग्याताइत्या।

गेजन आछिम दिनभरिका गे जेए यासिन्ते।

गे अपराद छेमा ढास्यासिन्ते, जोमनलेस्यु गे गेअपरादीयाङजन छेमा ढास्यु गेलेयिउ।

गेजन परिक्छ्याल परिऊ तायासिन, तर दुस्टङन छुताइसिन्ते दानाङभन्या राज्य, पराक्रम सनर महिमा सदाईज नमीई ज्या, आमेन’।”

दानाङभन्या जे रुयाङल अपराद छेमा ढोच्योकन, स्वर्गल लिज्यान्या जे बौले बै जेजन छेमा यांचिवा।5 तर जे रुयाङल अपराद छेमा माढोच्योकन, स्वर्गल लेन्या जेबौले जे अपराद छेमा ढान्यामाल्दी।

बर्तल बारे आह्युउन्या

“जब जे बर्त चुङच्यो, तब घुर्बीयाङमन झुङखरिन्या अनवार ताथनच्यो। दानाङभन्या नकाङ रुयाङजन थनौ नाल्ट रांअनवार मोल जाएस्यु बर्त चुङरा। ङा मछ्यु जेजन ऐढाच्या, नकाङ रांमि इनाम डोएस्युई लेरा। तर जे बर्त जेचुङौक जे हां हुरचिते, ओटन जे ङएल तीइ ठिइचिते। नैताइस्यु जे बर्त जेचुङौक रुयाङ ग्यारङरत्या ऐलेस्यु माङडी, तर गुप्तल लिज्यान्या जे बौले ग्यारङौत्या, ओटन गुप्तल रङन्या जेबौले जेजन इनाम यांचिवा।

स्वर्गला सम्पति

लूका १२:३३-३४; १६:१३

“जे नाल्ट पिरथ्बील धन-सम्पत ताबोरच्यो, जोल लुइयाङ सनर खयले ना कैरा ओटन जोल गोएयाङै झिम पाअस्यु नका कुरा।”6

तर जे नाल्ट स्वर्गल धन-सम्पत बोरचिते, जोङ लुइयाङ या खयले माकैदुरदी, सनर गोएले बै झिम पाअस्यु माकुदुरदी।7 दानाङभन्या जोङ जे धन लिज्या, जे यिङ बै ओङै लिज्याया।

बुलल ज्योति

लूका ११:३४-३६

“म्युउ बुलल बत्ति हो। नैताइस्यु यदि न म्युउ स्वस्थ लेकन, सोगलै न बुल रंनन्या ताहा। तर न म्युउ अस्वस्थ लेकन, सोगलै न बुल चिऊन्या ताहा। नैताइस्यु न भितरलं लेन्या रंनन्या च्युककन, नका चिऊन्या ख्वाए छ्याइला ताहौ!

परमेस्वर सनर धनसम्पत

लूका १६:१३; १२:२२-३१

“काङ्काईले नेंलोअ साहूल सेवा ढाऔ माढुदुऊदी। दानाङभन्या नाले तोलोअजन सज्युवा ओटन छुट्टैजन निज्युवा। अथाबा नाले तोलोअदेए भक्ति नाएवा, ओटन छुट्टैजन नाले सज्युन्यालेया। जे परमेस्वर सनर धनल सेवा ढाऔ माढुदुचिदी।” “नैताइस्यु ङा जेजन ऐढाच्या, ‘गे नै ज्योई नै ओइ ऐलेस्यु जे परानल नाल्ट सनर बुलजन नै क्वाटै ऐलेस्यु नाल नाल्ट जे ताआतिच्यो।’ ओक्या परान ज्यान्या जन्तुतन ओटन बुल क्वायाङतन घिन्या मालेऊ का?” नमता बायाङजन ब्याएचिरते। नकाङै न त धूर वाइर, न अन खानन्या धोर न भोखरलं दुउर, तर स्वर्गला जे बौले नकाङजन यांहौरा। जे ओक्या नकाङतन तबर यएला जेमाल्चिऊ का? जे मध्य काङ्काले आतिस्यु जिबनल आयु तचिइठक्क बै चहौ आढुदुऊ? “ओटन जे दानाङ क्वाल नाल्ट आतिइ ढोच्यो? बाङला लिली वोईयाङजन खिम्चिरते, नकाङ कडाई बढिवाङ।” नकाङै न परिस्रम धोर न धागा खलर। तर ङा जेजन ऐढाच्या, सोलोमन रय आमि सोगलै सक्तियाङत वोईयाङ मध्य तोलोअ याएथक्क बै सुवाइसिन्या माताइदा।8 आछिम लेन्या ओटन घालाअ भुबराल क्याइसिन्या छीजन परमेस्वरले ऐलेस्यु आक्वाटौ भन्या, ऐ अल्पबिस्वासीयाङ, नैति ओले जेजन तबर क्वा माक्वाएचिवा का?

“नैताइस्यु ‘नै ज्योई?’ ओटन ‘नै ओइ?’ सनर ‘नै क्वाएसिई?’ ऐलेस्यु आतिइ ताढोच्यो। दानाङभन्या गैरयहूदीयाङ ईका सोगलै जन्तु रोअरा, ओटन स्वर्गल लेन्या जे बौले जेजन ईका सोगल जन्तु मायोअज्याऔ ऐलेस्यु ऐसन्वा। तर पैला परमेस्वरलं राज्य सनर धार्मिकता रोअचिते, ओटन ईका सोगलै जन्तु जे नाल्ट चैन्या लेसिया।9 नैताइस्यु घालाअका आतिइ ताढोच्यो, दानाङभन्या घालाअका दिनले आआतिइ ओलजै ढोवा। आछिमका दुख आछिमकाल नाल्ट तबर लेया।

Source notes (9)
  1. Cross-reference मत्ती २३:५
  2. Footnote तुरही = रङल भोङकर
  3. Cross-reference लूका १८:१०-१४
  4. Cross-reference लेवी ७:१४
  5. Cross-reference मर्कुस ११:२५-२६
  6. Cross-reference याकूब ५:२-३
  7. Cross-reference याकूब ५:२-३
  8. Cross-reference १राजा १०:४-७; २इतिहास ९:३-६
  9. Cross-reference लूका १२:३१

Sheshi Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.